2010年7月30日 星期五

紅茶黑芝麻南瓜籽燕麥曲奇@(附加食譜)

   



23-7-2010「小虎」而家好百厭呀!拉住張枱布,攪到跌爛左隻碟,正一麻煩友!我罰佢抆耳仔!呢款曲奇好鬆脆,不過紅茶味唔夠香,下次要加多1個茶包先得……不過,大囡都話:「好食…」


紅茶黑芝麻南瓜籽燕麥曲奇


材料: 牛油85g、砂糖65g、蛋1隻、牛奶30g、紅茶2包


低筋麵粉100g、燕麥片25g、梳打粉3g、黑芝麻10g、南瓜籽60g


做法:


1. 牛油和砂糖打至鬆發。


2.分3次下蛋打匀。


3篩入粉類拌匀,下燕麥片、黑芝麻加南瓜籽拌匀,搓成粉糰。


4.輾平壓印圖形,在刀仔壓印條紋,180度焗15分鐘,放涼即成。


芝麻綠豆椰汁撈

     22-7-2010   



老公晏晝打返黎問我:「鄒小姐,l998年你係咪係石硤尾間東亞銀行開左個保險箱呀?」我話:「好似係呀!仲咩呀?」老公即時話:「好似……咁你個保險箱入面仲有有無野呀?」我話:「真係唔記得喎!」老公話:「啱啱東亞打黎話咁多年都聯絡唔到你,而家請你盡快去攪清楚,仲有記唔記得number同埋條鎖匙係唔係到…」我話:「點會搵我唔到呀!我都無改過手提電話,number梗係唔記得啦!鎖匙真係唔知去左邊喎!」老公話:「我真係比你激死!唉…而家有又好,無又好,總之你就覇左個保險箱12年,我唸一定要比番啲錢銀行架啦!」我話:「吓!咁點計呀?」老公話:「所以咪要去偈囉!咁唔知鄒小姐你幾時方便一齊去呢?」我話:「等我睇下個時間表先…」老公即時話:「你有無咁busy呀!大忙人……係咁啦!今晚好比個日期我呀!」就收左線啦!自己坐係度唸都覺得自己有少少唔啱,連呢啲咁重要嘅野都忘記,又難怪老公咁忟憎!唯有將功補過,整啲甜品氹番老公先得!我將啲芝麻果凍切成粒粒,再加啲綠豆、椰漿、蜜糖落去,老公食完笑笑口話:「我以為係涼粉呀!原來係芝麻,撈埋啲綠豆一齊食,又幾正喎!」Yeah!老公笑番啦!


2010年7月29日 星期四

紫菜榛果朱古力曲奇(附加食譜)

      


22-7-2010而家啲天氣好鬼熱,一出街已經成身汗,紙巾、水、扇永不離身。返到屋企即刻冲個凍水涼,跟住開冷氣嘆雪條,再午睡片刻,真係爽爆呀!呢款曲奇有紫菜嘅香、又有榛果嘅香,加埋香甜嘅朱古力,一啖一個,話咁快就清晒啦!


紫菜榛果朱古力曲奇


材料: 牛油55g、糖霜50g、蛋黃1隻、紫菜碎10g、雲呢拿油2滴


低筋麵粉80g、粟粉20g、梳打粉2g、榛果粒35g、朱古力粒


做法:


1. 牛油和糖霜打至鬆發。


2.下蛋黃打匀,下雲油打匀。


3篩入粉類拌勻,下紫菜碎和榛果粒拌匀成麵糰。


4.分成10g一粒搓圓,放上朱古力粒,180度焗15分鐘,放涼即成。


鮮茄雞絲湯烏冬

     22-7-2010   




呢次個湯底好濃郁,我加左3個番茄、半個洋蔥、半個椰菜、三色椒各半個落去做湯底,加埋雞絲同烏冬,連湯飲真係好飽呀!再加埋杯椰汁珍多冰,呢個午餐好豐富呀!


椰汁珍多冰

22-7-2010

   




今日約左阿媽、Leo去荃灣行街,跟住去左尚賓樓飲茶,然後陪阿媽去四千金買K金頸鍊。跟住搭小巴去天后蘋果商場,Dada表妹間塔羅鋪頭,希望塔羅牌能夠幫阿媽解決煩憂,能夠有個指引比阿媽去做判決。我第一次認識塔羅牌,發覺都幾準喎!跟住老公車我地返屯門去海覇食飯。呢杯珍多杯我加左椰漿粉、蜜糖和椰漿落去,飲落特別濃郁美味………


2010年7月28日 星期三

黑白朱古力曲奇

21-7-2010    



今日去九龍香格里拉食自助餐幫肥cat慶祝生日,我發覺香港啲自助餐款式唔夠深圳多,兼且價錢貴,真係唔夠深圳抵食。我食過「四海一家」勁大勁多野食,格調又好。「領先」普普通通,但係都勝過香港。「品串」食鐵板自助餐,勁抵勁多野食。跟住直踩落樹熊新居「蔚景園」,玩真人撲克show,玩到3點幾先散場回家。呢款曲奇好香脆,我用左黑朱古力餅碎,再加白朱古力,味道好香!大囡猛話:「正食到不得了…」


晚餐

     20-7-2010  



今日帶兩個囡去富泰邨鄰舍輔導會做義工去探訪獨居老人,每次帶兩個囡去探訪,目的都係想兩個囡能夠從中領略做人要知足常心、要關懷長者、要服務社會、要孝順父母……


蠔油炒西蘭花(自己至愛)


五香玉丁蟹柳雜炒飯(兩個囡至愛)


炸奶皇飽(老公至愛)


蒸小籠包(兩個囡至愛)


蘿蔔絲煎餅(老公至愛)


芝麻果凍

      20-7-2010



今日同大囡去正豐買書,今年又要$2842!拎到我同大囡死死下!呢款果凍有濃濃嘅芝麻香,細囡勁鐘意………


2010年7月27日 星期二

晚餐

 19-7-2010    



個胃仲有啲痛,煲啖粥食算數………


蝦仁火腿炒麵(兩個囡至愛)


白粥(拌咸蛋)(自己至愛)


蒸雞蛋饅頭(老公至愛)


馬拉盞炒椰菜(細囡至愛)


煎韓國粉絲春卷(全家至愛)


茘枝甘露

19-7-2010   



老公又買左荔枝返黎,今次就試整荔枝甘露啦!我加左椰果、西米、荔枝、砂糖、花奶和荔枝果汁落去,簡單又美味……


鮑魚汁炆花生雞腳

18-7-2010   



點解老豆錯完一次又一次?點解一次又一次傷阿媽個心?老豆究竟你幾時先醒覺?做人兒女只想見到父母生活無憂、開心寫意、老來相依……見到阿媽落淚自己真係好心噏!呢碟雞腳老公大讚好味,猛話:「啲花生唔會太稔,又入味,正…」老公仲即刻開罐啤酒,一邊飲一邊食雞腳。三父女將兩磅雞腳話咁快就拆晒。大囡仲話:「呢餐宵夜好正,兼且可以一嚐啤酒滋味,爽呀!」






2010年7月26日 星期一

晚餐@

  17-7-2010        





而家我晚晚都會烚幾條菜比「小虎」食架!因為兩個囡投訴佢朝早起身個口好臭…


節瓜粉絲火腿蝦米(自己至愛)


白菜仔炒魚片(細囡至愛)


韮菜花炒蜆肉(大囡至愛)


排毒袪濕茶(細囡至愛)


金莎朱古力曲奇(附加食譜)

    

17-7-2010見大囡食金莎,又手痕攞左5粒黎試下整曲奇,估唔到味道好好!呢款曲奇好甘脆,入口有花生碎同榛果碎,真係好香!老公食左一啖,即刻再叫:「唔該,醒多2塊黎食呀!」兩個囡都話:「好好味!不如下次用三角朱古力呀……」呢個提議唔錯唔錯,可以考慮!




金莎朱古力曲奇


材料:牛油55g、糖霜45g、蛋白1隻、低筋麵粉95g


     粟粉25g、泡打粉2g、雲呢拿油2滴、金莎5(壓碎)


做法:1.牛油和糖霜打至鬆白。


     2.3次下蛋白打勻。


     3.篩入粉類拌勻,下金莎拌勻,搓成長方形放入雪櫃雪至硬身。


     4.即出,切件。用180度焗15分鐘,放涼即成。


 


2010年7月25日 星期日

日式燒餅+鮑魚撈麵

    17-7-2010  



突然唸起仲有啲燒餅粉,一於加啲椰菜、粟米、蟹柳和蝦米一齊煎,再加鮑魚撈麵又成為今日午餐啦!


晚餐@

     15-7-2010    




「小虎」呢三日已經甩左7隻牙仔啦!而且啲毛色仲開始變色添!


香腸肉絲炒烏冬(兩個囡至愛)


咸雞粥(老公至愛)


香煎蔥油餅(老公至愛)


蠔油菜心(自己至愛)


椰皇燉蛋白鮮奶(附加食譜)

    15-7-2010    



今日見街巿買10蚊4個椰皇,突然唸起之前係嘉韻酒家食椰皇燉蛋白鮮奶要成28蚊個,一於又試下自己整先得!唔駛25分鐘就有熱辣辣嘅燉奶食啦!啲燉奶好滑、好香、好正呀!兩個囡一路食一路豎起手指公猛話:「好好食!好正………」連老公都話:「不枉我咁辛苦幫你開椰蓋呀!真係令人食過番尋味呀!正…」


椰皇燉蛋白鮮奶


材料:蛋白2隻、鮮奶235g、砂糖25g、椰皇1


做法:1.椰皇放水,削去頂部。


    2.鮮奶和砂糖放入微波爐叮3分鐘,至糖溶。


    3.下蛋白拌勻,隔篩2次。


    4.將鮮奶漿倒入椰皇內,蓋上微波爐保鮮紙,


   隔水蒸25分鐘即成。


 


2010年7月24日 星期六

柚子蜜開心果曲奇(附加食譜)

       

15-7-2010呢款曲奇好鬆脆,入口有濃濃嘅柚子蜜,加埋開心果,味道好特別!不過,細囡就唔多Iike it………

柚子蜜開心果曲奇

材料: 牛油80g、糖霜40g、蛋1隻、柚子蜜25g

低筋麵粉120g、開心果65g

做法:

1. 牛油和糖霜打至鬆發。

2.分3次下蛋打匀,再下柚子蜜打匀。

3篩入粉類,加入開心果拌匀。

4.搓成正方柱體雪至硬身,切片用180度焗15分鐘,放涼即成。


2010年7月23日 星期五

荔枝沙冰

  15-7-2010   


用左成20粒新鮮荔枝黎整呢杯沙冰,飲落特別清甜!又凍又爽,飲完真係涼透心!


燒雞脾沙律(附加食譜)

15-7-2010    



見bIog友雀后整左燒雞脾,自己又手痕跟住整!今次沙律我加左青瓜、薯仔、紅蘿蔔、椰果和青蘋果落去,再加埋杯荔枝沙冰,呢個午餐真係好…正呀…


燒雞髀沙律


材料: 雞髀4隻


醃料: 叉燒醬2湯匙、海鮮醬1湯匙、生抽和老抽各1湯匙、糖半湯匙、粟粉少少


做法: 將雞髀中間近骨位界開少少,用醃料醃雞髀2小時或以上;


  預熱焗爐220度15分鐘,焗雞髀50分鐘,中途反轉焗至兩面金黃色。


金柚絲大菜糕

14-7-2010   



老公今日放假,先帶兩個囡去元朗做護照,跟住去屯門海覇飲茶,再去新墟睇「葉問前傳」,然後去荃灣四千金買K金頸鍊,點知又比我昅中左隻心形鑽戒,老公話:「鐘意咪買囉!」有邊個女人唔鐘意鑽石呀!梗係鐘意啦!終於…隻鑽戒梗係帶左係我手上啦!有收穫心情自然特別好,老公話想食打冷咪食打冷囉!老公咁抵錫,抵我落足心機慢慢搣金柚絲黎整大菜糕,老公一食就話;「啲金柚好甜好多汁……好食喎!」


2010年7月22日 星期四

晚餐@

      13-7-2010   




「小虎」而家啲跳彈力勁好,話咁快就跳到上梳化啦!


豆角炒麻辣肉絲(細囡至愛)


椰菜花煙肉(大囡至愛)


海鹽焗大眼雞(兩個囡至愛)


2010年7月21日 星期三

車厘子大菜糕

      13-7-2010   


老公估野真係好差,一食仲大大聲話:「提子……」即時又引到兩個囡哈哈大笑!我發覺大菜糕配乜都好美味!


大食會

13-7-2010  


6點半就起身幫細囡預備大食會之食物,今次整左2磅咖喱魚蛋、l2杯牛油粟米、炸魚條1打、椰纖果大菜糕18件和2筒巨浪切薯片,希望啲同學仔食得開心啦!


2010年7月20日 星期二

晚餐




點解兩個囡越大越唔注重自己嘅儀容呀!成日要我叫先護理下啲皮膚,激死我啦!


豆豉三色椒炒雞(老公至愛)


腐乳通菜(細囡至愛)


豆角火腿炒蛋(大囡至愛)


X0醬炒黃芽白(自己至愛)


蠔豉螺頭魚鰾雞腳豬骨湯(老公至愛)


蜜汁叉燒熱狗

      12-7-2010   



今次我將啲叉燒撈埋叉燒醬一齊炒,再夾埋熱狗包一齊食,再加多杯粒粒橙汁,真係好滋味呀!大囡食完話:「今日呢個下午茶餐好豐富呀!正……」


蠔豉螺頭魚鰾雞腳豬骨湯

12-7-2010    



我仲加左日月魚同埋黨參落去一齊煲,啖湯好甜呀!


2010年7月19日 星期一

雲呢拿棉花糖


今晚大囡想睇世界盃決賽戰,不停苦苦央求老公仲話:「4年先一次,比我睇啦!我同你一樣都支持西班牙架!」終於梗係大囡得米啦!呢款棉花糖應該係失敗品,因為我做漏左l個步驟,所以啲蛋白同魚膠粉混合唔到形成左兩層……好彩啲味道都好好,大囡仲一邊睇波一邊棒住黎食……猛話:「好味呀!」我食左2嚿就收口啦!因為真係用太多糖整啦!想減肥真係唔好食呀!


暖薑豆奶布丁

     11-7-2010     



前幾日係佳寶見到呢支暖薑豆奶買$5元3支,咪買黎試下囉!一開蓋已經聞到啲薑味,入口又唔會辣喉。即刻攞2支黎整布丁,入口好滑,味檤唔錯!


粢飯

10-7-2010



今日買左油炸鬼返黎即刻開工整粢飯,原來唔難整架!兩個囡異口同聲話:「嘩!好多料呀!」大囡食完話:「我以後唔係街買粢飯食啦!又少料又唔好味…」老公即刻話:「吓,你咁講媽咪以後咪好忙……」


2010年7月17日 星期六

黑糖栗子

     10-7-2010     



見包黑糖仲有兩日就到期,就加啲粟膠落去一齊煮糖漿黎燴栗子,一磅半栗子話咁快就沽清啦!大囡非常之鐘意食………


紅茶葵花籽曲奇(附加食譜)

17-7-2010而家晚晚都陪老公睇波,見有時間即刻係冰格攞條存貨出黎整曲奇。室油解凍10分鐘後,切片入爐焗,15分鐘後已經有香噴噴嘅曲奇食啦!老公話:「食得啦!咁快……」跟住就攞左塊黎食,仲話:「又幾香喎!好鬆脆…唔錯…好味!」細囡本身好鐘意紅茶嘅香味,所以猛話:「好食……」

紅茶葵花籽曲奇

材料: 牛油65g、糖霜50g、牛奶30g、蛋半隻、栗粉30g

低筋麵粉90g、梳打粉2g、紅茶茶包2包、葵花籽40g

做法:

1. 牛奶叮熱加入茶包焗半小時,放涼備用。
2.
牛油和糖霜打至鬆發。

3.下2次下蛋打匀。

4.篩入粉類拌匀,下牛奶和葵花籽入內拌匀。
5.搓成長方柱體雪至硬身,切片,
180度焗15分鐘,放涼即成。


晚餐

     9-7-2010    



今日返學校做頒獎嘉賓,由8:45分直踩至11:45分,真係握手都握到手軟,仲有笑到個嘴都硬晒。放學又嗱嗱林帶細囡做牙科保健,攰足成日又偷懶煲粥食算數……


冬菜蝦米肉碎粥(自己至愛)


沙茶菜心牛肉撈河粉(大囡至愛)


煎餃子(細囡至愛)


客家茶果(老公至愛)


2010年7月16日 星期五

海苔脆餅(附加食譜)

    

8-7-2010今日帶兩個囡去覆診牙,大囡今次將牙線轉做粉藍色,睇落去無咁明顯。呢款脆餅好香紫菜味,好脆口!

海苔脆餅

材料: 牛油溶液50g、糖霜50g、蛋黃2隻、牛奶40g、雲呢拿油2滴

低筋麵粉80g、梳打粉2g、海苔粉15g

做法:

1. 蛋黃和糖霜打至鬆發。
2.下雲呢拿油打匀。

3.篩入粉類拌匀,下牛奶和海苔粉拌匀。

4.放入唧袋唧出形狀,180度焗15分鐘,放涼即成。


晚餐

     7-7-2010    



而家天氣真係好熱,煮餐餸啲汗係咁流,真係乜胃口都無晒!


金蒜白菜仔


咖喱洋蔥粉絲豬頸肉(大囡至愛)


薑蔥辣倉魚(兩個囡至愛)


蛋花馬蹄露@

     6-7-2010    






唔知有無bIog友隻dogdog會食便便呢?我隻「小虎」自從呢兩日食完杜蟲藥後,痾完啲便便都食番呀!救命呀!點解會咁架?而家我地採取人釘狗措施,睇住「小虎」唔比機會佢再eat臭臭。真係好奇怪!平時大囡唔鐘意食馬蹄,但係煲馬蹄露佢又勁鐘意食喎!連大囡自己都覺得奇怪!馬蹄多汁又甜又爽,熱食真係好好味呀!


2010年7月15日 星期四

晚餐




今日細囡學校家長日攞成績表,正當步行至3樓遇見羅老師,羅老師突然行前問我:「黃太,點解你咁多年都咁靚架?有無秘決教下我呀?」我即刻話:「羅老師,我仲未攞成績表喎!你就氹我開心。」再步行至4樓又見到易校長,易校長話:「副主席,每次見到你,我都會心情特別輕快!」我問:「點解呀?」昜校長話:「因為有靚女睇囉!」我馬上話:「校長,你太誇獎我啦!」面帶笑容步行至6樓時遇見周老師,周老師話:「黃太,識左你7年點解你仲可以keep得咁fit咁青春架?」我話:「因為見得你地班老師多囉!」唔知係咪比人讚得多呢?當收到細囡張成績表知道再次退步時,自己竟然可以用平常心去理解,細囡有手眼不協調和隱性外斜視的問題出現,而且成績中規中舉,我還想奓望細囡點呢??


青椒甘荀炒肥牛(老公至愛)


粟米雞粒扒豆腐(全家至愛)


蠔油生菜炒墨魚片(細囡至愛)


青紅蘿蔔粟米栗子雪耳豬骨湯

      5-7-2010



呢啖湯好甜呀!我再加左南北杏同埋幾粒蜜棗落去煲,兩個囡一人飲左3碗……


晚餐

    5-7-2010    




老公唔知仲乜,一返黎就猛話:「好肚痛…」仲連飯都無食,就撻係梳化度瞓。我冲完涼出黎細囡話:「媽咪,你快啲睇下爸爸啦!爸爸皺晒眉頭,好似好辛苦呀!」我即刻問老公點,老公叫我快啲換衫陪佢睇醫生。細囡猛同我講:「我好驚呀!爸爸有無事架?」我話:「唔駛驚,媽咪同爸爸睇完醫生就返,你瞓先啦!」醫生話:「食錯野,腸胃炎…」返到屋企細囡即刻開門迎接,仲問:「爸爸你仲痛唔痛呀?」跟住仲幫老公唧牙膏執床比老公瞓覺。雖然細囡成日都攪到我同老公好勞氣,但有時又好識關心人!


X0醬西蘭花蝦仁(自己至愛)


芽菜扒木耳豬腩肉(兩個囡至愛)


酸辣魚柳(細囡至愛)


青紅蘿蔔粟米栗子雪耳豬骨湯(全家至愛)