2011年2月28日 星期一

小提琴杏仁片白朱古力

     18-2-2011   


幣傢伙!呢兩日整朱古力整上癮!半夜三更又忍唔住手摷模出黎整朱古力!今次我加左勁多焗香左嘅杏仁片落去,不止香仲好好味呀!配埋小提琴造形連老公都話:「好別緻…好靚……」


愛心手信

     17-2-2011   



老公個客剛剛去完韓國旅行,送左包辣泡菜比老公,你地話攞黎整乜好呢???


夏威夷果仁朱古力

     17-2-2011    


我地潮州人興年十五元宵佳節做節,所以今晚要返阿媽屋企食飯!咁就特別整左呢款朱古力比侄囡食!加左大大粒夏威夷果仁落去,食落啖啖香脆,希望AngeIa收到會鐘意!!!


年糕漢堡包

17-2-2011  



盡最後努力清晒底年糕先得!又試煎香完夾住炒蛋黎食,再加包牛奶,就成為兩個囡今日嘅下午茶………


2011年2月27日 星期日

心心脆米朱古力

     17-2-2011   


今日係正月十五兼元宵佳節,唔得閒整湯圓比老公食,唯有整朱古力頂住擋先!今次又學人試玩轉印紙,出黎又幾靚喎!另外用左58%朱古力,又再每粒加上朱古力脆米,食落好滋味豐富!希望老公食完甜絲絲、笑哈哈…………


冧酒提子黑朱古力

17-2-2011   


食完飯漏夜趕工整朱古力比大囡。今次加左啲冧酒浸提子乾,兼無揸乾身,所以食落有酒味,另外又用左75%黑朱古力整,希望同學們接受到啦!!!


晚餐@

     16-2-2011    









我阿爸叫我帶「小虎」去參加狗展喎!阿爸話:「又識坐、又識企、又識叼番個碟比你、又識開櫃桶……」我話:「咁不如我教埋小虎跳火圈,去馬戲班表演,好冇?」阿爸話:「如果你教到,不如你去做馴獸師……」阿爸駛唔駛咁寸我呀!


XO醬翠玉瓜腰果蝦仁(大囡至愛)


芽菜韮菜炒香腸(細囡至愛)


沙爹肉碎燴玉子豆腐(兩個囡至愛)


糯米雞酒(全家至愛)


2011年2月26日 星期六

糯米雞酒(附加食譜)

     16-2-2011



見天氣仲凍,又有糯米酒係度,又煲黎暖暖身先得!我加左大量薑、紅棗、木耳、雞蛋、元肉、雞湯、米酒、糯米酒大半碗和雞落去煲,兩個囡不知幾鐘意飲,仲不停話:「正…」


糯米雞酒


材料:l(去皮斬件)、薑半嚿(切片)、木耳4(浸軟切細塊)


    紅棗6粒、元肉10粒、雞湯1盒、米酒3湯匙和糯米酒半碗、


    雞蛋4隻、水2碗半豬潤5(可加或不加)


做法:1.將雞蛋煎香。(14)備用。


    2.將雞件炒至半熟,盛起備用。


    3.下好少好少油用慢火爆炒薑片2分鐘,至香味滲出,


   下水、紅棗、元肉、木耳用中火煲半小時。


    4.倒入雞件、上湯和米酒入內用大火煲至滾,


   轉細火滾3分鐘後,再校回大火煲至滾起,熄火,


   倒入糯米酒半碗,蓋上蓋焗10鐘即可飲用。


葵花籽白朱古力

     16-2-2011  


大囡一放學返黎就話:「我想元宵節請同學食朱古力,你…可唔可以教我整呀?」大小姐叫到我又點會唔應承呀!焗香左啲葵花籽,食落特別美味!希望同學們鐘意啦!!


牛奶寒天布丁

16-2-2011    



今日係年十四,執櫃發現仲有包倉底貨比我遺忘左!今日一於整左呢個『牛奶寒天布丁』佢比兩個囡食!入口有好濃郁奶味,希望兩個囡食完「天官賜福」、「丁財兩旺」………


晚餐(附加食譜)

      15-2-2011    









今日試下用安記嘅即食姬茹黎炒菜,味道又OK喎!兩個囡好鐘意食………


椰菜煙鴨胸(兩個囡至愛)


白菜炒姬菇(兩個囡至愛)


酸辣魚柳(全家至愛)


鹿茸燉豬展(自己至愛)


酸辣魚柳


材料:魚柳3條、蛋1


調味料:水、茄汁各3湯匙、砂糖、辣油各1湯匙和麻油適量


做法:1.魚柳抹乾水後,用胡椒粉、鹽和油醃半小時。


    2.燒熱油鑊,逐件先上蛋汁再上生粉,炸至金黃。


    3.煮滾調味料,下魚柳煮至汁收即成。


 


2011年2月25日 星期五

鹿茸燉豬展

15-2-2011    


見天氣又凍番,就燉番個鹿茸黎飲!我加左淮山、元肉、杞子、北耆、黨參、鹿茸和豬展落去燉3個半鐘,加啲鹽就飲得啦!


星馬炒蘿蔔糕

   15-2-2011



今日係年十三,要積極清埋雪櫃啲糕糕先得啦!呢個『星馬蘿蔔糕』又香又辣,好野味呀!食落特別醒神開胃,我竟然一個人掃晒成碟…勁呢?希望我食完「吉星拱照」、「龍馬精神」、「百無禁忌」、「步步高昇」……


咖喱豬扒湯烏冬

     14-2-2011  



今晚要去飲,委屈兩個囡食住一餐烏冬啦!我加左粟米、榨菜和炸蒜蓉上面,希望兩個囡滿意啦!!


愛心朱古力

14-2-2011    






細囡放學至電回來要求我等埋佢補完習返黎先出門!原來個傻妹托同學整左塊心形朱古力送比我!當我拆出黎食,細囡話:「媽咪我覺得你今日好靚呀……」我話:「媽咪覺得你今日特別識氹我……」細囡即刻攬住我話:「情人節快樂!」另外係飲宴上PauI仔好有紳士風度,向坐在女仕送上金莎朱古力花,仲送多兩支比兩個囡添!


2011年2月24日 星期四

玉兔榛果朱古力

     14-2-2011   





今日係年十二,兼且係情年節!我在此祝願各位甜甜蜜蜜、快快樂樂!今年無得同老公食燭光晚餐…點解??因為要飲中學同學阿威同朱姐餐喜酒,23個同學聚埋一起共度情人節,係咪好熱鬧呢???今年係兔年,就整『玉兔榛果朱古力』比老公啦!加左焗香嘅榛果落去,食落唔止香仲好甘脆……希望老公食完「金玊滿堂」、「吐氣揚眉」、「津津有味」、「勇猛過人」、「豬籠入水」、「身壯力健」………見老公銀包有少少披口,今年就送銀包同埋咭片套比老公,另外FION買滿$800有滑鼠連墊一套送,好靚架!!


燒仙草

13-2-2011    






之前係台灣鋪買左兩包燒仙草。今日就試下攞黎整,唔知係咪落水多左呢??雪左好耐都唔凝固,我膽粗粗打左個生粉獻落去,又比我得左!!入口勁似龜苓膏,加埋蜂蜜落去食,細囡又好鐘意喎!!


紫菜豬肉鬆

   13-2-20111   



今日係年十一,見又有湯渣豬展係度,又廢物利用攞黎整豬肉鬆!今次用五香粉炒同埋炒耐啲,再加埋紫菜碎拌食,入口特別香脆,細囡超鐘意食………希望食完「大紅大紫」、「財運亨通」、「豬籠入水」、「金玉滿堂」、「輕輕鬆鬆」…


2011年2月23日 星期三

晚餐

     12-2-2011  









今日年初十,同學阿秋囡囡今日擺滿月,我同老公要去飲!所以懶得就懶,煲粥食算數!


蒜蓉菜心「財源廣進」、「心想事成」


咸瘦肉粥「金玉滿堂」、「竹報平安」


X0醬蘿蔔糕「百無禁忌」、「步步高昇」


煎黃金糕、椰汁糕「黃金滿屋」、「福星高照」


客家板「家肥屋潤」


阿華田雪糕(附加食譜)

     11-2-2011   

今日係年初九,老公呢輪腰部舊患痛,而家敷左藥幾日啦!呢個大細路日日都好似BB咁嗲我,又扭要食雪糕。見今日有時間就整款『阿華田雪糕』氹下老公啦!見老公食到津津有味個樣,就保証老公今年一定「富貴榮華」、「福星高照」……

阿華田雪糕

材料:牛奶100g、淡忌廉140g、蛋黃2

砂糖55g、阿華田粉30g

做法:
1.
蛋黃和砂糖打匀。

2.牛奶加入阿華田粉叮熱至溶,放涼少許,
  
倒入蛋糊內攪至糖溶,

3.淡忌廉打至7,倒入蛋糊內拌勻。

4.倒入雪糕機內攪拌35分鐘即成。


唧花朱古力粒曲奇(附加食譜)



10-2-2011呢款曲奇好鬆化,有重重嘅牛油香,在面上加粒朱古力,即時靚晒!在此多謝洪sir盡心盡力去幫兩個囡補習,呢份小小心意,希望洪sir會鐘意………


唧花朱古力粒曲奇



材料: 金桶牛油180g糖霜130g低筋麵粉150g、粟粉70g、高筋麵粉80g
雲呢拿油2滴、蛋1隻、朱古力粒



做法:
1. 將牛油和糖霜打至鬆軟。


2. 分3次下蛋打匀。
3.
篩入粉類拌匀, 放入唧袋唧出形狀,放上朱古力粒。


4. 用180度15分鐘,放涼即成。


2011年2月22日 星期二

晚餐

10-2-2011   






今日年初八,大囡返學啦!我又要準時8點開飯啦!既然仲係新正頭,就煮啲有意頭餸啦!


瑤柱蒸水蛋「蒸蒸日上」、「風山水起」


生菜紅燒鮑魚「和氣生財」、「鴻運當頭」、「年年有餘」


洋蔥豬扒「喜氣洋洋」、「聰明伶俐」、「豬籠入水」


川頁蘋果雪梨海底椰湯「合家平安」


川頁蘋果雪梨海底椰豬展湯

     10-2-2011






老公尋晚咳得好緊要,今日就煲啖湯幫老公止止咳先得!我加左川頁、蘋果、雪梨、陳皮、南北杏、海底椰、蜜棗、無花果和豬展落去煲,啖湯清甜又滋潤,正………


士多啤梨芝士蛋糕@

9-2-2011






今日約左阿祺和雞肶黎屋企團拜,一於整個cheese cake黎招呼小朋友先得!今次面上唧cream裝飾,再加勁多士多啤梨,唔知啱唔啱佢地口味呢??阿琴食完話:「唔甜…唔太漏…好好食…同街嗰啲無乜分別…」氹到我飄飄然心花怒放!


2011年2月21日 星期一

五香玉丁撈粗麵

  9-2-2011   



今日係年初七,即係「人日」,在此向各位講句『生日快樂」,仲有當然要食長壽麵啦!就整個五香玉丁撈粗麵啦!希望今年「風山水起」、「四季平安」、「笑口常開」、「精神爽利」、「身體健康」、「一帆風順」、「丁財兩旺」和「學業猛進」………


晚餐

     8-2-2011



今日係年初六,一早我同阿哥和二家姐去車公廟拜神祈福!老公話:「呢輪食到飽飽滯滯,好想食粥…」咁就煲個下火兼清腸胃嘅粥啦!


蒜蓉西蘭花「東成西就」、「花開富貴」


髮菜蠔豉肉碎粥「發財好市」、「金玉滿堂」、「竹報平安」


煎豬柳漢堡腸「豬籠入水」、「招財進寶」、「長做長有」


蒸蘿蔔糕「蒸蒸日上」、「百無禁忌」、「福星高照」


芒果麥提莎芝士蛋糕

7-2-2011    


侄女Angela年初一就問我:「姑姐幾時又cheese cake食呀?」今日就漏夜趕工整左呢個cheese cake比佢,我仲手多多加左啲麥提莎係入面,唔知侄女鐘唔鐘意呢???


八寶炒飯

     7-2-2011



今日係年初五,老公開巿啦!在此恭祝車房開工大吉、生意興隆、客似雲來、財源廣進、貨如輪轉、出入平安、一團和氣和龍馬精神!唔駛去拜年,三母女瞓到成3點先醒,又唔想出街食,唯有三母女分工合作洗切炒,話咁快就攪掂呢個『八寶炒飯』,落左8種材料:菜甫、火腿、青豆、五香玉丁、粟米、蟹柳、雞蛋和肉碎……希望食完「八星報喜」和「永保平安」…………


2011年2月19日 星期六

黃金糕蛋白漢堡包@

     6-2-2011   












今日係年初四,我地一行12人先到荃灣路德圍金坊食泰國菜,跟住再去百老滙睇戲,大人睇「新少林寺」,細路睇「I ♥ H K 開心萬歲」,完場時見到非凡哥一家四口,溫馨甜蜜步過…返到屋企三父女齋齋嗌:「肚仔餓……」老公指定要食黃金糕,兩個囡就話要食包包,一於攪攪新意思整個『黃金蛋白漢堡包」!將煎香嘅黃金糕夾住蛋白黎食,再加罐雪碧,就成為三父女嘅宵夜!希望佢地食完「旺足全年」、「金銀滿屋」、「百無禁忌」、「步步高昇」、「永保平安」………


手信@

     5-2-2011



























今日係年初三,瞓醒先去老人院探太公,太公不止面色好,兼且開始可以用四腳架行路啦!!老公見到份外開心,不停捉住太公隻手大讚:「叻仔啦!行得好好,而家自由好多啦!食多啲野,養番好個身體,知道嗎?」太公不停點頭傻笑!跟住我地就落左元朗食雲吞麵,然後搭火車返深圳同奶奶拜年!大姑奶比左啲自家種嘅菜心、姑媽比左啲自家整嘅客家板和自家釀嘅糯米酒、姑仔送左盒曲奇和奶奶送嘅金莎……食完晚飯9點,就搭車回家,唔知點解今日對腳好攰…