2011年3月31日 星期四

杏仁唧花曲奇

      16-3-2011    


好耐無用支唧花槍啦!今日一於攞黎玩玩先得!呢款曲奇好鬆化,有杏仁香,一口一啖容易食,正呀!


栗子粟米甘荀雞腳湯

    16-3-2011    









想通了!新一天新開始,希望細囡會發憤圖強,做一個好學生好女兒!兩晚都瞓得唔好,皮膚自然又乾又黃。今日就煲款養顏兼膠質重嘅湯黎滋潤下,飲完包保皮膚特別有彈性!呢款湯我加左粟米、甘荀、蜜棗、雞腳和栗子落去煲,啖湯超清甜………兼又有湯渣後,正………


晚餐

   15-3-2011



心情依舊好低落,煮好餸後亦沒有埋枱食飯,大囡又見我沒吃,甚為不開心!猛話:「阿妹知錯啦!你原諒佢啦!」在大囡苦勸下食左少少………


榨菜肉絲炆米(大囡至愛)


燒豬骨粥(全家至愛)


炸春卷(老公至愛)


蒜蓉西蘭花(細囡至愛)


蟹柳花邊通心粉

      15-3-2011   



嬲到食唔落飯,早早大披冚個頭,點知此終敵不過肚仔餓!到凌晨3點幾個肚係咁打鼓,唯有入廚房整碗通心粉食!唔知係咪心情壞透會影響味覺,落左成湯匙辣椒油都覺得唔夠辣……


2011年3月30日 星期三

晚餐

    14-3-2011    






好心痛!好失落!點解細囡會變成一個愛講大話的人?明知東窗事發,比我識穿左,還可以再繼續編作3個謊言黎呃我,我個心徹徹底底碎裂了!不停地激氣、怒罵、落淚…終於換來頭痛、心口痛,身心疲累無力再和細囡擾讓,唯有直奔入房關上門嚎哭一場,不斷反覆思量問自己究竟是否我教導無方、是否我不了解細囡、是否細囡開始反叛呢?坐在床上不斷想呀想…眼淚流呀流…那種感覺真是好難受!


X0醬蜜豆豬頸肉(大囡至愛)


蒜蓉白菜仔(細囡至愛)


豉油銀鱈魚(全家至愛)


紫菜墨魚丸湯(老公至愛)


韓式泡菜蝦煎餅

      14-3-2011   




早幾日係百佳買左呢包泡菜,見包韓式班戟粉又就黎過期,就加左啲蔥粒、泡菜、蝦仁和蝦皮落去煎,再係面上唧上沙律醬,灑上蝦皮和芝麻,大囡猛話:「yummy yummy!」


紫菜墨魚丸湯

      14-3-2011   



見冰箱有盒墨魚丸係度,一於攞黎煲紫菜湯!加左一粒濃湯寶同冬菜落去煲,唔駛10分鐘就有得飲啦!


2011年3月29日 星期二

開心果朱古力

14-3-2011


今日係白色情人節,我又整朱古力比老公食!今次用左58%朱古力整,再加香脆嘅開心果落去,包保老公食完開開心心………


晚餐

13-3-2011  



兆康苑得一間菜擋,啲四季豆買到成$18斤,本來唔想買,但係細囡話好想食,做阿媽又點會say no呀!呢度買左$28,抵唔抵就真係見人見智啦!


酸豆角肉碎(全家至愛)


蒜蓉西洋菜(老公至愛)


三色椒炒香腸(自己至愛)


士多啤梨朱古力蛋糕仔(附加食譜)

         



13-3-2011見有包士多啤梨朱古力係度,一於攞黎焗蛋糕,比大囡聽朝做早餐!呢款蛋糕仔外脆內軟,兩個囡好鐘意食………
士多啤梨朱古力蛋糕仔



材料:牛油55g、砂糖55g、蛋1、牛奶55g


低筋麵粉110g、泡打粉3g、士多啤梨朱古力30g


做法:
1.
牛油和砂糖打至鬆白。


2.3次下蛋打勻。


3.篩入粉類拌勻,下牛奶拌匀,再下士多啤梨朱古力拌勻。


4.倒入杯內至8成滿,180度焗15分鐘即成。


焦糖雪糕(附加食譜)

     13-3-2011    

13-3-2011老公,老公我再一次鄭重聲明,我酒量好你好多,唔該你咪再自動請櫻幫我頂酒啦!見到你尋晚係厠所嘔嗰個樣,真係心痛死我啦!唯有今日補上你至愛嘅雪糕黎慰藉下你啦!今次加左焦糖漿落去整,好香…好香呀!

焦糖雪糕

材料:牛奶110g、淡忌廉160g、蛋黃2

砂糖45g、焦糖漿15g

做法:
1.
蛋黃和砂糖打匀。

2.牛奶叮至微熱,倒入蛋糊內攪至糖溶,加入焦糖漿入內拌勻。

3.淡忌廉打至7,倒入蛋糊內拌勻。

4.倒入雪糕機內攪拌35分鐘即成。



 


2011年3月28日 星期一

焗蕃薯2

  13-2-2011  



去完卡拉0K玩,瞓得3個鐘就要起身去大頭姨丈度拜神。出門前焗左8條蕃薯比Leo同細佬食,Leo猛話:「好好食…正…」


愛心手信

  13-3-2011  



同學肥潘剛剛去完冲繩旅遊,買左以下手信比我………


晚餐

  12-3-2011    






今晚係3月之星聚會,主角係肥潘,我地15人又去卡拉0K玩啦!出門前整定晚餐比兩個囡,咁先玩得開心、飲得盡慶…………


白汁肉碎花邊通心粉(兩個囡至愛)


蒜蓉椰菜(細囡至愛)


咖喱魚蛋(兩個囡至愛)


日式芝士蛋糕(附加食譜)

      12-3-2011    






一路焗已經知道衰左,因為我做錯左步驟!一出爐個面已經皺晒皮,無眼睇打入冷宮放埋一邊!切左件後個賣相都呃得人,雖則樣衰唔討好,但就勝在美味過人!唔駛一陣兩個囡掃淨1/4個,仲猛話:「好香芝士香…好好食!」今次我用左片裝芝士整,下次再整試用忌廉芝士比拼下先得!


日式芝士蛋糕(片裝芝士)(8)


材料: 低筋麵粉60g、粟粉20g、砂糖60g、片裝芝士4


  牛油60g、淡忌廉100g、蛋4(分開蛋黃)、塔塔粉3g


做法:1.片裝芝士、牛油和淡忌廉坐熱水至完全溶解。


2.將蛋黃加砂糖20g,打至淡黃色企身。


3.將蛋白打至起泡,2次下40g砂糖打至企身。


    4.將蛋黃糊分3次逐少加入蛋白糊內拌勻,


    篩入粉類拌勻,再下芝士糊入內拌勻,


    倒入有牛油紙模內,登幾下,焗盆加熱水,170度焗40分鐘至金黃。


**模具外最好包錫紙,以防入水。



2011年3月27日 星期日

手錶蛋糕

  11-3-2011  



今晚又上左神奇女俠屋企學整蛋糕,呢個蛋糕係送比中學同學肥潘架!今次做什果餡,希望聽日帶去卡拉OK個個都會食啦!仲有要多謝神奇女俠與我一起構思這個蛋糕………在此祝肥潘事事如意、青春嬌俏、人見人愛、開心快樂………


酸豆角肉碎河粉

  11-3-2011   






之前係百佳買左呢隻河粉,今日就加啲酸豆角肉碎落去煮,估唔到啲河粉又幾正喎,湯底又得!真係食到我嘴Lam Lam……


2011年3月26日 星期六

咖啡雪糕(附加食譜)

     10-3-2011   


大囡最近與一位相識6年的best friend因少少誤會而攪到絕交無朋友做!但呢位同學實在太過份,不止用粗言穢語善待大囡,更出言單單打打、挑撥離間黎打擊大囡弱小心靈!最離譜係做學童身體檢查時,公然向老師匯報點齊人名,差點害到旅遊巴開出,更差點令大囡獨留在分科診所內,此等行為實在令我氣憤萬分!其實小朋友意氣之爭我地做父母係不應介入,但…但你現在確確實實地欺負我女兒,我絕對不會袖手旁觀,某同學我在此向你鄭重聲明,如果你再傷害我女兒的話,休怪我會作出行動去嚴懲你的罪行!阿囡你又乜冤屈、唔開心,一定要同媽咪講,媽咪一定會幫你解決紛憂,知道嗎?呢款雪糕專程整比大囡食,所以落得5g咖啡油,所以個色唔會太深,亦唔會咁濃味,但又有咖啡香,希望大囡食完會開心啲!


咖啡雪糕


材料:牛奶165g、淡忌廉210g、砂糖50g、蛋黃2隻、咖啡油10g


做法:1.蛋黃、咖啡油和砂糖打至鬆白。


   2.牛奶叮至微熱,倒入蛋糊拌匀,隔篩


        3.淡忌廉打至企身,倒進奶糊內拌匀,放雪櫃雪1小時。


    4.倒入雪糕胆內攪動40分鐘,倒出放回冰格雪1天便可進食。


 


晚餐

      10-3-2011  



細囡為左應付聽日中文合唱團比賽,今日已經成日係度係咁練習,難得見到細囡咁認認真真,確實要讚賞和鼓勵下佢!不過…今晚就無時間溫書啦!攪到我好無奈…最後一次呈分試,當然想傾盡全力去準備溫習,但又見細囡咁有鬥志和興趣……又唔敢擾亂佢心情……唉!做父母真艱難!又想子女向多方面發展,但又想成績理想,真頭痛!


黃芽白魚片(自己至愛)


蘿蔔炒肉絲(全家至愛)


蝦仁炒蛋(大囡至愛)


紅糖雜莓曲奇(附加食譜)

    



10-3-2011剪完頭髮返黎問老公:「好冇睇呀?」老公笑晒口話:「清麗脫俗、高貴大方,我嘅女神幾時都係咁省鏡!」我好認真話:「咪玩啦!好唔好睇!」老公話:「做夫妻一生一世,唔風趣幽默,互相氹下對方,生活咪好枯悶囉!做男人要係適當時候學會口甜舌滑,乜時候正正經經,呢點你老公我識得處理,你放心!」老公其實都講得好啱,係歡笑聲中渡過係最快樂的!見老公咁口乖,就整款曲奇比佢嘆啦!呢款曲奇好鬆脆,加上紅糖嘅香和雜莓嘅煙韌,老公猛話:「好食………」
紅糖雜莓曲奇
材料
:牛油60g、紅糖45g、雞蛋1隻、雜莓45g、
低筋麵粉100g
做法:
1.
牛油和紅糖打至鬆發。
2分3次下蛋打匀。
3.
篩入低粉拌勻,再下雜莓拌匀成麵糰,
4.分成12g一個,搓成圓球壓平,180度焗15分鐘,放涼即成。


2011年3月25日 星期五

火龍果燉奶

9-3-2011  


見有火龍果係度,又手痕痕攞黎整燉奶!都係嗰句滑嘟嘟,真係食極都唔厭………


晚餐

     9-3-2011






好煩!好煩!經開完家庭會議三比一決定工人姐姐無得留低,不再續約!又要去揾工人,好怕!好怕!


雙冬炆火腩(老公至愛)


蒜蓉白菜仔(細囡至愛)


粟米魚柳(兩個囡至愛)


南瓜豆腐肉碎素翅湯(自己至愛)


南瓜豆腐肉碎素翅湯

9-3-2011  






呢包素翅放在係冰格好耐啦!今日就加啲南瓜、豆腐、肉碎和1粒濃湯寶落去煲,啖湯好清甜……


晚餐(附加食譜)

    8-3-2011    



好氣憤呀!海鮮擋主唔老實,花甲$24斤我買左2斤半$60!竟然有13隻花甲係開唔口架!比佢搵笨事少,最弊係我拎到手痛!((咁唔老實真係唔駛旨意我會再幫襯))


芽菜五香玉丁(自己至愛)


青瓜鮮魷(大囡至愛)


豉椒花甲(全家至愛)


清蒸青班(細囡至愛)



豉椒花甲


材料花甲、青紅椒、洋蔥粒、薑、 蒜茸、乾蔥茸 、豆豉、辣椒    


調味料:辣豆辦醬和水各1湯匙、蠔油、生抽、砂糖各1茶匙、胡椒粉


  麻油


做法: 1.花甲浸鹽水吐沙。


  2.出水至花甲微微張開口,沖水備用。


  3.爆香薑、蒜茸、乾蒽 、洋蔥粒和青椒,


    即下花甲和調味料炒至花甲完全張口,贊紹興酒,下辣椒,


    埋生粉獻即成。                


2011年3月24日 星期四

春卷

     8-3-2011  



老公5點半打比我話:「我凖備收工啦!一陣返黎車你出去買生果好冇?」老公咁乖,嗱嗱林係冰格攞之前包好左嘅春卷出黎炸比老公食!衰貪心係咁塞餡料,攪到條條都包到鬼咁粗身,唔靚仔添!雖則我很醜,但我很美味!老公一路食一路豎起手指公話:「好好食…I Iike it…」今次我用左椰菜絲、甘荀絲、肉絲和冬菇絲做餡,炸到脆卜卜,不消一會16條就食晒……下次再包一定唔可以再貪心!


工具

  8-3-2011












今日同大囡食完Lunch,又走左去逛烘焙店,買左以下工具:


轉印紙 $9(1張)


蛋糕紙兜 $9(24個)


蛋糕紙托   $5(10個)


唧花咀 $13(1個)


慕絲模 $5.5(1個)


朱古力六格盒 $10


晚餐

     7-3-2011   






大囡放學返黎話:「今日無功課做,我想執執間房…」我無聽錯嗎?大小姐會自動自覺執房,一啲都唔似大囡作風!見大囡關埋門好耐,咪裝下佢執成點,哦…原來係將佢「林峯」啲海報重新整理貼過,大囡話:「望住靚仔瞓,特別瞓得甜………」其實大囡鐘意左「林峯」8年多啦!逢係有關佢嘅報張、唱片大囡都會收藏,連啲歌曲全部都識唱,迷戀「林峯」指數爆燈……


乾蔥豆豉雞(老公至愛)


黃芽白粉絲蝦米(全家至愛)


薑蔥魭魚腩(細囡至愛)


生菜碎牛湯(老公至愛)


2011年3月23日 星期三

焗蕃薯(附加食譜)

    7-3-2011   



奶奶之前攞左袋姑媽自家種的蕃薯比我,一睇先發現有成22個,唔想成日食蕃薯糖水,一於跟bIog友雀后整焗蕃薯!一路焗全屋已香噴噴,食落口更加正到不得了,又甜又稔又香,兩個囡不停話:「勁好食…超好食…爆好食…」連賣相都同街嘅煨蕃薯無乜分別,今日焗左5條,個個都讚不絕口,我諗過兩日又要再焗先得啦!!


焗蕃薯


材料:蕃薯、冰糖1小嚿


做法:1.預熱焗爐23015分鐘。


   2.用冰糖加水烚蕃薯10分鐘。


  3.焗盤鋪上錫紙,放入焗爐焗20分鐘,反轉再焗20分鐘,即成。



 


肉絲炒通心米線

      7-3-2011   

 





我好鐘意食呢隻通心米線架!不論放湯或炒都一樣爽口彈牙!今日我加左肉絲、椰菜落去炒,就成為我嘅午餐啦!


晚餐

     6-3-2011   



不嬲逢星期日都係出街食飯!不過老公打返黎話超多野做,叫我地自己攪掂!兩個囡又鬼咁有興緻叫我教佢地煮餸,難得兩位小姐肯下廚,我又點會唔應承呢?即時打開雪櫃左摷摷右摷摷,就整左呢餐餸啦!先教洗菜、浸粉絲、切火腿絲、豆腐、醃肉絲、洗浸榨菜、剁蒜茸、煎荷包蛋和炒菜…果然人多好辦事,話咁快就有得開餐啦!兩個囡一路食猛話自己手藝好,啲餸特別好味!


節瓜粉絲火腿(自己至愛)


蝦醬辣椒生菜(細囡至愛)


榨菜豆腐肉絲(兩個囡至愛)


煎荷包蛋(老公至愛)


2011年3月22日 星期二

紅桑子乳酪芝士蛋糕

  6-3-2011    


既然係遲來嘅祝福,當然要打孖上啦!再整多個cheese cake比殘影,一次過滿足晒佢口味!紅桑子酸酸甜甜,配埋芝士嘅香濃,入口好滑好美味!在此祝願殘影生日快樂、學業猛進、身體健康………


士多啤梨乳酪慕絲蛋糕

  6-3-2011  



今日下午開facebook先知道殘影今日生日,嗱嗱林開工補送蛋糕比你!雖然趕唔切今日送比你,希望你聽日收到依然高興………屋企無乜材料,只可作簡單裝飾………


三絲炒意粉

6-3-2011  



過左啦!瀏灠人數過左三十萬人次啦!老公應承我每過十萬人次就會送禮物比我!哈哈…我又呃到份禮物啦!等我唸下買乜先………呢碟就係我今日嘅午餐啦!加左叉燒、肉絲和蛋絲落去炒,再係面上灑啲芝麻,就搞掂啦!