2010年11月30日 星期二

菠蘿雪糕(附加食譜)

      24-11-2010   


好唔開心!點解兩個囡成日都食嘢唔做嘢,做嘢打爛嘢!叫大囡上天台雪櫃攞個雪糕胆落黎,點知大囡又點細囡去攞,細囡懶醒一手抱小虎,一手攞雪糕胆,終於跣手跌爛左個雪糕胆圍邊,激死我啦!究竟兩個囡幾時先定性聽話呢?經老公一輪搶收,圍邊都係收補唔到,幸好無影響運作……呢款雪糕食落啖啖果肉,老公勁鐘意食,直情成盆揸住黎係咁畢,見老公食得咁滋味,自己都開心番晒!

菠蘿雪糕

材料:牛奶110g、淡忌廉180g、蛋黃2

砂糖50g、菠蘿茸120g

做法:
1.
蛋黃和砂糖打匀。

2.牛奶叮至微熱,倒入蛋糊內攪至糖溶,

3.淡忌廉打至7,倒入蛋糊內拌勻,加入菠蘿茸拌匀。

4.倒入雪糕機內攪拌35分鐘即成。


晚餐

  24-11-2010             






好開心呀!一位多年不見的舊同學打比我,再次聽到熟識的聲音,真係覺得好親切!傾左成個鐘,都唔捨得收線,好期待大家可以出黎食飯聚舊……


油麥菜豆豉鯪魚(老公至愛)


翠玉瓜名門卷蝦米粉絲(自己至愛)


照燒洋蔥豬扒(細囡至愛)


咸酸菜豆腐梭羅魚湯(老公至愛)


雲呢拿燉奶

24-11-2010    

 


見整雪糕淨左蛋白係度,就攞黎整燉奶!今次加左雲呢拿油落去燉,依然又香又滑!細囡話:「啲燉奶好食過街好多…我真係想日日都有得食!」


2010年11月29日 星期一

香蜜梨大菜糕

23-11-2010   


平時三催四請老公先肯乖乖去睇中醫,今日老公竟然主動話要去睇中醫。我都覺得出奇!原來老公肩頸背痛得好緊要,中醫話:「老公啲火重濕重,全部聚晒係肩頸度,唔痛就怪!」呢款大菜糕又爽又甜,咬落仲有啲沙粒,老公話:「越食越過癮………爽呀!」


晚餐

      23-11-2010        



之前係佳寶買左包安格斯頂級牛柳粒!今日就加三色椒落去炒,三父女異口同聲話:「好正……」睇黎都要入多幾包先得……


X0醬炒椰菜(老公至愛)


青瓜雲耳蝦仁(大囡至愛)


三色椒炒牛柳粒(三父女至愛)


FANCL護膚品

      23-11-2010    



而家買親護膚品都要預埋兩個囡,所以乜都用得快過人,今日入左$856貨品!FANCL我足足幫襯4年啦!我鐘意佢無添品夠溫和,啱晒兩個囡用…


2010年11月27日 星期六

反斗車王蛋糕

     22-11-2010   


































尋日又去左bIog友神奇女俠屋企學整蛋糕送比老公舊曆生日!兩個囡都有幫手架!篩粉、打麵糊、唧朱古力圖案和打忌廉全部都係佢兩個做架!除左秤分量、放餡料和唧花係我做。分工合作果然快手2個半鐘就攪掂!連師傅都話快!我發覺與亦師亦友嘅神奇女俠越黎越有默契,每次都有說不完的話題………當一打開蛋糕盒,老公即時左望右望,然後話:「你叻左好多喎!架車好立體,好靚!多謝你份心意,I am very surprise !You are a good wife!」今次試做原味海綿蛋糕同什果餡,老公話:「唔錯!仲添食左半嚿!」我在此祝願老公身體健康,食少啲煙早啲瞓,聽聽話話食中藥調理身體,生意長做長有,心想事成………


椰絲花生糖

      22-11-2010    


老公不嬲最鐘意就係食花生糖,今日係老公舊曆生日,就整黎氹老公開心啦!呢款花生糖好脆口架!不過一切就爛,攪到個相唔係太靚,但係味道就very good!老公一路食一路話:「口感啱晒我,唔會太硬,又唔太甜,夠晒香脆,真係唔錯,I Iike it………」連兩個囡都話:「好好味!」呢個老公食晒成碟後問:「仲有冇呀?」我話:「有!不過唔准你再食…好肥架!」老公仲話:「真係好味到停唔到口…」唉!講到咁,就比多塊老公止止口癮啦!


晚餐(附加食譜)

       21-11-2010   






呢兩個星期老公開始負責幫細囡檢查功課,而細囡亦再不敢事事怠慢!老公話:「要勞氣要激氣等我黎受,我唔想再見到你煩同忟憎!睇下我收唔收得服呢個大懶蟲啦!」希望老公真係可以管制下細囡啦!


沙茶辣椒雞翼尖(老公至愛)


蒜蓉菜心(自己至愛)


煎三文魚(拌沙律醬)(三父女至愛)


上湯群翅羹(全家至愛)


沙茶辣椒雞翼尖


材料: 雞翼尖1半、蒜蓉、乾蔥蓉、辣椒


醃料: 沙茶醬、生抽、老抽、糖、粟粉和紹酒


做法: 1.雞翼尖解凍,用醃料醃30分鐘。


  2.爆香蒜蓉和乾蔥蓉,下雞翼尖炒數十下加2碗水煮至汁濃,


    下辣椒即成。


2010年11月26日 星期五

上湯群翅羹

     21-11-2010    



之前係百佳買左包急凍群翅,今日就加啲冬菇、瑤柱、金華火腿、群翅、雞湯和濃湯寶落去煲,再打埋個馬蹄獻,真係正到不得了!老公猛話:「有水準,好正!」細囡仲飲2大碗添!


芝士蟹柳火腿飛碟

     21-11-2010



大囡話:「利寶商場買9蚊2件飛碟,啲餡又少個皮又稔,一啲都唔好味!我真係好掛住你整嗰啲又香又脆嘅飛碟呀!」既然講到出口,屋企又有方包係度,無理由唔開工架!就加芝士、蟹柳和火腿啦!再加多支活性乳酸菌益力多,大囡即時話:「超正呀!」


2010年11月25日 星期四

綠茶大菜糕

     


20-11-2010尋晚又到一個月一次中學聚會「11月之星Birthday Party」,今次去左沙田富豪花園Neway,13人玩到顛玩到傻,笑到肚痛,飲到high爆,氣氛又高漲!由10點玩到凌晨5點,7個鐘頭裏完全忘形玩樂,真係so happy!呢款大菜糕好香綠茶味,yummy…yummy…

2010年11月24日 星期三

蕃茄牛丸芝士腸拉麵

     20-11-2010   









呢款拉麵我兩個囡好鐘意食架!今次我加左腐皮、咸酸菜、椰菜、牛丸、芝士腸和蔥粒落去,再加埋杯鮮橙沙冰,真係so good……


晚餐

     19-11-2010  



今日太爺又大叫大嚷話:「呢次死啦!幅下排假牙唔見左,以後我點食野呀?」我和姑娘馬上四圍搵,都係搵唔到。太爺就越黎越勞嘈猛話:「假牙無左,食唔到飯啦!」終於今日兩餐都擺食,我要求姑娘轉告醫生可否比營養奶太爺飲,太爺真係一日比一日瘦,真怕會影響他的機能………


咸酸菜金菇雞柳(老公至愛)


小棠菜瑤柱竹笙(自己至愛)


香煎比目魚(全家至愛)


菠蘿蛋白燉鮮奶@

19-11-2010   



你隻「小虎」正一百厭星,係垃圾桶摷左張包有香口膠的紙巾黎玩,點知就出事啦!黏到自己一口一頸一手都係,鬼咁驚青,係咁係度嗚嗚叫,嚇得嗱林用火酒幫佢慢慢抹淨啲香口膠,跟住再慢慢同佢梳鬆啲毛再冲澡!呢隻曳豬,無事攞野黎做,攪攪震無幫襯,攪到媽咪周身唔得閒………呢款燉奶我只係用左菠蘿香油幾滴,食落菠蘿味好香,細囡食完一碗問:「仲有冇呀?」我話:「大佬,梗係無啦!得兩碗咋!」


2010年11月23日 星期二

可可甘荀萬壽果仁曲奇@

     19-11-2010             



今日焗焗下曲奇,成間屋震得好緊要,嚇得我同大囡都好驚,而小虎就捐入梳化底度係咁狂吠。我一走出露台隔離左右即刻問:「係咪地震呀?你地感唔感受到震呀?」跟住大囡就話:「肯定大陸有地方地震…」而家唸番都驚驚地!呢款曲奇好鬆脆,咬落有絲絲甘荀和萬壽果仁碎,好香呀!


晚餐

    18-11-2010   



今日老公發覺我個bIog瀏灠人數過左二十萬人啦!老公猛話:「估唔到…估唔到…你咁叻女!值得掌聲鼓勵…鼓勵…鼓勵…鼓勵…」講真自己真係好開心,其實係呢一年半裏我當bIog如寫日記般,記錄每天的鎖碎事和分享烹飪心得,完全估唔到可以認識一班志同道合的bIog友,讓我現在的生活更加充實和滿足……


薯仔洋蔥炆煙肉(老公至愛)


白菜心炒牛腱(兩個囡至愛)


麵豉醬炒四季豆榨菜蝦乾(自己至愛)


2010年11月22日 星期一

牛油紅糖曲奇

  18-11-2010   


見細囡放假,大囡放早,咪帶佢地去睇太爺!點知去到醫院先知有禽流感個案,由現在開始取消下午探病時間!我央求姑娘比我同兩個囡望一望太爺,一睇又比人綁住,兼發緊脾氣唔肯食飯,博命講:「唔要!我唔食!行開……」太爺一見到我就話:「呢度啲人好衰,綁住我唔比自由我,你叫華仔快啲黎帶我走,我唔要係度………」姐姐話:「佢好扭計,餐餐都唔肯食,你試下餵佢食啦!」太爺話:「比人綁住食乜都無用,等死好過啦!」姑娘又摧捉我地要走,真係又無奈又擔憂…………呢款曲奇好香脆,老公猛話:「好食…唔錯…唔錯…」


工具

     18-10-2010   






今日係新墟買左呢堆工具……


圓形鍚紙模 $2(1個)


正方形錫紙模 $1(1個)


細正方形錫紙模 $0.5(1個)


八角形膠杯 $12(10個)


花形膠杯 $10(10個)


圓形透明膠杯 $8(10個)


晚餐

     17-11-2010    



食左中藥4日,今日痾得最甘,足足痾左8次,個肚又扭住扭住痛,真係攞命呀!


四季豆炒牛腱(全家至愛)


黃芽白甘荀火腿(自己至愛)


鹽焗大眼雞(老公至愛)


2010年11月21日 星期日

木瓜大菜糕

   17-11-2010            















今日細囡學校運動會,老公和細囡參加了親子接力比賽,細囡一起跑便墮後,到她交棒比老公時已經第尾,我見老公後勁厲害係咁追,唸住呢次季軍有望啦!點知仲有兩步就到終點時,老公竟然收慢腳步,最終又係梗頸四!我問老公:「仲乜唔衝埋佢呀?」老公話:「拗柴仲衝呀?想斷腳咩!」嚇得我拿林扶老公坐埋一邊,老公一除襪,隻腳已經腫到豬頭,即刻去睇跌打敷藥!老公不停傻笑話:「唉…真失策!咁都會抝柴,真係想唔應老都唔得……」敷完藥叫老公返屋企抖抖,老公話:「難得今日放假,梗係要同個囡飲茶啦!」跟住又趕返運動場接細囡去飲茶,正一廿四孝老豆!老公同細囡講:「爸爸今次為了你付出大啦!」呢個細囡即時左一啖右一啖,左一啖右一啖,左一啖右一啖……………係咁摟住老公黎錫,跟住兩父囡摟埋一堆玩到顛………我都無佢地咁好氣!呢款大菜糕好清甜呀!兩個囡不停話:「好味喎!好食喎!」估唔到木瓜用黎整甜品會咁受歡迎……下次都要再唸唸用木瓜整其他甜品先得…


晚餐

    16-11-2010  






太爺今日好曳,搣尿片攪到成手成床都係臭臭,姑娘話:「玩左3次,淨係上晝都冲左3次涼,換左3次床單…仲不停大嚷要出院…」結果又比姑娘綁都實一實,太爺發忟憎話:「我今年九十幾歲,仲有幾多年食呀?我又無做過壞事,點解要咁對我呀?綁住唔比我郁,無陰公!我好辛苦呀!生死有命,富貴由人,比我返屋企啦!我唔要死係度呀……」聽到我好心噏,好肉赤,但係又愛莫能助,真係好茅盾!


節瓜冬菇炆排骨(老公至愛)


蒜蓉白菜仔(至愛)


清蒸黃花魚(至愛)


芥菜咸蛋肉碎湯(老公至愛)


2010年11月20日 星期六

雲呢拿雪糕

      16-11-2010             


呢款雲呢拿雪糕好正呀!大囡一路食一路話:「自己整嘅雪糕特別唔同!」我問:「有乜唔同?」大囡話:「好食好多,兼且又唔會太甜!」細囡食完話:「以後我地都唔駛幫襯雪糕車啦!」我問:「點解呀?」細囡話:「因為你整得好味啲囉!」老公食完話:「超正!勁好味!老婆你越黎越有進步,抵我咁錫你……」


手信

16-11-2010    



阿媽啱啱去完長沙玩,買左支人參比我,遲下有時間先燉黎飲……


咖喱肉絲撈麵

     16-11-2010  



兩個囡最鐘意食印尼撈麵,今日就加啲咖喱炒肉絲和椰菜,兩個囡不知食到幾happy…


2010年11月19日 星期五

快樂神仙魚蛋糕

  15-11-2010              







































呢個蛋糕係我尋日係bIog友神奇女俠屋企學整架!神奇女俠成日話:「MabeI,其實你都識整啦!點解仲成日上黎呢?我唔想賺你錢呀?」點解我鐘意上你屋企整蛋糕?因為大家有傾有講時間過得特別快,另外又可一同研究,最重要係每次你都教曉我好多技巧上的要訣,大家每次見面的氣氛都好好,而我連你另一半蘆山真面目都見過,發覺與你越來越混熟。(我細囡話:「你同男朋友對眼好似!一樣咁圓咁大…」)我在此祝願老公身體健康,生意滔滔不絕,財源滾滾來,煩惱事盡掃一空;歡樂事接踵而來,日日蓮子口面,嘻嘻哈哈渡過每一天……另外老公幫呢條魚起左個名堂叫『快樂神仙魚』希望每一位食過見過呢個蛋糕嘅人,個個都快快樂樂………………