2011年4月30日 星期六

水晶葡萄東凍

16-4-2011    






呢隻康師傅水晶葡萄汁,我地一家人都好鐘意飲!今日又手多多攞黎整果凍,再加小小裝飾,即時靚晒!三父女不知幾鐘意食!


2011年4月29日 星期五

開心果藍莓曲奇(附加食譜)

     







16-4-2011今晚老公又唔記得幫我背脊搽潤膚露就上床瞓!我問老公:「而家係咪年紀大無記性呀?」老公仲捲住張披話:「好眼瞓!唔好嘈!唔好煩我!」我話:「我煩!我不知幾溫婉嫺淑…」老公即時話:「收聲,唔好再嘈!」我繼續講:「體貼入微、善解人意、溫文有禮、大方得體、嬌俏可愛……」老公已經忍唔住係度係咁笑,跟住即刻彈起身話:「你可唔可以比我瞓呀?」我話:「可以!不過唔該幫我搽左背脊先…」老公即時話:「你好野!」我話:「駛唔駛我再唱支歌仔氹你瞓呀?」老公笑住話:「唔駛!多謝啦!」跟住就落床攞潤膚露同我搽背脊…我即時同老公講:「呢個故事教訓你,老婆叫你做乜就要做,如果唔係就疲勞轟炸你,知道嗎?」老公話:「知道,老婆大人!」跟手就折到我哭笑不得………我地兩公婆咁多年黎都愛互相頂撞,往往都令大家嘻嘻哈哈,真係連瞓到瞓得特別甜…老公成日都咁識氹我,梗係要焗款曲奇獎賞下佢啦!呢款曲奇好香口,食落有開心果嘅香脆,又有酸甜嘅藍莓乾,真係好好味呀!


開心果藍莓曲奇


材料: 牛油75g、糖霜65g、蛋半隻、雲呢拿油2滴


低筋麵粉140g、梳打粉2g、開心果60g、藍莓乾20g


做法:


1. 牛油和糖霜打至鬆發。


2.分2次下蛋和雲呢拿油打匀。


3.篩入粉類拌匀,加入開心果和藍莓乾拌匀。


4.搓成長方柱體雪至硬身,取出切片,用180度焗15分鐘,放涼即成。



越式金邊粉

      16-4-2011  






今日試下煮呢包金邊粉!我加左蝦仁、魚片、白菜仔、肥牛落去,再係面上灑炸蒜蓉,真係好正呀!下次要再入貨先得!


紅糖大菜糕

     15-4-2011    


工人姐姐一日飲成3杯咖啡,每個星期都要買煉奶4罐,砂糖亦好快要入貨!工人姐姐食量超低,但就唔覺佢瘦,仲有個大肚腩添。其實飲咖啡真係唔健康………呢款大菜糕加左紅糖,入口又香又甜,老公一路食一路話:「你成日整咁多好野比我食,我個肚腩又點會唔大呢?」我話:「你可以唔食架!!」老公笑住話:「肥同食,我梗係揀食啦!食係一種享受,兼且我係你捧場客,實畀面食到乾乾淨淨………」


晚餐@

     15-4-2011






「小虎」你仲乜咁百厭將阿妹支毛筆啲毛食到光禿禿呀?事隔幾個鐘即刻獲利回吐,連嘔2次,仲不停咳,你話你係咪攞苦黎辛呀?


薯仔洋蔥煙肉(老公至愛)


馬拉盞通菜(全家至愛)


豉椒蒸魚雲(三父女至愛)


2011年4月28日 星期四

Charmmy Kitty蛋糕

     15-4-2011




今日又上左神奇女俠屋企學整蛋糕!呢個蛋糕係送比我大家姐Fanny架!餡料用上現在最當造嘅芒果!呢隻charmmy kitty佢好鐘意架!希望大家姐收到會開心!每次與神奇女俠見面傾談,都有一種和諧舒暢的感覺。更要多謝神奇女俠從旁指導教曉我很多東西……我在此祝願大家姐身體健康、工作愉快和大姐夫甜蜜恩愛!


牛油班蘭曲奇

      15-4-2011    


真係衰!生左粒大痱滋係上唇入面正正中間位,攪到我上唇腫晒!老公一見到我就話:「烈焰紅唇,好誘惑呀!」老公好衰架!人地痛到死,佢仲係度引人笑!呢款曲奇好脆口架!加上細細塊容易食,兩個囡不知食得幾enjoy……


紅桑子大菜糕

  14-4-2011    


工人姐姐而家日日都有新鮮事發生!今日整爛左廚房櫃個調味格膠板,沒有同我講,竟然用膠紙痴番就算數!當我問佢點解爛左嘅?工人姐姐氣定神閒話:「I don't know」…又係駛出佢慣常本色「死口唔認」!算吧!我真係唔想再同一個無藥可救的人再爭辯,慳番啖氣暖暖肚好過………呢款大菜糕我加左紅桑子果醬落去整,入口酸酸甜甜,老公好鐘意食!


2011年4月27日 星期三

晚餐

   14-4-2011  



最怕朋友黎食飯唔提早知會一聲!呢個阿Q仲要一黎就一家三口,死火啦!飯又煲好,餸又煮好,唯有即刻打比老公買外賣鵝翼、半隻燒鵝同3碗白粥,另外再加罐午餐肉同梅菜鯪魚,先開得到飯!都唔明點解次次都唔通知人,等人有凖備?仲要下下玩突擊,真係人都顛!


白菜仔扒姬菇(全家至愛)


蘿蔔炆排骨(大囡至愛)


蕃茄玉子豆腐燴火腿豬柳(兩個囡至愛)


煎午餐肉(細囡至愛)


梅菜鯪魚(細囡至愛)


鵝翼(全家至愛)


燒鵝(老公至愛)


象牙芒大菜糕

13-4-2011    


係百佳見到啲象牙芒好靚,又買左2磅返黎食!仲留起左4個黎整大菜糕,果然清甜美味!三父女一人食完2個後,仲問有冇??就知幾正啦!


晚餐

     13-4-2011






你地話我工人姐姐發乜顛呢?無端端話兩個囡剪爛佢條褲,兩個囡深深不忿話姐姐冤枉佢地,三人激烈地展開罵戰,最終細囡怒氣冲冲「啪」一聲關埋房門,大囡嬲到面紅耳赤,工人姐姐即刻大披冚過頭………我真係真係對賓賓怕怕!面懵心精,平時懶不特止,仲要成日都惡人先告狀,超超超討厭呀!


椰菜肉碎(兩個囡至愛)


五香玉丁榨菜粉絲(全家至愛)


三色椒炒雜丸(自己至愛)


粟米魚肚羹(全家至愛)


2011年4月26日 星期二

瑪利奧蛋糕

      13-4-2011   



今日一早9點就上左神奇女俠屋企學整蛋糕!今次呢個蛋糕係送比二家姐細囝「阿佬」架!我提議將個蛋糕M字改為T字,因為「阿佬」英文名叫Terence,感覺上仲更加獨一無二!今次個餡做左芒果,希望「阿佬」會鐘意啦!神奇女俠點解我地一見面就有說不完的話呢???次次都開開心心歡渡2-3小時!阿姨在此祝願阿佬聽聽話話、生生性性、努力讀書和孝順父母……………


煎pancake

     12-4-2011  









老公今日終於買左個Nikon 18-70mm f/3.5-4.5G鏡頭比我啦!個鏡頭重過之前嗰個好多,我諗我要慢慢適應下先得!老公咁抵錫就煎pancake比佢做宵夜啦!之前係吉之島買左呢包粉只順加蛋和加奶,話咁快就煎好啦!當老公一見到件件都咁厚身即時話:「自家製果然足料……」見到老公好姿游咁慢慢嘆,就知佢滿意啦!


晚餐

     12-4-2011



今日返學校開會招標飯商問題。今年物價高漲得好犀利。睇黎新學年午膳飯盒一定又再次加價,到時肯定又收到好多家長投訴聲音………


蒜蓉菜心(自己至愛)


冲菜蒸肉餅(大囡至愛)


泰式醬比目魚(兩個囡至愛)


咖啡南瓜籽曲奇

12-4-2011


兩個囡漸漸接受到咖啡味啦!今日又再整咖啡曲奇!呢款曲奇好脆口,加埋南瓜籽嘅香,一啖一塊,真係so yummy………


2011年4月25日 星期一

黑豆抹茶凍

  11-4-2011   






我追開套「小娘惹」大結局啦!我唔駛再校鬧鐘10點半起身追劇啦!聽朝可以瞓晏啲啦!呢包粉之前係朝日買擺左係櫃度好耐,今日一於攞黎整甜品!加左少少裝飾即時靚晒又美味!!


晚餐




今日大囡校際團體羽毛球比賽得到季軍,心情總是悶悶不樂!細問之下原來大囡抱怨馮Sir給與她好大壓力,不止場場要大囡殿後壓陣,一有失誤又遭馮Sir大聲怒駡,所以大囡好唔開心!我同老公開導完大囡後,大囡即時食得落飯!


芽菜甘荀炒魚片(老公至愛)


西蘭花雞柳(三母女至愛)


肉鬆蒸水蛋(大囡至愛)


豬腰芒大菜糕

  10-4-2011


尋日個豬腰芒大菜糕叫好叫座,兼唔夠分!今日見雪櫃仲有豬腰芒係度,一於又再encore整比兩個囡食………


滷鵝翼

   10-4-2011  



之前係置樂凍肉鋪見到啲鵝翼又大隻又靚,都係買$16磅,嗱嗱林入左2磅半返黎!今日就加包台灣滷肉粉去滷浸左兩日,嘩!啲味道正到不得了!老公大讚頂呱呱!激讚好入味,仲話:「好味過街買多多聲…」兩個囡仲食到啜埋手指添…………


2011年4月24日 星期日

BBQ生日會

  9-4-2011    










今日二家姐細囝「阿佬」係大欖燒烤樂園開BBQ Birthday Party!我呢個阿姨亦準備左少少甜品黎請大家食開心下!我整左豬腰芒大菜糕、朱古力木糠布甸和芒果芝士蛋糕………其實我每次整野請人食,只係一份心意,但點解次次都要遭同一人惡意抨擊和諸多挑剔呢??次次都要攪到我無癮兼掃興。唉……我係咪唔應該再咁樂意為人付出一切呢?????


可可焦糖脆脆蛋糕@










今日係「小虎」黎左我地屋企1週年啦!阿仔,媽咪多謝你呢1年黎帶給我地全家人無限歡樂和開心。媽咪希望係往後的日子裏,你健健康康,繼續精精靈靈,活活潑潑,陪伴兩個家姐一起成長……呢款蛋糕外內軟,加左焦糖脆脆黎焗,又香又甜,好味呀!


2011年4月23日 星期六

芒果芝士蛋糕7

     8-4-2011   


一路整呢個蛋糕一路受工人姐姐氣!佢嫌我係廚房阻住佢,不停係度「摺摺」聲,又大大力扔毛巾,唉…買佢怕嗱嗱林搬竇出廳整,老公不停安慰我話:「算啦!忍多個半月……」唔知係咪高齡工人更年期呢?不止燥火,仲郁啲就大發脾氣黑口黑面,真惡頂!呢個cake整去聽日BBQ食架!希望各位會滿意啦!


晚餐

       8-4-2011    






今日老公落order話要食蠔仔泡飯。我加左素翅、冬菜、蟹柳、冬菇、肉碎、瑤柱、清雞湯、蠔仔、薑片、蔥粒和炸蒜蓉落去滾呀滾!再拌入白飯和胡椒粉拌勻食,真係超級好味呀!老公仲連食3大碗添……


蠔仔肉碎素翅泡飯(老公至愛)


叉燒炒瀨粉(兩個囡至愛)


蒜蓉白菜仔(自己至愛)


煎咖喱腐皮卷(大囡至愛)


榛果蛋糕仔

     8-4-2011   



呢個大爺近排行得叻左,竟然靜悄悄擅自行過2條馬路去買麵包食。好彩!比麵包鋪職員見到太爺掛住左個安老院牌,於是打比安老院接回太爺。老公知道即時勸告大爺唔可以再咁做,點解92歲會仲咁精靈?而家安老院收窄太爺活動範圍,免再有同類事情發生…………呢款蛋糕仔加左原粒榛果,食落啖啖果香,兩個囡都好鐘意食!


2011年4月22日 星期五

涼拌青瓜2

     7-4-2011  









呢度6條青瓜先買$11,元朗買餸真係好平!天氣熱,整涼拌青瓜雪凍食就最正!我嫲嫲有個習慣,就係將啲青瓜籽挖出黎再加砂糖拌勻,放入雪櫃雪凍黎食,甜甜地確實係一款消暑佳品!老公好鐘意食架!仲可以幫助排便架!不過女士們如果不方便日子就千祈唔好食啦!因為較為寒涼!老公一見到啲青瓜即時陰陰嘴笑住話:「阿鳳,幾時都係你最錫我……」我話:「食野咋!唔駛口乖喎!」不消一陣,成盆青瓜就比我地擦晒!


晚餐

    7-4-2011    



工人姐姐而家越黎越懶,幾乎係踢一下先郁一下,成日側側膊唔願做,麻鬼煩!


黃芽白炒臘肉(老公至愛)


冬瓜扒瑤柱(全家至愛)


酸辣豆腐魚柳(自己至愛)


紅桑子雪糕(附加食譜)

       7-4-2011  

今日大囡突然同我講:「媽咪有個From1肥仔追我呀!佢日日都係MSN度同我Hi,跟住又問我受唔受溝,又四處同人講話我好靚女,而家攪到學校個個都知,另外一個From2肥仔由From l 已經追我,點解鐘意親我都係肥仔黎架!同學個個笑話肥仔特別Iike我呀!」我好開心好開心大囡乜事都同我講,我知呢個囡將來拍拖一定會告知我,並不會隱暪……呢款紅桑子雪糕甜中帶微微酸,好好味呀!加埋脆脆嘅雪糕筒食,真係好正!

紅桑子雪糕

材料:牛奶100g、淡忌廉150g、蛋黃2

砂糖60g、紅桑子果茸50g

做法:
1.
蛋黃和砂糖打匀。

2.牛奶叮至微熱,倒入蛋糊內攪至糖溶,

3.淡忌廉打至7,倒入蛋糊內拌勻,加入紅桑子果茸拌匀。

4.倒入雪糕機內攪拌35分鐘即成。


愛心手信

      7-4-2011  



老公個客送左啲自家生晒嘅魷魚仔比我,足足有成50隻,呢次真係有排食……


2011年4月21日 星期四

枇杷果大菜糕@

  6-4-2011   



今日「小虎」唔知仲乜,成日都唔願郁,又唔食野,又呆呆滯滯,嚇到我好驚好驚。即刻打比老公,老公叫我睇睇佢傷口有無發炎,一睇點解左邊傷口對下全片肉都變到瘀瘀青青架!幣傢伙啦!發生乜事呀?即刻急caII老公返黎帶「小虎」去睇醫生。醫生話:「可能係「小虎」抓到引至血管瘀塞,兼有少少發炎,而家要食抗生素同埋帶頭罩…」聽完醫生講即時鬆一口氣!呢款大菜糕加左枇杷果甜中帶酸,食落啖啖肉,老公猛話:「好味!」


晚餐

      6-4-2011    






細囡今日參加左學校三日兩夜銀礦灣戶外康樂宿營,藉此希望學習人與人相處的態度和遵守紀律,體驗團隊精神。細囡出門同我講:「媽咪,我今晚打返黎一定會喊!」我問細囡:「點解喊呀?」細囡話:「因為我一聽到你把聲就會好掛住你,好想即刻番屋企…」講到呢度個傻豬已經眼濕濕,仲攬住我問:「咁你會唔會掛住我呀?」細囡此語一出,攪到我都眼濕濕話:「掛…梗係掛啦!」今晚家裏無左細囡把聲,好似特別寧靜,攪到我同老公好唔習慣……………


黄芽白粉絲火腿(大囡至愛)


沙爹土豆絲炒肉絲(自己至愛)


麵豉四季豆榨菜蝦乾(老公至愛)


生菜鯪魚肉湯(老公至愛)