2010年12月31日 星期五

聖誕BBQ

  26-12-2010   




















今日一行33人來我家舉行聖誕BBQ party!另外加多4隻狗!食物我準備了100隻雞翼、10條司華力腸、1條紅腸、1包芝士腸、20塊牛扒、12絛金沙骨、10件一口和牛、8塊香草雞扒、3塊豬頸肉、26塊豬扒、2包玉米燒賣、3袋方包、6包香腸、5袋蒜頭、6包金菇、1條青瓜、2條絲瓜、2包娃娃菜、2個西蘭花、12個蕃薯、1條煙三文魚、乳豬1隻、5包炭……生果有:5個黃金梨、2磅紅提、2磅青提、3磅沙糖桔、1盒藍莓…甜品有:芒果芝士蛋糕、美祿雪糕、士多啤梨雪糕……黎招呼朋友,希望個個都能食得開心玩得盡興!食乳豬又係好搶手,唔駛一陣就食晒!7點開始玩玩到凌晨3點,我對腳真係攰到爆!((因為上落樓梯至少有二十幾次))9個細路係梳化度玩坐爆波,又跳又坐,睇黎今年想唔換梳化都唔得!我同老公和工人姐姐三劍俠清潔完上床瞓都成5點半,真係成身散晒!每年勞心勞力攪聖誕BBQ,淨係買禮物玩遊戲都買左30份,無非想人人開心,皆大歡喜……


美祿雪糕

     26-12-2010  


唔知點解整完個色出黎會咁淺色!不過就又滑又香濃美味!個個細路都爭住黎食,話咁快就沽清啦!二家姐個仔大嚿話:「阿姨,有無得打包呀?」我笑住話:「最多下次你黎阿姨再整比你食好冇?」


芒果芝士蛋糕5

      26-12-2010


今早11點起床,先醒起應承左阿嫂整cheese cake比佢食,時間又趕,唔夠時間解凍忌廉芝士,唯有用風筒吹軟嚿芝士!3點就心心急急脫模,點知個邊邊位好黏,出黎好肉酸呀!激死我啦!究竟係邊度出錯呢?各人食後評語話:「餅底唔夠脆,芝士唔夠滑……」雖則失手,不過依然大受歡迎………


2010年12月30日 星期四

薑蜜燉奶

     25-12-2010    


今日係聖誕節,我由朝已經忙過不停!老公6點打返黎話:「不如今日去影聖誕燈飾囉?」我話:「我而家成個廚房都係聽日BBQ啲食物,我好忙呀!過幾日先影啦!」老公即時好勞氣話:「係咪每年聖誕都要留係屋企過,兩個囡仲細,點解唔珍惜節日共聚的機會呢?」我話:「咁聽日party真係好多野攪,你比我忙埋呢兩日啦…」老公話:「咁點忙都要食飯架?」我話:「你買外賣返黎呀!」老公即時高8度話:「乜話!今日聖誕節你叫我食外賣,你係咪忙到傻左呀?」自己知道激嬲左老公,即時補鑊話:「我地而家換衫,去韓屋食你至愛嘅石頭窩飯好冇?」老公無好氣話:「你話事囉!我有邊一次講得贏你呀?你成日都要攪到自己咁忙咁辛苦為乜呀?聖誕節一家人應該甜甜蜜蜜度過,並唔係平平淡淡冷冷清清度過,你出年可否將聖誕party提前呢?兩個囡大啲就有自己嘅節目,到時點會同我地過呀!你自己唸清楚係咪?」老公份人就係咁,脾氣好好,話咁快就無事,一家人開開心心食左一頓豐富又美味嘅晚餐。回到家我又要埋頭苦幹工作啦!不過都先燉碗又滑又好味嘅燉奶,比老公暖暖身,順便氹番老公開心……


百花蛇舌草涼茶

  25-12-2010   



見聽日BBQ今日就煲定啲涼茶比兩個囡打定底,費時到時食完喉嚨痛就弊傢伙啦!不過呢款涼茶好甘,連老公飲完都打晒冷震,兩個囡亦在我威迫下乖乖飲晒!材料:百花蛇舌草、半支蓮、雲苓、白术、扁豆……等,功效:解熱毒和咽喉痛………


士多啤梨雪糕(附加食譜)

     26-12-2010


見街市啲士多啤梨好靚,又買2盒返黎試試!果然又甜又多汁!咁就攞啲黎整雪糕先得!不嬲兩個囡最憎就係食士多啤梨雪糕,成日都話:「好似藥水味咁……」係我左氹右氹之下,兩個各試一啖後都話:「點解無左藥水味嘅?」跟住兩個囡各自食左一球後話:「真係好味呀!」連細佬、Leo、阿嫂和大嚿都話:「好好味…………」

士多啤梨雪糕

材料:牛奶100g、淡忌廉140g、蛋黃2

砂糖60g、士多啤梨茸150g

做法:
1.
蛋黃和砂糖打匀。

2.牛奶叮至微熱,倒入蛋糊內攪至糖溶,

3.淡忌廉打至7,倒入蛋糊內拌勻,加入士多啤梨茸拌匀。

4.倒入雪糕機內攪拌35分鐘即成。


益力多藍莓芝士杯

     24-12-2010  



今日係平安夜,我們一家去左金水食壽司,呢間野都幾貴,埋單成$926!不過兩個囡猛話:「啲三文魚好正……」返到屋企就排排坐係梳化嘆呢杯芝士杯,食落特別溫馨美味…


2010年12月29日 星期三

鬆化牛油朱古力曲奇

     23-12-2010


天寒地凍係披窩裏是最舒服的!但係輾轉反側也瞓不著,就是一件苦事!老公部轟炸機不停發炮攻擊我,越攻就越煩,為左唔想討厭老公,唯有3點半就起床,看看有乜東東攪!比我發現罐金桶牛油,唔駛解凍喎!就即刻入廚房開工密密整!呢款曲奇勁鬆化,為左唔想咁單調,就再將1邊沾上朱古力醬,食落果然仲正,自己都忍唔住連成3塊,睇黎減肥大計又要擱置………


腐竹蘭香子雞蛋湯水

     21-12-2010


今日試用二表哥啲腐竹黎煲湯水,一落水即爛,一陣間就溶晒,豆味好香,加埋蘭香子咬下又幾過癮架!不過老公話:「我此終鐘意食腐竹碎,而家好似飲豆漿咁,我就麻麻地啦!」大囡不止幾喜歡連飲2碗………


2010年12月28日 星期二

晚餐

     21-12-2010



見今朝整大食會淨左啲咖喱汁係度,就加老公至愛嘅細細粒彈牙魚蛋落去。兼且實在太攰,懶得就懶,今晚煲粥食算數……


肉絲炒通心米線(兩個囡至愛)


燒豬骨粥(老公至愛)


雞蛋饅頭(老公至愛)


咖喱魚蛋(全家至愛)


大食會

     21-12-2010  









今日兩個囡學校聖誕聯歡會,我炸左3盒麥樂雞、整左2磅咖喱魚蛋、鹵左6磅瑞士汁雞翼、72件三文治、整左2個芒果cheese cake、1個益力多藍莓cheese cake……為左兩個囡我絕對唔介意出錢出力。不過有2個人就極之不滿,第1個係工人姐姐,因為多工夫做,所以次次都燶口燶面。第二個係老公,佢話我:「又買又拎又做攞苦黎辛,次次都攪到自己瞓得幾粒鐘,都唔知你整咁多為乜??」原因只有一個就係我想見到兩個囡開心!記得自己讀書時央求阿媽整啲菠蘿腸仔比我帶回校與同學分享,阿媽一口拒絕,回校見到個個同學都有帶媽媽親手整的食物,心裏真是好羡慕!亦是這個原因,推動我有此動力去整咁多野食比兩個囡……………講真天寒地凍瞓得2個鐘,5點就爬起身整,都咪話唔辛苦,啲手腳真係硬晒架!


手信

     20-12-2010    



老公個客送左啲自家醃製嘅臘腸比我地,過兩日凍就試下攞黎整煲仔飯啦!


2010年12月27日 星期一

芒果芝士蛋糕4

    20-12-2010   


呢輪密密整cheese cake,所以而家一見到街有芒果買,都一定買回來起肉打茸放冰格留來整甜品!真係方便又節儉!呢個cheese cake係比細囡帶回校的,希望6D個個同學都食得開心啦!


晚餐

    20-12-2010



今朝一早帶備金豬酒禮去車公廟還神,希望車公爺爺一年來的庇佑,保佑車房生意興隆,財源廣進,出入平安,萬事勝意…………


豉油雞(全家至愛)


黃芽白肉絲(兩個囡至愛)


雜菜粉絲蝦米(自己至愛)


酬神乳豬(老公至愛)


天山雪蓮粟米瘦肉湯(三父女至愛)


益力多藍莓芝士蛋糕2


大囡話:「個個同學都鐘意食藍莓,咁就放多啲藍莓啦!希望老師和同學都食得開心啦!


天山雪蓮粟米瘦肉湯

20-12-2010  



天山雪蓮去皮切開好似雪梨咁架!我加左紅蘿蔔、粟米、南北杏、蜜棗和瘦肉落去煲,啖湯甜到不得了!三父女一人各飲二大碗………呢款湯有清肝去火和涼血解毒!


2010年12月26日 星期日

芒果芝士蛋糕3

     20-12-2010  


今日太忙啦!要整3個cheese cake比兩個囡帶回校開聖誕party,唯有捉埋大囡幫忙!大囡負責整餅底,大囡仲要求面上放多啲生果,既然開到口,無話唔得嘅!一定同你砌到靚靚,唔知大囡收唔收貨呢??希望2C同學們喜歡食啦!剛剛收到消息,大囡話:「一陣間已比搶購一空,極度受歡迎……」


手信

      19-12-2010  






今日奶奶、大表哥和二表哥係惠州落黎睇太爺。二表哥帶左2袋自家製的腐竹和橙肉蕃薯比我,睇黎有排煲糖水啦!


雜燴辣白菜芝士拉麵

   19-12-2010     






尋日打邊爐淨左啲餸係度,一於煮大囡至愛嘅拉麵,再加秀珍菇、名門卷、魚片、芝士腸、芝士丸、生菜和金菇菜落去,食完真係飽到痺!


2010年12月25日 星期六

打邊爐

      17-12-2010   






今晚老公又係話要打邊爐,仲order要勝利牛丸,咁就少少地買半斤啦!今曰有雜丸、支竹、秀珍菇、蘿蔔、魚腐、魚棗、豬肉條、勝利牛丸、魚片、油麥菜、出前一丁、魭魚腩、鯪魚肉……又開開心心溫暖圍埋一起烚下烚下,正呀!


CE0狂歡

     18-12-2010   















今日同中學同學先去竹園食海鮮,然後直落CE0舉行『12月之星』聚會,我係12月之星成員自然要同人碰杯啦!呢個老公懶醒猛同我頂酒,卒之頂唔順攪到嘔,係房內瞓左個半鐘後,成個人即時清醒晒!老公,老公你不嬲酒量一般,仲乜係都要同我爭住黎飲呢?知否你喝醉了,我扶不到你回家,下次咪再同老婆頂酒啦!(老婆酒量好你少少…)玩到4點半打的回家,瞓落床都5點半,唸住老公會瞓晏啲,點知呢個工作狂比個morning kiss我時,望望個鐘9:15分,老公你駛唔駛咁摶命呀?你夠唔夠精神架?老公話:「我無事啦!公司好多野做,要返去睇睇先得!你無3點鐘唔准起床,瞓多啲…瞓多啲…瞓埋我嗰份,知唔知?今晚去大榮華食豬油撈飯好冇?乖乖啦!快啲瞓………」一個咁勤力嘅老公,我又點可以唔聽佢話呢?唯有乖乖去搵周公啦!