花膠鮑魚黨參豬展湯

      24-8-2010  

執天台個雪櫃冰格先發現呢15隻鮑魚仔,一於清埋佢。我加左元肉、淮山和瑤柱落去煲,已經又甜又滋補!兩個囡仲將啲花膠同鮑魚蘸豉油,食到乾乾淨淨………

晚餐(附加食譜)

23-8-2010    

今日見百佳兩條秋刀魚$10,粗膽膽買返黎煎,又得喎!(一啲都唔腥)兩個囡猛話:「正……好食……」

腐乳雲耳蒸雞(細囡至愛)

辣醬炒蕃薯苗(老公至愛)

鹽燒煎秋刀魚(細囡至愛)

花膠鮑魚黨參豬展湯(兩個囡至愛)

腐乳雲耳蒸雞

材料:鮮雞1隻、雲耳、薑絲

醃料:雞粉和砂糖各1茶匙、生抽、紹興酒和生粉各1湯匙

    麻油半茶匙

調味:腐乳7件(壓蓉)、腐乳汁1湯匙、砂糖1茶匙匙

做法:1.雞洗凈斬件,加醃料醃1小時後,加入調味拌勻

    2.雲耳浸軟,去蒂切件揸乾水。

    3.隔水蒸20分鐘即成。

韓式班戟

     23-8-2010

呢包班戟粉之前係吉之島超巿見減價就買包黎試試,我加左1隻蛋、椰菜、蔥段、蝦仁、粟米、蟹柳同埋3湯匙白飯落去煎,再加啲燒汁同沙律醬,確實好香口!再加杯提子沙冰就成為今日嘅午餐啦!

香蕉黑芝麻蛋糕

      23-8-2010   

而家熱天啲香蕉唔知係咪焗得滯,好鬼快熟,太熟兩個囡唔鐘意食,唯有又攞黎整蛋糕。呢款蛋糕加左黑芝麻,簡單得黎又好味,一出爐又食晒啦!!!

工具

  22-8-2010  

尋日又比老公點左我一鑊,明明話6點返到黎屯門,仲話叫我坐順風車,卒之成8先蒲頭,累我行到腳仔痛。無理有企係度乾煎苦等架!就去25樓逛逛,又比我買到以下工具,最開心係比我係快圖美昅到呢部$149雪糕機,(因為我本人幾鐘意「憶世通」嘅產品)所以即時棒左佢返屋企玩………

鵝蛋形蛋糕模 $4(1個)

心型蛋糕膜 $3.5(1個)

生日牌 $1.5(1個)

榨菜肉碎過橋米線

     22-8-2010   

之前係東門百佳買左pack過橋米線返黎,湯底的確唔錯。今日我加左搾菜肉碎一齊煮,簡簡單單,真係好食到停唔到口………

朱古力萬壽果仁蛋糕仔

22-8-2010   

見仲有萬壽果仁少少係度,今日實行清埋佢!呢款蛋糕外脆內軟,一啖一囗,yummy………

時菜牛肉伊麵

    21-8-2010  

救命呀!一起床雙腳痠痛到痺,連pat pat都揪住痛,右肩痛到刷牙都痛,喉嚨又乾又涸。尋日做阿四不特止,仲要攪到七癆八傷,呢次真陰公!嗱嗱聲攞啲按摩膏黎捽,再加貼麝香鎮痛貼救下命先得!周身背痛,簡單整款伊麵比兩個囡食,再加杯水蜜桃沙冰,兩個囡已經好開心……

水蜜桃沙冰

     21-8-2010   

見雪櫃有水蜜桃係度,又切左大半個黎整沙冰,飲完即時精神晒………

巨峰提子果凍

     20-8-2010  

 

今日同二家姐和阿哥工人3條友帶6個豆釘去海洋公園「夏水禮」玩!由朝早10點玩到9點,真係成身散晒!不論腳力、腰力、眼力、體力、毅力、耐力和戰鬥力,全部都唔及呢班活躍鬼勁,玩到我聲沙頭脹,老眼昏花不特止,仲要比佢地用水槍黎圍攻,射到眼到睜唔開,唔知吞左幾多啖水落肚……雖然真係好攰,不過確實係越玩越開心!淨係玩攤位遊戲,都玩左8張紅衫魚,取得19隻公仔,皆大歡喜,人人有份,永不落空。又手痕痕同細囡齊心合力整左呢個沙樽仔!食M記食左$380,班大食獸都話未夠飽!跟住返屯門去新墟食四川野埋單$610,加埋朝早食早餐$210,仲未計門票,咁又唔見左$3700啦!果凍真係百食不厭,加上花奶同粒粒提子,真係好好味呀!!

晚餐

     19-8-2010   

究竟乜事呢??一唔開冷氣就天旋地轉,一開冷氣就精神奕奕,睇黎下個月電費單黎必定過3字頭……唉…想節約能源環保啲都唔得………

鮑魚汁炆雞翼尖(老公至愛)

西蘭花鮮魷(大囡至愛)

粟米魚柳(細囡至愛)

紫菜肉碎豆腐湯(老公至愛)

萬壽果仁香蕉蛋糕

     19-8-2010    

見包萬壽果仁快將到期,又見有條熟到爛嘅香蕉係度,就合拼黎整蛋糕啦!焗完啲萬壽果好香脆呀!唔錯…唔錯……

工具

     19-8-2010  

今日同細囡做完身體檢查後,企係街度感到天旋地轉,即刻入7仔買思樂冰飲,見隔左一陣無咁暈,就硬住頭皮搭車出荃灣7樓橘子交錢學脆皮奶皇月餅課程,親子班加$50埋單$330,跟住就入貨和買左以下工具,又盛惠$370………

月餅模   $10(1個)

曲奇模 $20

鳳梨卷 $32

朱古力棒 $20

鳳梨酥模 $35(10個)

黑椒肉絲三色螺絲粉

  19-8-2010    

呢排係超市入左好多粉麵,個櫃塞到滿滿,咁就唯有密密清,密密煮粉食!今日好懶淨係加肉絲落去煮,不過就加左勁多黑椒落去,食到細囡猛飲水,仲話:「好辣……不過好過癮…好正呀!」

蜜糖李大菜糕

  18-8-2010  

尋日老公買左2磅蜜糖李返黎,甜到漏,唔駛一陣已經掃晒!!今日再叫老公買多3磅黎食,一於又攞啲黎整大菜糕,真係又爽又甜呀!

晚餐

     18-8-2010   

老公今晚要去開會,依然個頭暈到爆燈,煲粥食先數……

雪菜火鴨絲炆米(自己至愛)

皮蛋瘦肉粥(大囡至愛)

腐乳通菜(細囡至愛)

雙重芒果蛋糕(附加食譜)

18-8-2010

成晚都心掛住細囡,怕佢食唔飽。今朝起床即刻開工整呢款蛋糕比細囡食,今次我加左水仙芒果醬同埋芒果乾落去,食落特別香濃美味,細囡食到嘴Lam Lam,大囡就話:「我無野講囉!真係正到爆囉!」

雙重芒果蛋糕

材料:牛油75g、砂糖65g、蛋1隻、牛奶40g、低筋麵粉125g

    泡打粉3g、芒果乾3塊(切碎)、芒果茸40g

做法:1.牛油和砂糖打至鬆發。

    2.分3次下蛋打勻。

    3.篩入粉類拌勻,下牛奶、芒果茸和芒果粒拌勻。

    4.倒入杯內至8成滿,用180度焗20分鐘即成。

 

鱈魚豆腐牛肉烏冬

    8-17-2010   

細囡今日參加小學生領袖訓練計劃二日一夜鯉魚門渡假村畢業營,個頭又脹又暈,今晚唔煮飯,煲烏冬食當一餐。我加左生菜、墨魚丸、紅腸、甘荀和冬菜落去,大囡同老公話:「又豐富又飽肚…簡簡單單食得開心咪得囉!」

晚餐

     16-8-2010   

自己病左幾日,仲係好暈好暈!又唔想老公無飯落肚,就煮冬瓜湯粒飯加碟油菜算數。湯飯我加左蝦仁、冬菇、金華火腿、瑤柱、冬瓜粒、蟹柳、冬菜和瘦肉粒落去,啖湯好清甜,老公猛話:「好正……………」

冬瓜湯粒飯(老公至愛)

蠔油菜心(細囡至愛)

夏桑菊涼茶

     14-8-2010   

怕係海南島食得熱氣,一早吩咐工人煲定涼茶……材料:夏枯草、冬桑葉、菊花、黃豆………

海南島之旅

     11-8-2010      

   

呢次海南島之旅,行程不止輕鬆游閒,仲好自在添!(因為我地1行22人包團,吃喝玩樂全部自由選擇和決定,再加上入住三亞凱賓斯基五星酒店,零舍舒服寫意。)仲有日日都對住陽光與海灘,人都感到特別暢快………不過係最後一日,自己無鬼用,唔知食錯啲乜,肚痾左6次嘔1次,兼個頭暈到爆,真係有啲掃大家興,攪到個個都擔心!一落機即去睇醫生,原來係胃炎、胃抽筋、腸炎兼發燒感冒……