2010年10月31日 星期日

八爪魚蛋糕

     24-10-2010   




今日又去左bIog友神奇女俠屋企學整蛋糕,每次在神奇女俠英明領導下,我都學懂好多技巧秘訣!每次見面大家都有說不完的話題講,所以次次時間都過得特別快!仲有大囡讚神奇女俠啲皮膚又白又紅,好靚呀!呢個蛋糕我係整黎送比細佬架!因為聽日係細佬舊曆生日,希望細佬如「保羅」般受人愛戴,,有無窮無盡的Lucky!我在此祝願細佬身體健康、事事如意、順風順水、貴人常在、日日開心………Leo食後報告:「好食…好好食…如果芒果多啲仲正!同埋個蛋糕再高啲仲靚………………」


生菜包(附加食譜)

    24-10-2010  


老公唔鐘意食芫茜,所以我轉加菜甫同蔥粒落去,果然大受歡迎,個個都爭住黎食!大囡一路食一路話:「媽咪,每次你整到啲好味嘅野比我食時,我就好想你開鋪頭,等我每日落鋪頭到試食……」我話:「日日比你試食,鋪頭咪蝕大本…」大囡即時話:「梗係唔會啦!我一定caII齊班friend日日去幫襯你嘅…………」成日都咁識氹媽咪,抵我成日整野比你食…


泰式生菜包


材料︰豬肉碎 20元、唐生菜、 芫茜隨意(要葉不要梗,切碎、乾蔥1粒和
蒜頭1(切碎)、香茅 1(切碎、檸檬葉3 (搣碎)、青檸半個 隻、


辣椒2隻


做法︰1.唐生菜洗淨,剪成兜狀。


   2.豬肉碎用生抽、砂糖、麻油、生粉略醃。


    3.下乾蔥、蒜頭、檸檬葉、辣椒和香茅炒香,下豬肉炒至熟透,


下芫莤炒勻,下魚糖、砂糖和唧青檸汁少許調味。


    4.放入唐生菜內即成。


*(如果無檸檬葉可用蔥粒代替)


 


 


藍莓杏仁蛋糕(附加食譜)

   




























































23-10-2010今日約班中學同學一行12人,睇25草蜢繼續忘我演唱會,真係全程high爆,氣氛勁好,突然覺得自己好似青春咗,個個都玩得好開心!其實我地呢班friend已經相識了22年啦!真係好難得!希望每年大家都可聚埋一齊睇演唱會就好啦!仲有今日係樹熊舊曆生日,就整啲蛋糕黎賀賀佢啦!希望樹熊鐘意食啦!!
藍莓杏仁蛋糕



材料:牛油75g、砂糖70g、蛋1、牛奶60g


低筋麵粉120g、泡打粉3g、杏仁粒25g、藍莓乾25g


做法:
1.
牛油和砂糖打至鬆白。


2.3次下蛋打勻。


3.篩入粉類拌勻,下牛奶拌匀,再下杏仁粒和藍莓乾拌勻。


4.倒入杯內至8成滿,180度焗25分鐘即成。



 


2010年10月30日 星期六

阿華田奶凍

22-10-2010  



我幾乎每款甜品都比「小虎」試一啖架!所以「小虎」一見我食甜品就份外興奮!一定乖乖坐係度等食!呢款奶凍好香濃勁滑溜,好好味呀!連補習姐姐Mandy都話:「好好食………」


護膚品

18-10-2010  









經過莎莎認識多年的saIes肥媽話:「SUISSE全套做緊半價,好抵買!」咪入去貢貢囉!一套5件$1250,順便幫兩個囡埋爽膚水和水份面膜,埋單$1566!做女人真係想慳啲都幾難!原來用V1SA咭簽賬就免費送呢套水晶鉛筆。跟住係街撞到一位多年不見的老友阿May,眨下眼她的囝囝讀書啦!時間真係過得快………


2010年10月29日 星期五

晚餐

22-10-2010  






細囡今朝一起身著完校服就坐條度喊,猛話:「個頭好痛,又話喉嚨好痛,唯有幫佢告假一日啦!」見7點咁早,診所仲未開,咪叫細囡瞓一陣,點知細囡瞓瞓下突然嘔,跟住喊住同我講:「我尋晚5點幾起身痾尿,唔小心撞到個頭,好痛兼好暈……」唔係呀!撞親個頭,而家又嘔啲野出黎又黑又啡,咪嚇媽咪喎!拿林九秒九換衫飛的去睇醫生,一落車細囡又嘔,自己個心就越黎越驚,心唸如果醫生話要照X光,即刻caII老公係浸會等。好彩經醫生診治原來細囡胃抽筋、喉嚨發炎、感冒和發燒,只於頭部經醫生檢查証實無問題,只於嘔吐物又黑又啡,係尋晚啲冬菇黎嘅,自己先鬆一口氣咋!我整肉醬意粉鐘意加呢一罐享氏牛肉醬落去,再加蕃茄、洋葱、雜豆和碎牛落去,再加每人一隻荷包蛋,真係夠晒足料架!老公次次都食到捧住個肚架!


蒜蓉西蘭花(自己至愛)


肉醬意粉(全家至愛)


沙爹豬扒串燒(全家至愛)


沙爹豬扒串燒(附加食譜)

     22-10-2010   



今日星期五,見大囡可以抖抖唔駛咪書,就整啲串燒黎氹下佢開心啦!大囡一路食一路話:「有無咁好食呀?好味到……我唔可以停口呀!」話時話又真係幾正喎!啲肉又稔又入味,自己都忍唔住食左4串!呢包沙爹糕不止美味,仲好方便架!用熱水攪勻便可食用,又可淋上豆腐或蔬菜面,$9蚊超抵,大家都買黎試下呀!!


沙爹豬扒串燒


材料: 梅頭豬扒、竹籤、印尼沙爹糕


醃料: 魚露、老抽、糖、麻油


做法:1. 將豬扒解凍,切成細小塊,用醃料醃豬扒1小時。


2.用竹籤串起豬扒,預熱焗爐20015分鐘。


3.將豬扒放入爐焗15分鐘,反轉再焗15分鐘,取出。


4.用熱水開沙爹糕至杰身,將汁淋上串燒面即成。


朱古力果仁蛋糕(附加食譜)

      22-10-2010   



呢款蛋糕細細杯,一啖一個,濃濃嘅可可香味,再配甘脆嘅果仁,正……


朱古力果仁蛋糕


材料:牛油60g、砂糖60g、蛋1隻、可可粉20g、牛奶55g


低筋麵粉110g、泡打粉3g、鹽1g、果仁碎50g、原粒果仁


做法:
1.
牛油和砂糖打至鬆白。


2.3次下蛋打勻。


3.篩入粉類拌勻,下牛奶和果仁碎拌勻。


4.倒入杯內至8成滿,放上果仁,180度焗15分鐘即成。


2010年10月28日 星期四

宇治綠茶雪糕

  22-10-2010    


上次整奶茶雪糕,個個都話:「好味!」兩個囡呢幾日不停催促我整雪糕,見大囡勤勤力力溫書,就整黎獎賞下佢啦!今次我用左包靚綠茶粉整,食落特別香,真係口味到停唔到口呀!連我咁抗拒綠茶嘅人都連吃兩球,就知幾正啦!部雪糕雖則又平又好用,但就較為嘈,有人瞓緊覺一定唔可以整……


2010年10月27日 星期三

晚餐

     21-10-2010






今日返學校當值照顧1年班學生午膳,我發現有個學生套餐具好污糟,細問之下原來小朋友的父母每日都叫佢自己清洗,點解啲父母會咁架!!完全唔照顧自己的孩子,小朋友食左有乜頭暈身慶咪又係父母煩……


粟米午餐肉蟹柳扒豆腐(兩個囡至愛)


蒜蓉菜心(細囡至愛)


節瓜冬菇雞肉圃(兩個囡至愛)


花旗參猴頭菇雞(老公至愛)


花旗參猴頭菇雞湯

  21-10--2010



大囡呢排日日都捱夜咪書!今日就煲啲花旗參湯比佢提提神先得!我加左甘荀、元肉、淮山、玉竹和蜜棗落去煲,啖湯又甘又甜,老公猛話:「正…………」


2010年10月26日 星期二

晚餐

20-10-2010



今日一開facebook就見到大囡寫左呢段位...由10月20開始到11月2,我都暫時唔玩住facebook先la!!因為喺依段時間要進行我o既test~所以暫時閉關facebook~敬請留意xp』睇完真係好安慰,雖然唔知大囡能唔能夠做得到,但係最起碼佢有咁嘅想法,我真係真係好開心呀!覺得大囡識唸左好多。只要大囡肯全力以赴去溫習,不論成績好與否,媽咪都一定會在旁支持你架!


香辣大豆芽豆卜豬頸肉(老公至愛)


蠔油生菜(細囡至愛)


蒜蓉豆豉蒸魚頭(老公至愛)


晚餐

      19-10-2010   






平時啲花膠煲完湯叫兩個囡食,硬係木口不面。今日就下攞黎炆,兩個囡竟然係咁夾黎食,難道真係香啲?我就比較鐘意煲完湯攞黎蘸豉油食………


黃芽白扒冬菇花膠(兩個囡至愛)


青瓜回鍋肉(大囡至愛)


蝦皮蒸水蛋(大囡至愛)


冬瓜大頭菜甘荀海帶肉碎湯(自己至愛)


紫山藥黑豆漿布丁

            19-10-2010 



當細囡睇新聞知道菲律賓受颱風吹襲稻米受損,細囡竟然話:「連個天都唔幫菲律賓呀!」我話:「點解呀?」細囡話:「因為佢地個總統衰囉!講大話!對我地香港人唔負責任唔公平……」我聽完真係都唔知點答好!老公即刻係我耳邊話:「咪以為佢乜都唔知……」呢款布丁入口軟滑,仲有黑糯米嘅香,我自己就好鐘意,再加埋白朱古力脆脆拌食,正呀!!!!


2010年10月25日 星期一

琥珀合桃

      19-10-2010  



見大囡測驗日日溫書,今日就整合桃比佢食,幫大囡補補腦先得!整呢個合桃足足用左我4個鐘,真係幾好味都假,下次咪攪我!凈係搣半斤合桃衣都攪左我2粒鐘,搣完真係頸都梗埋!之後嘅工夫又多,真係做到做到手軟。最值得安慰係兩個囡搶住黎食,食到卜卜聲,大囡仲猛話:「好香…好脆…唔太甜…好好味…正…好食到停唔到口…」我即刻同大囡講:「咁你就食多啲啦!補腦架!」大囡話:「你唔怕我熱氣呀!」我話:「唔怕!媽咪冲左百花蛇舌草比你飲。」跟住大囡話:「咁我聽日咪掂梗!」我話:「一定啦!」大囡再問:「你真係特登整比我食架?」我話:「係呀!煩人……仲有乜野問呀?」


晚餐

     18-10-2010



今日叫工人姐姐買2斤菜心,到煮餸時先發覺咁少嘅,唔似有2斤喎!咪問工人姐姐買左幾多斤菜心,工人姐姐話:「2斤!」咁就弊傢伙比人呃秤啦!跟住工人姐姐話:「無呀!呢度有好多!」跟手係垃圾桶攞左包報紙出黎打開,我一埋去睇,作死啦!點解啲菜條條咁靚都唔要呀!我再問工人姐姐:「今日啲菜心幾錢斤呀?」工人姐姐話:「14蚊斤…」大佬28蚊菜摘淨1斤,有無攪錯……其實好早之前我都發覺工人姐姐隻眼有啲問題,摘菜摘到亂晒大籠,我唸以後都係自己摘菜穩陣啲!


沙茶牛肉菜心(大囡至愛)


絲瓜竹笙肉碎(老公至愛)


清蒸黃腳鱲(兩個囡至愛)


荔枝珍珠奶茶

18-10-2010   


今日細囡開始去補習社,希望細囡能夠乖乖啦!認真做功課………為左支持細囡,我特登整左呢杯飲品黎鼓勵佢,細囡一路飲一路笑住話:「我今日好叻呀!第一個做晒功課,仲溫埋默書添…」我話:「咁咪叻囉!點解你會做得咁快嘅?」細囡話:「因為我想可以快啲返黎屋企同小虎玩囉!我真係好掛住佢呀!」所以話有啲錢真係唔可以慳…


2010年10月24日 星期日

鮮橙牛奶糕

  17-10-2010  


本來一家人開開心心去完百佳入貨,就去搵地方醫肚,都唔知老公玩乜鬼,問佢食乜,老公就用隻手夾住個嘴,每行過一間問老公:「食呢間好唔好呀?」老公都係用手夾住個嘴,如是者行行行,氹氹轉老公都仲係咁,我呢次真係無名火起,即時開bank嬲佢鑊甘,幾拾歲人仲係度玩玩玩,發神經正一大唔透………跟住求其搵左間日本野食,自己滾到死,乜都無點,燶口燶面咁對住老公。兩個囡話去厠所,原來係去send傳訊比老公,叫老公快啲氹番我……………我知道後好感動!返到屋企大囡猛話:「原諒爸爸啦!佢一收工就返黎同我地行街食飯,爸爸已經好好架啦!咪咁小器啦!好冇……」有時唸生囡就有呢樣好,永遠都係較細心同窩心……抵媽咪整呢款糕點比你地食!糕身夠軟滑,但係甜度就唔夠,下次要加返多啲糖先得……


2010年10月23日 星期六

日式吉士蒸蛋糕

      17-10-2010



大囡10點幾先同我講:「媽咪,我想聽日早晨食蛋糕呀!你而家有無時間整呀?」我話:「又唔早啲講……」大囡話:「咁即係整唔整嘅?」我話:「你認為我有得拒絕咩!」大囡即時笑晒口話:「thank you……」咁就整蒸蛋糕啦!我即刻入廚房開工,半個鐘就搞掂啦!老公見到又話:「整個黎食好喎!」我仲唔嗱嗱聲奉上咩!老公食完話:「好似發包咁喎!幾軟熟,唔錯……………」


牛腱熱狗包

      17-10-2010   



見雪櫃有牛腱係度,就攞黎整熱狗包啦!今次用左甘荀墊底,兩個囡一人食左兩個!再加自家醃製嘅咸柑桔,再加罐七喜,咁就攪掂杯咸O七啦!飲完特別醒神………


2010年10月22日 星期五

晚餐

16-10-2010    



尋日個燒茄子鬼咁受歡迎,今日就試用蒸嘅方法黎整,比較下邊個好味啲先得!得出結果係…………………不相伯仲,我同老公鐘意燒,食落比較香濃野味,兩個囡鐘意蒸,食落比較稔和送飯一流………


蒜蓉炒雙瓜(兩個囡至愛)


蝦米肉絲蒸茄子(兩個囡至愛)


滑蛋蝦仁豆腐(大囡至愛)


甘荀牛油曲奇@(附加食譜)

     


16-10-2010每當我攬住我隻小虎豬時,摸摸牠的小手和小腳,再望望佢可愛嘅容貌,心情都會隨之而輕快和開心。呢款曲奇較為鬆化,甘荀味唔太突出,大囡好鐘意食………


甘荀牛油曲奇


材料:牛油50g、糖霜70g、蛋黃1隻、奶粉10g、低筋麵粉80g


    高筋麵粉20g、梳打粉2g、甘荀絲35g


做法:1.牛油和糖霜打至鬆白。


    2.3次下蛋打勻。


    3.篩入粉類拌勻,下甘荀絲拌勻,放入雪櫃雪半小時至硬身。


    4.取出壓印成正方形,用叉在面上刺孔。


    5.180度焗15分鐘,放涼即成。