2010年6月29日 星期二

拔絲蘋果

     23-6-2010   



見啲蛇果又大又甜又多汁,咪攞黎整拔絲囉!點知炸好蘋果,要做糖漿果部份,工人姐姐先同我講:「無啦!糖無啦!」乜話你而家先同我講話無糖,有無攪錯呀!講左幾多次叫柴米油鹽用剩一半,就要通知我入貨。鑊鑊都係咁,硬係要惹我發火,豈由此理!咁而家點算呀?無糖咁點做拔絲呀?唯有試下用黃糖啦!結果係……失敗!激死我啦!兩個囡可能知道我忟憎,異口同聲話:「好食呀!酸酸甜甜,我唔覺有問題喎!」仲同我急急掃晒成碟落肚……


白菜魚丸肉碎湯

23-6-2010   



天氣咁熱,滾菜湯最啱不過!


芒果荔枝西米涼粉撈

    22-6-2010   



唔知點解熱天食涼粉特別爽,雖然早幾日食完,不過依然忍唔住手買多嚿返去嘆!今沒我加左老公至愛嘅芒果、荔枝和西米落去,再加啲薑汁、黃糖水和花奶撈呀撈,真係食極都唔厭………『正』…


2010年6月27日 星期日

晚餐




今日問老公:「聽日父親節,你想去邊度食飯慶祝呀?」點知老公話:「我好多野做,最快都要成10點幾先收得工呀!其實父親節都唔係咁重要,母親節重要好多…求其食魚蛋、豬皮都得啦!」我即刻話:「唔得!你有無問過兩個囡父親節重唔重要呀?點可以求其食車公仔麵就當一餐呀!」老公話:「咁夜無乜地方好揀,食得夜又怕攪到阿囡夜瞓,簡簡單單食餐咪算囉!」既然老公用心良苦都係為阿囡。咁就今晚食得豐富啲啦!


黑椒雞絲蟹柳螺絲粉(老公至愛)


椒鹽魷魚鬚(老公至愛)


海鮮pizza(大囡至愛)


XO醬炒生菜(細囡至愛)


蜜汁焗金沙骨(老公至愛)


粟米湯(自己至愛)


海鮮pizza




呢款pizza我加左青口、蜆肉、帶子、蝦仁和粟米落去,仲賴有心機捆埋芝麻邊。當pizza焗至中途發覺有好多水滲出,先知道出事啦!我唔記得印乾啲海鮮呀!!攪到個pizza焗左成個鐘先得,個批邊脆到好似餅乾,老公仲話:「無問題呀!一次半次失手無問題喎!」大佬你有得食,梗係無問題啦!難為我啲心機同時間,化為烏有………


晚餐

18-6-2010   



唔知大家有無聽過一間叫Rinbow嘅公司,免費上門幫家居吸塵蹣,介紹一部吸塵機還可當清新空氣機和香薰機用的?價錢都幾貴架!成$19980!唔知有無bIog友用過呢??可否告知我好無用呢?因為我正在考慮購買…………


咖喱薯仔甘荀雞翼尖(老公至愛)


椰菜炒火腿絲(自己至愛)


辣味黃花魚(兩個囡至愛)


2010年6月26日 星期六

椒盬魷魚鬚

     19-6-2010  



呢度有成2磅魷魚鬚,真係食極都食唔晒!兩個囡一個幫手上蛋漿,一個幫手上生粉,雙劍合壁!絕對係好幫手!


朱古力蛋白曲奇(附加食譜)

    

19-6-2010呢款曲奇好鬆脆可口!兩個囡都讚不絕口,猛話:「好味!好味……」大囡問我:「你幾時買左個咁靚嘅模架?」我笑笑口話:「係月餅模黎架!」大囡話:「果然係用得唔好嘥……」




朱古力蛋白曲奇


做法:牛油70g、糖霜65g、蛋白1隻、雲呢拿油2


    朱古力餅碎60g、低筋麵粉100g、粟粉25g、泡打粉2g


做法:1.牛油和糖霜打至鬆白。


    2.2次下蛋白打勻,下雲呢拿油打勻。


    3.篩入粉類拌勻,下朱古力餅碎拌勻,搓成麵糰,


 放入雪櫃雪半小時,取出壓印圖形。


    4.180度焗15分鐘,放涼即成。


椰果粟米涼粉撈

     18-6-2010



老公呢排好忙,日日都成11點幾先收工。見到老公入門口見到我都唔識笑,就知老公攰到爆。就整碗消暑涼粉比老公嘆!細囡此終最識氹老公,猛幫老公揼骨……


2010年6月25日 星期五

黑糖杏仁紅莓曲奇(附加食譜)

     

18-6-2010呢款曲奇入口好伙麥維他消化餅呀!我好鐘意呀!!


黑糖杏仁紅莓曲奇


材料:牛油55g、砂糖10g、黑糖40g、蛋1隻、雲呢拿油2


    低筋麵粉90g、粟粉20g、梳打粉2g、杏仁粒30g、紅莓乾25g


做法:1.牛油、砂糖和黑糖打至鬆白。


    2.蛋分3次打勻,下雲呢拿油打勻。


    3.篩入粉類拌勻,下紅莓乾拌勻,搓成正方形放雪櫃雪l小時,


  取出塗上蛋白,滾上杏仁粒,再放雪櫃雪半小時,取出切件,


  180度焗l5分鐘,放涼即成。


 


晚餐

 17-6-2010    


每年老公都托奶奶叫大姑媽整18紥梘水粽黎送比朋友食,個個朋友食完例必大讚好好食!所以每年未到端午已經比人係咁追問:「幾時有粽食………」大姑媽整呢啲梘水粽好細隻架!男人2啖一個,女人4啖一個………


白粥(自己至愛)


荷包蛋肉碎撈麵(細囡至愛)


裹蒸粽、梘水粽(兩個囡至愛)


炸帶子(兩個囡至愛)


2010年6月24日 星期四

桂花荔枝大菜糕

     16-6-2010    


呢排唔知仲乜又回到少女年代,又開始迷上耳環啦!2個月已買左29對耳環啦!是否太瘋狂呢??見老公買左茘枝返黎,為免老公食得多,就攞左1打黎整大菜糕,拌埋桂花糖食,真係好香甜呀!


晚餐

    15-6-2010   




呢幾日唔知仲乜好鬼咳,食完藥又好鬼攰!老公表哥係田裏割左成30支粟米比我地,都唔知點食,唯有攞左8支起粒加雞湯黎煲粟米湯,真係好清甜呀!


豆腐炆火腩(老公至愛)


豉油雞(大囡至愛)


魚香茄子(細囡至愛)


豆角炒墨魚條(老公至愛)


鮮甜粟米湯(自己至愛)


南華李大菜糕

    15-6-2010    


奶奶買左成4磅南華李比老公食,老公食極都食唔完,就攞啲黎整大菜糕。呢款大菜糕酸中帶甜,甜中帶酸,口感好得意呀!!兩個囡平時一個都唔食,用黎整大菜糕兩個囡又肯食喎!真奇妙!


2010年6月23日 星期三

晚餐

     14-6-2010    



老公個阿爺近幾個月唔知攪乜鬼?用錢用得好緊要,$5000都唔夠駛,仲成日再要老公比。老公開始覺得唔對路,怕老人家比女人迷,呃佢錢。攪到老公好煩,唔比又唔得,比又擔心,都唔知點好……………


蒜蓉菜心


香辣韮菜花蝦乾花生蜆肉(老公至愛)


靈芝菇炆雞(老公至愛)


椰香纖果黑珍珠

     14-6-2010  



黑珍珠遇水後發脹,我加左2湯匙係碗內攪拌片刻,成個碗已經脹得滿滿,再加l湯匙蜜糖調味就0K啦!我再加椰漿、糖水和椰纖果落去,真係好好味呀!老公一食就話:「啲黑珍珠走晒入我啲牙縫度,好過癮呀!」老公食食下又話:「靚太,我想食西米,幾時有空整比我嘆呀?」我話:「胸…我有!你睇唔到咩?」老公即時話:「咪玩啦!講正經架!幾時整比我食呀?」我話:「西米…無難度!過兩日整比你嘆啦!」老公鬼咁興奮話:「yeah!過兩日有西米吔…正呀!」大囡即時話:「駛唔駛咁開心呀?」老公賴正經話:「因為我係一個好易滿足嘅人………………」


水香芒卷@

     13-6-2010    




今日帶「小虎」去打第3支防疫注射同埋瘋狗症注射,呢隻怕痛鬼「小虎」又一次失禮街坊啦!不止叫喊了二十幾聲,仲賴埋尿添,真係醜怪!連醫生都話小虎:「你真係超級怕痛喎!好少狗會喊得咁厲害……」細囡比「小虎」啲叫喊聲嚇親,猛話:「好驚呀!乜事呀?小虎點呀?」沿途都見細囡好擔憂「小虎」,一於整啲甜品比阿囡定驚!等阿囡食完唔駛再心慌慌。呢款水仙芒卷,簡單易整又美味!果然細囡食完一條又一條,心情明顯好轉………


2010年6月22日 星期二

椰豆杞子桂花糕

    12-6-2010    


過左啦!過左十萬人次瀏灠啦!好開心呀!唸起10個月前,大囡無端端話:「媽咪,不如我幫你開番個bIog呀?」我話:「開黎仲乜呀?我都唔識用電腦!」大囡話:「因為我發覺你好鐘意整野食,兼且又整得靚,我想幫你認識更多志同道合嘅朋友……」我話:「我真係舞唔掂部電腦架!」大囡話:「我知你肯學一定得架!」就係咁自己開始中左電腦毒,每日唔上過網硬係周身唔舒服。當日老公唔知係用激將法定係睇小我話:「如果有2000人睇你個bIog,就送部notebook比你…」notebook亦早已到手,跟住老公又話:「過5000人就送部Nikon相機比你…」而家相機亦到左手,只係自己仲未模得熟部機!呢個老公又挑戰我話:「過100000人就送隻錶比你…」今日我又得左啦!老公即時話:「完全估唔到你會咁投入日日去寫bIog!見你生活圈子擴濶了,人亦開朗左,送隻錶比你都係值得嘅…」我問老公:「仲挑唔挑戰我呀?」老公話:「唔敢啦!費時破財…我祝你越戰越勇,bIog友越黎越多,美食依舊日日奉上,甜美笑容日日向我送…」呢個老公成日都好識氹我開心!其實寫bIog至今,確實領掠到好多東西,亦有好大滿足感,自信心亦增強了很多……不過,體重亦因此有增無減!所以話:「有得必有失係無錯架!」呢款桂花糕美味可口,細囡至愛吃……


晚餐

     12-6-2010  


大囡箍牙從,成日都嗌:「我啲牙好痛呀……」唯有煲粥食……


煎餃子、雞翼、蝦餅(細囡至愛)


香腸粟米炒玉帶麵(大囡至愛)


白粥(自己至愛)


黑椒牛肉燒賣(細囡至愛)


咸肉粽(大囡至愛)


2010年6月19日 星期六

桂圓豆漿燉蛋白

    11-6-2010    


今日帶細囡去睇眼科,醫生檢查話:「細囡係隱性外斜視,唔駛做手術,只需要做啲融合治療訓練幫幫細囡,問題一定會有改善!」診金$550,即刻揾視光師做融合治療30分鐘$400。做完訓練細囡猛話:「我對眼好攰呀!同埋有啲頭暈!」見細囡咁講即時帶細囡去掃街,先食冷麵、煎魚餅、魚蛋、燒賣、雞蛋仔、珍珠奶茶和金邊粉,食到細囡話:「我覺得今日好幸運,不止派4科考試卷成績滿意,仲可以食到想食嘅野,真係好開心!」呢款燉蛋滑嘟嘟,細囡一路食一路話:「又滑又甜,好食…正…我鐘意……」


水仙芒大菜糕

     10-6-2010    


今日同舊工人LiIy傾電話,感覺大家好親近,沒有以前般拘束。我有個習慣就係工人姐姐另謀高就,都會一直保持聯絡。想起從前主僕關係,演變成今天是朋友關係,確實是很難得的!在這11年裏我總共用左6個工人姐姐,有2個返左印尼已經失去聯絡,另外3個就一直有keep住傾電話同埋見面,每次見面都份外興奮,彼此互相慰問和關懷,就像許久不見的親人一樣,格外窩心和溫暖。見老公買左個水仙芒返黎,又大又甜又多汁,一於又撻少少黎整大菜糕。兩個囡猛話:「好味……」


椰汁珍珠西瓜撈

9-6-2010



老公今次真失策!買個西瓜唔甜,兩個囡唔願幫襯。既然係咁就攞黎整甜品啦!一於加啲椰漿、鮮奶、黑珍珠、冰粒和西瓜撈埋一碗啦!兩個囡見到爭住黎幫襯,老公一見到就話:「B仔…」我話:「唔係!係mabeI囡……」老公笑笑口話:「對唔住呀!」老公一路食一路話:「好食…不過唔夠冰凍,放入雪櫃雪多陣,留返做宵夜『正』……」聽到宵夜呢兩個字都怕怕,自己嗱嗱林啪返碗,費時陪老公顛,增肥咪攪我……………


2010年6月18日 星期五

晚餐

    9-6-2010



今日帶大囡去洗牙,估唔到阿囡怕痛到咁!不止成身硬晒,對腳仲不由自主地彈下彈下!我越望就越覺得好笑,仲忍唔住笑左出黎,見到醫生同姑娘愕然嘅反應,自己真係覺得好失禮!老公知道後猛問我:「你係咪變態架!個囡驚到咁,你仲笑得出!」我話:「真係好好笑架!好似係度打緊拍子咁架………」老公話:「我無你咁傻!」我話:「如果你在場肯定都會好似我咁傻!」


黑椒肉碎粟米燴豆腐(兩個囡至愛)


蟹柳蛋白扒西蘭花(兩個囡至愛)


香煎比目魚(細囡至愛)


車厘子寒天凍

    8-6-2010   



我拎呢杯寒天凍比老公食時,老公一睇就話:「乜鐵蛋都可以拎黎整甜品架?」我即刻話:「大佬,咪玩野啦!鐵蛋又油又咸又硬,點攞黎整甜品呀?」隨即兩個囡已經哈哈大笑,我都唔知好笑定好嬲!我再話:「係呀!鐵蛋車厘子寒天凍呀!啱唔啱食呀?」老公話:「唔駛寸我咁盡呀!我見食粥有鐵蛋,咪以為係囉!」加左香甜嘅車厘子,確實美味!


2010年6月16日 星期三

晚餐

     8-6-2010    


Mandy今日讚細囡話:「如果用呢種心態去作答考試,一定無問題!因為好認真仔細去作答題目!」希望細囡能夠保持此種心態去應付考試啦!


紅腸牛肉蛋絲炒米粉(兩個囡至愛)


蒸小籠包(大囡至愛)


瑤柱白粥(拌海蜇)(兩個囡至愛)


煎鮮竹龍蝦卷(大囡至愛)


鐵蛋(大囡至愛)


珍珠奶茶

    8-6-2010


見細囡不停做數嬏練習操練自己,就整杯珍珠奶茶鼓勵下佢!我用左12包伯爵茶包黎煲浸,果然好香濃,配上煙韌嘅珍珠同冰粒,細囡一邊啜一邊話:「同街買無乜分別!唯一唔同係有媽咪嘅愛心……」呢個囡呀!口甜舌滑……


晚餐

7-6-2010   



尋晚收到一個壞消息,老公個客仔兼老友早前發現有末期肝癌,因抵受不住化療的療程,昨日在車箱燒炭了結了人生!老公不斷歎息話:「做人真係要睇開啲,開心又一日,唔開心又一日……」聽完老公說話,發覺其實細囡還有好多優點之處,我不應該執迷不悟去指擇細囡的不是,應該要好好珍惜彼此相處的時光………


節瓜粉絲肉碎(細囡至愛)


蒜蓉生菜


咸酸菜炒雞柳(大囡至愛)


2010年6月15日 星期二

蜜柑香芒寒天凍

7-6-2010   



晨咁早就要我大開剎戒,聲嘶力竭怒罵細囡,兼且迫我施展太極掌怒摑細囡三大巴。阿囡究竟你幾時先唔再講大話呀?明明唔見左張八達通,還處處抵賴話:「無唔見呀!真係唔知去左邊咋!我銀包散子多得滯,好重。所以,我咪入錢唔用八達通囉!」我話:「你錢多就去捐錢做善事!你竟然會用自己零用錢黎搭小巴?」唔見左咪講實話囉!何須要唔認呢?咁唔見左同搵唔到有乜分別呢?點解你講親大話都唔眨眼架!永遠都要破壞我對你的信任,每每見我獸性大發,你才知事態嚴重!點解每次都要令媽咪失控、無奈、自責和慚愧呢?寒天粉又係會好快凝固架!我比較鐘意大菜爽口嘅感覺!蜜柑配芒果味道好清新………


朱古力提子燕麥曲奇

    7-6-2010  


呢個細囡又作反啦!補習時鬼咁懶散,激到Mandy姐姐補到一半就唔補,豈由此理成日都攪攪震!明知下星期就呈分試,絲毫都不在意,激死人啦!最嬲係用左2萬五蚊箍牙,你竟然成日將條鐵線自動鬆落黎,咁箍牙黎有乜用呢?你幾時先玩夠呀?對住你我不止精神緊張,心情亦隨之暴燥。每次囗頭承諾會改過,不消一會你又故態復萌,你一次又一次令我失望!與其係度谷氣,就入廚房整曲奇,將啲憤怒一拼發洩出黎!呢款曲奇好鬆化,大囡一路食一路話:「真係唔想食咁多,但係你又整得鬼咁好味!你叫我點忍口呢?」最終大囡連續吃左4塊先收口,仲話:「你成日整咁多美食比我嘆,我又點會唔肥呢?」


晚餐

     5-6-2010



細囡唔知仲乜全身起晒紅疹,仲猛話:「好痕……」老公話:「嗱嗱林帶出去睇醫生呀!而家手足口病好緊要呀!」好彩醫生話係:「毛囊炎,應該係觸摸過啲敏感物料所致……」呢頭鬆一口氣,醫生又發現細囡右眼有輕微鬥雞,醫院叫絕對不要忽視此病徵,要盡快根治。


蒜蓉西蘭花(細囡至愛)


芥蘭沙茶牛肉(老公至愛)


煎菏包蛋(全家至愛)


2010年6月14日 星期一

香橙蛋糕

      5-6-2010    



呀囡,呀囡!爸爸搵錢好辛苦架!淨係幫你開個BBQ Birthday Party埋單已經$36l0,2個蛋糕1個雪糕蛋糕埋單又$970,一部LGGD880又$2880,全部加埋$7460!媽咪希望你能感受到爸爸對你的愛!能夠活在幸福中,一定要知足常樂!感恩上天對你的眷顧,給你一個溫馨的家。呢款蛋糕外脆內鬆軟,入囗有濃濃香橙味,細囡猛話:「好味……」


2010年6月13日 星期日

蛋白大菜糕

     4-6 -2010


點解有蛋花大菜糕?點解就冇蛋白大菜糕呢?我呢個乜都夠膽試嘅人,一於又攪攪震先得!實驗証明係蛋花香啲嘅!


2010年6月12日 星期六

豬肉乾

      4-6-2010   



13年前的今天,凌晨6點幾我個肚揪住揪住痛,仲連續去左5次大便添!我列忍住痛等到老公7點半起床先同老公講,不過已經痛到行唔郁,老公唯有caII白車送我去威爾斯醫院。點知架白車在停車場閘口同前面架的士撞車,登到我個肚好痛!痛到我依嘩鬼叫,老公猛咁攬住我話:「唔駛驚!」跟住係咁錫我塊面好多啖!等左一陣,另一架白車到,點知又遇上黑色暴雨,獅子山隧道大塞車,唯有轉去就近嘅明愛醫院。當我比送上產房後,發覺點解四周都咁寧靜嘅,全部大肚婆都咁舒服係度瞓覺嘅?點解無人嗌痛架?凈係得我一個係到痛苦呻吟。姑娘埋黎話:「如果你唔忍得痛,不如嘗試打無痛分娩啦!完全無陣痛感覺架!」痛到死死下,聽到可以唔痛,仲唔嗱嗱聲叫老公簽字呀!果然唔駛半個鐘,乜痛都無晒!瞓醒唔知第幾輪覺,就問姑娘:「我生得未呀?」姑娘話:「度數開夠先得呀!你瞓多陣啦!」卒之10點幾姑娘話:「度數開夠啦!而家先同你拔左條麻醉喉先,15分鐘就會有陣痛感覺,痛有半個鐘就推你入產房生呀!」話口未完已經痛到典床典蓆,姑娘問老公:「先生,你怕唔怕見血架?唔好一陣嚇暈左,到時都唔知救你先定同你老婆接生好!」老公捉住我手話:「而家我老婆極度需要我,我一定要陪住我老婆生………」推到入產房手術室唔知係驚定係痛得滯,自己完全失控,聽唔到姑娘嘅指示,胡亂吸氣呼氣,卒之攪到入左風,係咁嘔!姑娘即刻叫老公幫手揸住個盆,免得我嘔到一身都係。我猛捉住老公隻手話:「好痛呀!我唔生啦!」姑娘即刻安慰我話:「做媽媽好偉大架!唔係人人都有呢個機會架!勇敢啲!出力啦!你將來一定會係個好媽媽架!乖啦!用力吸氣…呼氣……」老公就猛錫我額頭話:「乖乖地啦!出力啦!」姑娘又話:「放鬆,放鬆,呼氣,呼氣忘記痛楚,重新跟我做一次吸氣…呼氣……如果再生唔到,就要開刀架!」老公又話:「慢慢黎多次呀!我錫晒你呀!」我咬實牙關來回出盡力好幾次,突然聽到老公話:「睇到頭髮啦!快啲!快啲出力呀!」經過幾輪運氣,都係咇唔出阿囡,姑娘唯有用吸盤吸阿囡出黎,自己即時成身軟晒!推出產房老公一支箭衝過黎就話:「個囡好似我呀!真係好似我呀!」直到今天大囡都依然和老公餅印一樣!呢款豬肉乾,我特登整比大囡食架!大囡一食就話:「好似街買果啲呀!好味呀!」細囡不嬲淨係食美珍香,估唔到都肯幫襯我半塊仔,仲話:「都幾好味喎!」跟手再攞多塊大黎食,又話:「除左美珍香,你整嘅豬肉乾我都鐘意食……」真係氹死我啦!不枉我焗左5轉,都係値得!在此我祝願大囡「生日快樂!最緊要腦筋靈活,越大越靚,身形fit到漏油,日日笑容燦爛,活力充沛,人見人愛,車見車載…………」


晚餐@

    3-6-2010    






「小虎」真係好有靈性,知道我唔鐘意細囡偷懶,成日就幫我昅實細囡。好似我入左去厠所無耐,就聽到小虎狂吠,我出黎問細囡發生乜事?細囡話:「我都唔知!佢係咁向住我吠呀!」」我再問細囡:「咁你頭先係度做乜呀?」細囡話:「我係度搣緊腳皮囉!」我即刻話:「因為你偷懶唔做功課,所以小虎吠你,提醒你要專心一致做功課!」細囡即刻指住「小虎」話:「乜都幫晒媽咪……淨係識監視我…哼!我唔同你玩呀!擦鞋仔!」小虎即時搖頭擺尾,狂舐細囡腳趾,細囡即時心軟話:「乖啦!乖啦!家姐比狗餅你食,好冇!」


腐乳通菜(細囡至愛)


冬瓜支竹炆排骨(老公至愛)


榨菜蒸牛肉餅(大囡至愛)


晚餐

     2-6-2010  



今日要陪Leo出花園街攞窗簾布,所以無出街買餸。見雪櫃仲有隔夜餸酸豆角肉碎係到,一於加啲椰菜和粉絲落去一齊煮,再開多2罐罐頭撐場,又可以攪掂一餐啦!


清炒黃芽白


椰菜粉絲燴酸豆角肉碎(全家至愛)


豆豉鯪魚(細囡至愛)


煎午餐肉(大囡至愛)


2010年6月11日 星期五

班蘭豆奶布丁

2-6-2010    



呢款布丁入口好滑溜,老公食完猛話:「好正呀!整多杯黎歎得唔得呀?」難得老細對豆奶唔抗拒,即到……………


晚餐

     1-6-2010  



細囡呢排食藥食到無晒胃口,一於整啲酸豆角,等細囡增添食慾!


酸豆角肉碎(兩個囡至愛)


椰菜炒漢堡扒(細囡至愛)


紅腸蔥粒炒蛋(大囡至愛)


2010年6月10日 星期四

朱古力百福豆腐凍(附加食譜)

    1-6-2010    


呢款朱古力豆腐凍,我用黎答謝大囡呢輪不辭勞苦幫細囡溫習英文期考範圍、0raI和普通話口試。大囡那份堅持誠懇態度,真是很值得獎勵!一攞出黎大囡就話:「乜百福出左朱古力豆腐呀?」我笑住話:「我見到bIog友為食茄菲整左,咪跟佢整囉!」大囡食完就話:「好似朱古力味濃得滯……可唔可以減減分量呀!」食家出到聲,在下一定遵命!


朱古力百福豆腐凍


材料:豆腐100g、豆奶220g、砂糖35g、蜜糖25g、朱古力奶80g


   魚膠粉9g、水40g、可可粉8g


做法:1.豆腐、蜜糖用打蛋器打碎。


    2.豆奶、朱古力奶、砂糖、可可粉用細火煮至糖溶。


    3.魚膠粉加水拌勻後,隨即倒入豆奶內拌勻,再下豆腐碎拌勻,


  再開細火煮至微滾,熄火。


    4.隔篩2,放涼,倒入模內雪3小時即成。



晚餐

  31-5-2010

   


夏天一到,啲鬼鼠肉無所遁形,點遮都遮唔住,係時候的起心肝減磅啦!


黃芽白炒鹵肉絲(細囡至愛)


小棠菜扒瑤柱(大囡至愛)


清蒸頭鱸(細囡至愛)


生菜肉碎豆腐湯(自己至愛)


2010年6月9日 星期三

三角朱古力蛋糕(附加食譜)

  31-5-2010      



見個櫃有三角朱古力係度,又試試攞黎整蛋糕!食落啖啖三角朱古力,正!


三角朱古力蛋糕


材料:牛油60g、砂糖55g、鹽1g、蛋1隻、低筋麵粉110g


    可可粉12g、泡打粉3g、牛奶60g、三角朱古力2(切碎)


做法:1.牛油、鹽和砂糖打至鬆發。


    2.3次下 蛋打勻。


    3.篩入粉類拌勻,再下牛奶拌勻,再下三角朱古力拌勻。


    4.倒入杯內至8成滿,180度焗15分鐘即成。


 


晚餐

    29-5-2010   



大囡想聽日生日party靚靚示人,央求我帶佢做負離子,既然你肯扮靚靚,媽咪又點會唔樂意奉獻金錢呢!細囡又話要轉新形象,卒之又要係髮型屋放低$600!


蒜蓉炒菜心


四季豆炒鹵肉(兩個囡至愛)


豉油雞(兩個囡至愛)


爆谷米開心果燕麥曲奇(附加食譜)

     

29-5-2012奶奶今日係深圳落黎,我又要趕工整曲奇啦!因為叔仔一家好鐘意食我整嘅曲奇,所以我次次都順便托奶奶拎上去。呢款曲奇好鬆化,老公食完一塊呆坐梳化上,默不作聲,我問老公:「味道如何?」老公話:「咁細塊點試得出呀!拎多2塊黎就肯定試得出啦!」我即刻話:「咁即係好味啦!」老公話:「仲駛講可止好味呀!直情「掂」啦!」

爆谷米開心果燕麥曲奇

材料: 牛油70g、砂糖30g、黃糖30g、蛋半隻、燕麥片25g

低筋麵粉120g、梳打粉2g、泡打粉1g、開心果25g、爆谷米25g

做法:

1. 牛油、砂糖和黃糖打至鬆發。

2.分2次下蛋打匀。

3.篩入粉類拌匀,下燕麥片、開心果和爆谷米入內拌匀,搓成麵糰。

4.分成15g一粒,搓圓微微壓平,用180度焗15分鐘,放涼即成。


2010年6月8日 星期二

南瓜黑櫻米蛋糕(附加食譜)

  29-5-2010   



呢款蛋糕好鬆軟,加上南瓜嘅香濃,確實好味!


南瓜黑櫻子蛋糕


材料:牛油55g、砂糖45g、蜜糖20g、蛋1隻、低筋麵粉110g


    泡打粉3g、牛奶30g、南瓜蓉100g、黑櫻米10g


做法:1.南瓜去皮切粒,用中火叮3分鐘,壓成蓉備用。


      2.牛油和砂糖打至鬆白。


3.3次下蛋打勻。


      4.篩入粉類拌勻,下牛奶拌勻,再下南瓜蓉和黑櫻米拌勻。


      5.放入杯內至8成滿,180度焗15分鐘,放涼即成。


 


榛子夏威夷果仁曲奇

    28-5-2010  


呢款曲奇較鬆脆,入口有淡淡榛子香,加埋夏威夷果仁嘅甘香,大囡猛話:「好味……」


雪梨大菜糕

  28-5-2010  


哈哈!又到我鬼靈精出現啦!今次嘅目標係…雪梨!我又叫老公估下今次係用乜整大菜糕?老公食完話:「爽爽地……馬蹄!」我話:「你鐘意馬碲呀?我下次整比你食呀!錯………」老公即刻話:「開估…」我話:「係清潤爽甜多汁嘅……雪梨囉!」老公深深不忿話:「乜你乜都攞黎整大菜糕架!」我話:「唔得咩?」老公即時話:「得…老婆大人話乜都得……最緊要你有興緻整比我食,係我嘅榮幸………」算你識do,唔同我抝!