2010年9月30日 星期四

阿華田木糠布甸蛋糕(附加食譜)

     22-9-2010   



今日係中秋節,我在此祝願各位bIog友中秋節快樂,個個都人月兩團圓!食月餅個個都甜到入心,望月光個個都龍精虎猛………今日亦係我阿嫂(Karen)嘅生日,我尋晚整左呢個有13層嘅木糠蛋糕比佢,希望佢會鐘意!我在此祝願阿嫂身體健康、工作順境、事事如意、青春美麗……


阿華田木糠布甸蛋糕(6寸慕絲圈)


材料:餅碎120g、煉奶100g、淡忌廉480g、阿華田粉1


做法:1.餅碎和阿華田粉混合。


    2.淡忌廉打至企身,下煉奶打至軟滑,放入唧袋內。


    3.底層先舖上餅碎,唧上忌廉,再放餅碎,再唧忌廉,


    重覆此動作至滿身,冷藏3小時即可食用。



 


薑母糖湯圓蕃薯湯水

     22-9-2010  



每年中秋我到會買18種水果、月餅和燈籠,放係露台賞月光。一家人你一啖我一啖,真係又滋味又溫馨。再食埋呢款甜蜜蜜湯水,一家人自然團圓又團結。加左薑母糖落去煲,特別甘香味美!細囡食完話:「我抖多一陣,就再食多碗………」


杏仁糖粒曲奇

      21-9-2010    


呢款曲奇加左杏仁粉落去,食落特別香!再在面上加朱古力醬同糖粒,食落真係好正!大囡猛話:「好好味!」


2010年9月29日 星期三

手信

     21-9-2010   



樹熊啱啱去完星馬玩,買左呢2包小食請兩個囡食………


晚餐

     21-9-2010    












老公好好呀!今日幫我做柴可夫跑一轉沙田派月餅。呢2日老公已經幫我派左18盒啦!我先多謝各方好友對我的讚賞和鼓勵,明年我會再接再勵,繼續整更多口味給各位品嚐…………


雙冬枝竹炆燒肉(老公至愛)


蕃茄午餐肉炒蛋(兩個囡至愛)


清蒸黃花魚(兩個囡至愛)


紫菜魚蛋肉碎湯(老公至愛)


綠茶萬壽果仁曲奇(附加食譜)

    

21-9-2010今次轉用左另一隻綠茶粉,食落零舍香濃。兩個囡不停話:「好鬆化、好好味!」大囡仲不停豎起手指公讚好!連老友阿芳對綠茶抗拒,食完都話:「下次再整預埋我一份…」Joe Joe我用你送比我嘅杯墊黎影相,特別襯托得啲曲奇靚呀!

綠茶萬壽果仁曲奇

材料: 牛油60g、糖霜50g、蛋黃1隻、奶粉10g

低筋麵粉100g、抹茶粉15g、梳打粉2g、萬壽果仁

做法:

1. 牛油和糖霜打至鬆發。

2.蛋黃打匀。

3.篩入粉類拌匀搓成麵糰。

4.輾平壓印圖形,放上萬壽果仁,用180度焗15分鐘,放涼即成。



2010年9月28日 星期二

綠豆蓉月餅

21-9-2010    



之前個白蓮蓉月餅個個食完都話:「得……好味!」今日一於試用綠豆蓉整,不過無加咸蛋黃,又睇下味道如何!好友阿芳食完大讚:「好味!好香!唔甜!正……」阿嫂都話:「好好食……出年我要綠豆蓉多啲得唔得呀!」講到明,點可以話:「唔得呀!」


果籃

     20-9-2010    






每年老公公司都會收到3-4個果籃和十多盒月餅,老公會將啲月餅分晒比伙計,有淨先拎番黎屋企。呢個果籃最正就係啲水蜜桃好甜好多汁………


2010年9月27日 星期一

芒果蜜桃布甸

     20-9-2010  



細囡斿學返黎突然問:「點解你呢排唔整甜品嘅?」我話:「係喎!好似好耐無整……」細囡話:「可能呢排你太忙啦!」我話:「食少啲咪仲好,可以keep fit…」點知細囡話:「扭15分鐘扭拉圈咪得囉!」細囡此語難道仲有藉口推辭?拿林入廚房整左呢款布甸,既香又滑,自己都忍唔住食左2杯,細囡仲勁連吔左杯先收口…


晚餐

     20-9-2010



老公今晚開會唔返黎食,大囡又咳又流鼻水,煲粥食先數………


甘荀肉絲炆米(兩個囡至愛)


燒豬骨粥(全家至愛)


燒賣(自己至愛)


蠔油小棠菜(大囡至愛)


芝士蝦焗厚多士

     20-9-2010   









自從愛上左整野食之後,啲架生越置越多,左放右放攪到好煩!老公為左減輕我煩惱,特意將天台張梳化、地櫃和大牛龜電視棄掉,揾師傅做左2個櫃比我,連工包料$8400!再買左部26寸電視放上面,等我可一邊整野食一邊睇電視。我真係好開心呀!咁我可以準備睇麵包機啦!呢款多士加左芝士,真係正到不得了!咬落啲蝦又爽口,一人食兩塊都唔覺漏…………


2010年9月26日 星期日

冰皮月餅(三)

     20-9-2010



2400g冰皮月餅終於用晒啦!今年總共整左150個。今日整左3款味道!(一)藍色皮(蘋果紅茶)、(二)深紫色皮蕃薯配百香果軟心、(三)白色(雲呢拿油)栗子配朱古力脆珠…等。今次整冰皮月餅總結,奶皇和綠豆蓉餡,一定要打孖買,另外明年最好提前10日做,唔駛攪到自己咁忙!希望各方親友、朋友和老師收到會開心啦!千祈唔好嫌棄我這份少少心意……………


工具

     19-9-2010   











今日去完大頭姨丈度拜神,跟住就去橘子再入餡料,用再入多5塊月餅片,埋單$252!(點解又再入餡料呢?因為姪女一陣要黎屋企學整冰皮月餅)然後去左對面間台灣美食買左以下食品,蛤蜊湯塊老板娘介紹煲冬瓜湯放粒落去,會鮮甜好多!


香芋餡 $18


栗子餡 $25


班蘭蓮蓉 $25


綠豆蓉 $22


碳磽蕃薯 $20


蘋果紅茶 $30


朱古力餡 $39


朱古力脆珠 $23


寬粉 $12


黑豆抹茶粉 $5.5


蛤蜊湯塊 $11(6粒)




晚餐@

     18-9-2010   






呢隻「小虎」正一衰仔黎架!而家越黎越惡,一唔鐘意就E起棚牙扮惡嚇人,仲有一用手指指佢,就即刻發惡吠人,鬼咁惡死!我搶佢張紙巾,即刻咬左我一啖,咬到我隻手指流血,枉媽咪咁辛苦照顧你,(黃小虎)你無良心呀!唔懲罰你仲得了,一於罰「小虎」罰企…………


蒜蓉炒菜心(自己至愛)


麻婆豆腐(全家至愛)


絲瓜洋蔥雲耳炆魚鰾(大囡至愛)


2010年9月25日 星期六

黑糖薑汁菠蘿涼粉條

18-9-2010   



見兩個囡咁乖幫我手整冰皮月餅,一於整碗消暑嘅涼粉條比佢地嘆!我用二家姐之前係台灣買比我包黑糖做湯水,再放啲薑汁同菠蘿拌食,真係好爽呀!


冰皮月餅(二)

     18-9-2010  



今曰整左4款味道嘅冰皮月餅,有翠綠色(班蘭油)皮蜜瓜配芒果軟心、紫色皮(香芋油)朱古力配白朱古力脆珠、淺綠色皮(綠茶油)北海道牛乳配藍莓軟心、白色皮(雲呢拿油)奶皇配麥提莎……等,今日一共做左58個!亦都要多謝兩個囡的幫忙,唔駛3個鐘就搞掂……


時菜排骨波菜麵

    18-9-2010    



我去親餐廳食飯都一定會叫時菜排骨飯食架!今日改用波菜麵,味道一樣咁美味,真係食極都唔厭………


2010年9月23日 星期四

晚餐

17-9-2010   



老公今晚約左雞批成班老友返大陸食飯同揼骨,見雪櫃仲有成碗咸蛋白係度,就煲白粥食啦!仲有而家晚晚都同兩個囡玩一陣親子遊戲,兩個囡先肯乖乖上床瞓!就係玩sit up包剪揼啦!一路做sit up一路猜包剪揼,既好玩又能keep fit,所以我幾攰都樂意同兩個囡玩架!


豬頸肉炒波菜麵(兩個囡至愛)


瑤柱白粥拌咸蛋白(細囡至愛)


潮州粉果(細囡至愛)


蠔油芥蘭(大囡至愛)


冰皮月餅(一)

     17-9-2010  



今日先做三款冰皮月餅!(一)黃色皮配黑芝麻水蜜桃軟心餡(二)朱古力皮配綠茶芒果軟心餡(三)粉紅色皮配橙酒粒粒紅豆餡…今日總共做左40個。好彩有兩個囡幫手抨餡和包餡,我先可以咁快手完成咋!不過聽日要拿拿聲入多個電子磅返黎先得………


bIog友之禮物

      16-9-2010    


收到啦!收到bIog友Joe Joe郵寄比我嘅杯墊啦!其實我只係問下Joe Joe係邊度有得買啲咁靚嘅杯墊,佢竟然即刻話郵寄比我,真係開心C我!Joe Joe你等我桶酸豆角回來之日,便是你我見面之期,真係好期待與你見面呀!


2010年9月22日 星期三

晚餐(附加食譜)

     16-9-2010    



今日呢個魚批係跟bIog友雀后整架!(真係正到無得頂呀!)啲魚柳滑到不得了!兩個囡猛話:「以後煮呢個餸要煲多啲飯先得…實在太好味啦!」今日我買唔到波菜改用左油麥菜,薯蓉我無用牛奶改用左淡忌廉,芝士碎用晒改用左芝士片3片,無海鮮忌廉湯改用左雞粒忌廉湯,我又再加左甘荀絲同粟米落去一齊焗,真係好正!最錯有錯着係我唔記得將啲魚柳同蝦仁索乾水,攪到一畢就水汪汪,但係可以當埋湯飲撈飯一流,真係so good………另外整月餅整左好多咸蛋白係度,唔想掉就用黎蒸肉餅啦!估唔到鬼死咁野食……


芝土薯蓉蝦仁焗魚批(兩個囡至愛)


蒜蓉白菜仔(自己至愛)


咸蛋白蒸肉餅(兩個因至愛)


芝士波菜薯蓉焗魚批


材料: 魚柳2大塊、蝦仁1盒、薯仔4個、菠菜半斤、金寶蘑菇湯1罐、


 牛油、鮮奶少許和芝士碎


調味: 鹽、胡椒粉


做法:1. 魚柳和蝦仁解凍後用鹽和胡椒粉醃。


 2. 薯仔烚熟後加鹽、牛油和鮮奶少許搓成薯蓉。


 3.菠菜洗淨後切碎。


4.金寶湯加半碗水煮滾備用。


 5.先將魚柳、蝦仁放在焗盆內,再加菠菜上面,淋上蘑菇湯,


    最後將薯蓉和芝士碎放在魚批面,用200度焗25-30分鐘,


    焗至表面有微微燶即成。


曰式涼拌螺肉(附加食譜)

     16-9-2010    


聽日準備整冰皮月餅,呢排都密密清雪櫃啲存貨,加上兩個囡勁鐘意食螺肉,就殲滅佢啦!真係唔駛一陣兩個囡食到乾乾淨淨………


涼拌日式螺肉


材料: 急凍螺肉、薑5片、蒜蓉2粒、紹酒少少


調味: 泰式雞醬4湯匙、豆辨醬2湯匙、雞粉和糖各1茶匙、麻油少許


做法: 1.急凍螺肉用薑片和紹酒出水後過冷河後,備用。


  2.落油爆香蒜蓉加螺肉快炒,贊酒後即下調味炒勻,下生粉水埋獻,



盛起加麻油撈勻。放涼放入雪櫃雪凍即可食用!


廣式白蓮蓉蛋黃月餅

  











16-9-2010既然有齊材料,一於今日開工整老公至愛嘅白蓮蓉蛋黃月餅黎氹下老公開心先得。今年我買現成皮,製作非常之簡單,唔駛1個鐘就整好11個月餅啦!大家睇下啲顏色都幾靚喎!等回油三日睇睇變成點先。最下圖就係回左3日油嘅月餅啦!老公食完比85分,我問老公:「邊處要改進?」老公話:「個皮唔夠稔,食落有少許韌……不過第一次整已經係好成功架啦!」細囡連續兩日Lunch都帶月餅返去學校食,仲猛話:「又香又好味……日日食都無問題!」既然個個都咁支持,出年就大製作啦!出年要入幾個大啲嘅模先得…

2010年9月21日 星期二

工具

     15-9-2010  






今日去荃灣鴻星飲嘉豪餐喜酒,特登預早左1個鐘出門口,順便去7樓再入貨,埋單$113!跟住係對面間台灣食品買左以下食品,埋單$125!


朱古力餡 $39(300g)


白蓮蓉 $22(300g)


廣式月餅皮 $22


白朱古力脆珠 $18


月餅格 $12(20個)


蔬菜片 $14


蘋果片 $14


椪桔糖 $18


燒仙草 $5.5


榛果朱古力粉 $6


紫山藥黑豆豆漿 $5.5


牛奶寒天布丁粉 $13


荔枝奶茶粉 $13


鹽酥雞粉 $12


滷肉粉 $10




晚餐

     14-9-2010



最近大囡猛咁嚷着要減肥,一嚿肉都唔肯食,咁唯有煮清啲啦!


節瓜冬菇炒雞柳(全家至愛)


椰菜粉絲煮蝦米(大囡至愛)


菜甫炒蛋(大囡至愛)




3DHeIIo Kitty蛋糕

    13-9-2010














11年前的今日,我正在熟睡中,突然姑娘推醒我話:「太太,換衫啦!推你入產房啦!」我望望個鐘先6點,明明8點半先到我開刀生,點解會咁早到我生架!姑娘話:「你前面嗰位太太爆左煲,所以你排第一個…」我即刻好驚問姑娘:「乜野叫做爆左煲呀?」姑娘話:「嗰位太太唸住開刀,點知半夜作動生左啦!」嚇得我仲以為前面嗰位太太咩左添!姑娘叫我先打電話通知先生,跟住換好衫等佢。我一打返屋企老公好驚慌接聽問:「無事嗎?仲乜咁早打黎…」我話:「輪到我生啦!你快啲黎啦!」老公淨係識講:「哦…哦…哦…你等我,我即刻黎…」一陣姑娘就話:「先推你入產房打麻醉藥先…」我話:「我老公仲未黎,我想等埋佢黎呀!」姑娘話:「得啦!我會通知你先生直接去產房架啦!」點知…落到產房比人拮左一針之後,就咩到唔知啦!到我醒來就聽到姑娘話:「恭喜晒!你生左個女呀!而家推你上病房……」一開門就見到老公撲前追問姑娘:「我太太有無輸到血呀?而家情況點呀?」姑娘話:「好好彩呀!你太太血小板又突然變番正常,傷口識得自動癒合,我地之前準備左3包血,都唔需要用,你唔駛擔心,太太同BB都無事…」其實由陀細囡開始已經好多事幹,日日都天旋地轉,又嘔到我死死下,又無左免疫功能,唔可以去人多擠迫嘅地方,怕會受感染,一焗就會失禁。胎盆低易流產,醫生建議多臥床休息,又生痔瘡,又脫智慧牙……等。到8個半月時細囡又突然調返轉個頭仔,照超聲波睇到細囡觀音坐蓮,醫生話:「無得順產,要開刀……」點知又驗到啲血小板降至得75度,正常人係150度,醫生話:「咁就有風險啦!如果傷口唔癒合,就會流血不止,有生命危險……」仲要老公簽同意書。老公竟然同醫生講:「到時有事一定係保大唔保細…」我聽到即時喊,老公攬住我話:「我地仲後生,遲下可以再生,但係如果你有咩事,咁…咁…我點呢?我都唔想作呢啲決定,我都好心痛………」兩公婆經過一晚思量,亦作好最壞打算,果然得到上天嘅眷顧,我同細囡都能平平安安,老公亦鬆了一口氣。經過此事後,老公話:「原來生BB好危險,要攞條命博架!收工啦!我唔想你再冒險呀!有你同兩個囡係我身邊已經足夠啦!」今天我的小寶寶已經11歲啦!雖然越大越勞氣,不過媽咪相信你會漸漸改進了明白事理。亦會變成乖巧聰明,標緻可人。媽咪在此祝願你身體健康,學業進步,日日開心………呢個蛋糕我用左芒果同藍莓,希望你鐘意這少少心意啦!


2010年9月20日 星期一

芒果班戟

      13-9-2010



見雪櫃淨左啲cream係度,就攞黎整班戟啦!原來整班戟一啲都唔難架!仲可以食得健康啲!(因為街買嘅班戟真係好多cream架!)味道好正呀!5件一出就無晒啦!不過我覺得再整個皮可以再薄番少少,就無得頂啦……


晚餐

     12-9-2010   



今日同大囡去街市買餸,大囡突然問:「邊啲係苦瓜呀?」我就指比佢睇,點知大囡話:「我有個同學啲皮膚好靚架!又無毛孔又白又滑又靚…佢話佢媽咪成日煮苦瓜比佢食架!不如你都煮啲比我食呀……」難得大囡主動要求,我仲唔拿拿聲買2個返黎煮呀!呢個囡開始注重儀容啦!!


四季豆炒紅腸(細囡至愛)


豉椒苦瓜炒牛肉(老公至愛)


清蒸桂花魚(兩個囡至愛)


HeIIo Kitty蛋糕

  12-9-2010     



今日在無人指導下,興致勃勃去整呢個蛋糕送比細囡新曆生日,點知就遇上重重困難,係廚房攪左4粒鐘,攪到我越整越失落。(一)先係個蛋糕焗左3次先熟!(二)唧cream時啲花紋時大時細,啲cream又唧唧下出水!(三)原來朱古力筆好難畫圖案!(四)自己手汗大,一掂啲朱古力就溶!(五)蛋糕整得太高身!總之就激C我啦!今次比自己75分!原來整蛋糕真係要比好多心機架!由搵圖、繪畫、剪裁、焗蛋糕、切割做型、唧花、裝飾…等,全部都要好小心細緻!再加上我係一個好急性嘅人,越做就越緊張。真係不感相信自己仲會唔會再整birthday cake…………雖則個cake賣相麻麻,但係老公話:「有心就乜都夠架啦!食嘅人會感受到你份心意………」但願如此……