2011年5月31日 星期二

晚餐

  14-5-2011



大囡乜都好,最唔好就係太捱得眼瞓,晚晚1點幾先乖乖上床瞓,朝早準時6點半起身,永無懶床架!老公成日都擔心大囡瞓咁少,影響發育同學習思維!唉...睇見大囡個大眼袋,就谷鬼氣!有覺又唔瞓,攪到自己殘哂...


榨菜牛肉粥(全家至愛)


黑椒雞柳烏冬(兩個囡至愛)


焗蕃薯(全家至愛)


煎墨魚春卷(三父囡至愛)


2011年5月30日 星期一

蝦乾曲奇(附加食譜)

   



14-5-2012膽粗粗攞番左啲即食蝦乾黎整曲奇,出奇地兩個囡又接受到,細囡仲話:「我唔鐘意就咁食蝦乾,加左落曲奇度好香好鬆,我好鐘意...」


蝦乾曲奇


材料: 牛油70g、糖霜55g、蛋半隻、高筋麵粉50g


低筋麵粉80g、梳打粉2g、泡打粉1g、即食蝦乾


做法:


1. 牛油和糖霜打至鬆發。


2.2次下蛋打匀。


3篩入粉類拌匀搓成麵糰。


4.輾平壓印圓形圖形,放上蝦乾,180度焗15分鐘,放涼即成。



晚餐

       13-5-2011   






今晚呢個蜜汁豬頸肉口又爽又多汁,個個食完都話正...過2日又入番幾塊豬頸肉先得!


節瓜火腿粉絲蝦米(自己至愛)


薑汁芥蘭炒咸魚茸(老公至愛)


蜜汁豬頸肉豆腐(全家至愛)


莞茜皮蛋魭魚尾湯(老公至愛)


2011年5月29日 星期日

綠茶椰絲朱古力曲奇(附加食譜)




13-5-2011當我同老公講:「瀏灠人數過左400000萬人次啦!」老公即時話:「又過十萬,有無咁快呀!我覺得你依家係度呃禮物囉!」我話:「咁你依家係咪唔認數先?」老公大大聲話:「我有誠信有口齒,講得出做得到,你放心!講呀!今次又想要乜?」我話:「呢排無乜心頭好,就要cash啦!」老公即時舉起4隻手指,我好雀躍攬住老公話:「4萬!多謝老公...」老公即時話:「4萬?由你玩blog呃左我幾多份禮物呀?仲話要4萬...4仟啦!」我扁哂嘴話:「咁你仲繼唔繼續支持我呀?」老公話:「呢個問題仲駛問?梗係繼續捧你場啦!」老公咁抵錫,梗係要整啲曲奇俾老公食啦!呢款曲奇好脆口,入口有淡淡嘅朱古力,仲有椰絲嘅香濃,真係好美味呀!


綠茶椰絲朱古力曲奇


材料: 牛油65g、糖霜55g、蛋半隻、粟粉15g


低筋麵粉85g、綠茶粉15g、椰絲10g、朱古力粒35g


做法:


1. 牛油和糖霜打至鬆發。


2.分2次下蛋打匀。


3.篩入粉類拌匀,加入椰絲和朱古力入內拌匀。


4.搓成長方柱體雪至硬身,取出切片,用180度焗15分鐘,放涼即成。



2011年5月28日 星期六

莞茜皮蛋魭魚尾湯

    13-5-2011   



老公同我都生痱滋,就煲呢個下火湯飲飲。入口陣陣莞茜清香,加埋胡椒粉落去,超正!


燒汁肉片蝦籽撈麵

  13-5-2011






呢隻壽桃牌撈麵,細細個一包,岩哂我地女士們嘅食量。我用燒汁炒左啲椰菜同肉片,撈匀啲麵黎食,真係好好食呀!


2011年5月27日 星期五

朱古力椰果燉奶

  12-5-2011


大囡無端端話:「我唱首歌比你聽,好冇?」我話:「又係林峯?」大囡話:「你聽左先啦!」細心一聽…韓文…仲要識得唱晒成首!我個囡迷韓國歌手迷到走火入魔啦!大囡問我:「好唔好聽?」我話:「好聽!你花時間落去學韓文就証明你叻女啦!不過如果你想更叻,應該放多啲時間在書本上……」現階段小女心態真難捉摸!呢款燉奶入口有濃濃朱古力香,再配埋煙韌嘅椰果拌食,真係好正呀!兩個囡不知幾喜歡食……


晚餐

     12-5-2011






今日返學校開會,唔知仲乜一路開會個頭又暈又脹,唔知係咪趕住去,加上又熱又焗嘅關係呢?攪到我個人呆呆滯滯,完全投入唔到,無心發出提問或滙報情況…………


油麥菜回鍋肉(老公至愛)


三色椒燴釀豆卜(三母女至愛)


青瓜蝦仁(大囡至愛)


青紅蘿蔔粟米豬骨湯(全家至愛)


2011年5月26日 星期四

年糕

      12-5-2011






今日係老公車房開將15週年大日子!我在此祝願『華建汽車公司』生意興隆、貨如輪轉、客似雲來、財源廣進、步步高昇和鴻運當頭………車房全體人員個個健健康康、生生猛猛和勤勤力力……上下一心努力拼搏,為車房更上一層樓!我特意整左底年糕比老公品嚐,老公一路食已經不停讚:「好正!唔甜…夠煙韌……咁好味嘅野,你要成日整比我食先得架!」三父女你一件我一件話咁快就食晒!睇黎又要再整先得!


青紅蘿蔔粟米豬骨湯

  12-5-2011   









細囡話好想飲青紅蘿蔔粟米湯,今日即刻買料煲,細囡連飲3大碗,就知啖清幾清甜啦!


晚餐

     11-5-2011  



太爺一有錢就成日心思思想搭的士去街,諗住唔比錢佢就無事發生,點知一樣係有!太爺走去士多攞人地啲話梅和牛奶,跟住同老板講:「爭住你錢先,等我個孫黎就比錢你……」士多鋪老板於是打比老公,老公話:「老板唔好意思!麻煩住記住賬先,我聽朝一早黎擺低$500,每次我阿爺要乜都由得佢,你照扣數啦!」呢個太爺越老越精靈醒目,真係無佢辦法………


沙茶金菇豬肉丸(兩個囡至愛)


腐乳通菜(全家至愛)


清蒸桂花魚(細囡至愛)


2011年5月25日 星期三

抹茶紅豆奶凍@

   11-5-2011






黃昏時,兩個囡帶「小虎」落街散步,有隻狗走來和「小虎」玩左一陣,就各自歸家。步行途中,「小虎」極力掙扎,大囡捉不住條狗繩,又走狗啦!「小虎」像顛馬般衝過馬路,兩個囡就發矛起勢追,大囡仲追到褲頭鬆,露左一大截底底出黎。大囡事後話:「好瘀呀!醜死鬼啦!等小巴啲人個個都望住我呀!」我問大囡:「點解?」大囡話:「因為我係咁喪叫「小虎,小虎」另外阿妹又係後面係咁喊叫尖叫…」我問細囡:「你見唔見到家姐甩褲呀?」細囡話:「我追追下已經見到家姐甩褲,但係家姐又唔休番起條褲!」大囡即時好激動話:「你仲好講,跑咁慢,旨意你追番「小虎」……好彩我唔停低休褲咋!如果唔係…一定捉唔返「小虎」!」經過一輪你追我逐,大囡終於捉到「小虎」啦!此時患得患失的感覺,攪到兩個囡都落下淚來!兩個囡異口同聲話:「以後我地都唔帶「小虎」落街啦!有陰影…好驚呀!」你隻「小虎」咁曳,罰你今晚無飯食兼罰坐頂公仔!見兩個囡嚇至面青口唇白,就端上此抹茶紅豆奶凍比兩個囡食兼定定驚!好彩!兩個囡食完都識話:「好味……」


藍莓果醬pancake

     11-5-2011  



又買左包pancake粉返黎整下午茶,+蛋+牛奶+橄欖油煎香,每塊搽上藍莓果醬,再圍邊唧上cream,再放上鮮藍莓,不止賣相靚,仲好好味添!大囡仲話:「我唔捨得切黎食呀!」


愛心禮物

      11-5-2011    



今日約左晞媽係甘味食Lunch,呢個客氣鬼請我食Lunch不特止,仲送左包合桃比我,再次向晞媽講句『多謝』………


2011年5月24日 星期二

黑糖大菜糕

  10-5-2011


唉…乜唔係「舊債未還,新債免問」點解老公個三表哥5年前向老公借左五萬黎買農地耕種,今年1月份還左一萬比老公,今日又打電話黎問老公借六萬做回收生意。老公收線後話:「係我最煩,最需要錢銀周轉時,就黎攪我一攪,真係激死!」最終老公在極不願意下,再次應承借出呢筆一去無回頭的辛苦錢比三表哥。我希望老公所有所有親戚都大富大貴,生活無憂,從今以後都唔需要再問我地借錢………呢款大菜糕加左黑糖,入口甜甜,兩個囡都好鐘意食!


晚餐

    10-5-2011    






呢盒廣島蠔塞左係冰格好耐啦!今日就攞出黎炸左佢啦!兩個囡猛話:「好好食……」


蒜蓉菜心(自己至愛)


窩蛋焗肉醬意粉(全家至愛)


酥炸廣島蠔(三父女至愛)


蜜糖煎芝士腸(老公至愛)


蕃茄乾曲奇(附加食譜)







10-5-2011又試攞左啲蕃茄乾黎整曲奇,又一次証明係掂架!蕃茄酸酸甜甜,曲奇鬆脆,細囡非常之鐘意食………


蕃茄乾曲奇


材料: 牛油70g、糖霜55g、雞蛋半隻、雲尼拿香油2


低筋麵粉100g、栗粉25g、蕃茄乾



做法:


1. 牛油和糖霜打至鬆發。


2.2次下蛋和雲呢拿油打匀。


3篩入粉類拌匀,搓成麵糰。


4.分成12g一粒,搓圓壓平,放上蕃茄乾,180度焗15分鐘,放涼即成。


2011年5月23日 星期一

粟米燉奶

    9-5-2011


太爺今日又偷走啦!又自己搭的士落元朗,無錢比車資,的士司機打比老公,老公煩請司機載回太爺返老人院,叫老人院代為比錢。點知司機話:「唔駛啦!我幫你車伯伯返老人院啦!」呢次太爺真係出路遇貴人!不過老公就煩上加煩,又打電話怒罵老人院失當,而家老公有意幫太爺轉老人院……書老公又忟又煩,就整杯滑嘟嘟燉奶比老公嘆啦!加左鮮甜多汁嘅粟米落去,食落特別美味!


晚餐

       9-5-2011  






呢款印尼撈麵我以前啲工人姐姐成日買返黎請兩個囡食架!嗰時好平,而家多人鐘意食,就越買越貴………不過,味道真係唔錯架!


燒汁椰菜火腿撈麵(全家至愛)


菜乾瘦肉粥(老公至愛)


蒜蓉西蘭花(自己至愛)


大包和流沙包(三父女至愛)


護膚品

9-5-2011  









夏天一到,皮膚特別油脂旺盛容易生暗瘡,又要去莎莎入返啲眼膜、面膜同暗瘡水先得!售貨員肥媽次次都送好多辦仔比我試用!今次仲再送化粧袋同2支手霜,埋單折實$1405…


2011年5月22日 星期日

湯年糕

     9-5-2011    






之前係佳寶買左呢包年糕,包裝袋後教整湯年糕,一於照跟住整!我加左紫菜、榨菜、蛋、蔥粒和濃湯寶。呢隻年糕唔止稔仲好煙韌!又有得食又有得飲,真係好正!大囡不知幾鐘意食,仲叫我下次再整多啲………


2011年5月21日 星期六

angry bird蛋糕@

       9-5-2011  









今日又上左神奇女俠屋企學整蛋糕!呢個蛋糕係整比即張離任嘅工人姐姐jenny!兩個囡一知道我要整蛋糕比姐姐時,異口同聲話:「佢咁衰…你送比佢仲乜呀?」我話:「雖則姐姐係衰,但呢兩年佢確實為屋企出過一分力,送呢個蛋糕比佢合情合理……」大囡即時提議:「整angry bird比佢啦!成日發脾氣,皺埋眉個樣似到十足十………」雖然呢兩年真係比工人姐姐激到飛起,話到尾都同一屋詹下相處左2年,多多少少都有感情,況且無功都有勞……我亦買左個手袋送比工人姐姐!我在此祝願姐姐生日快樂!轉到新工作環境事事稱心滿意,與僱主融洽相處……


北海道牛乳咖啡布甸(附加食譜)

     8-5-2011   












今日係母親節!我家兩隻小靈精一早就閉上房門,又唔知攪乜東東!原來係電腦facebook度寫左啲祝福語送比我。另外第一支康乃馨係工人姐姐送,第二支係細囡送,兩個囡仲寫左張心意咭比我。每年正日都要同媽咪一行18人去酒家食飯慶祝母親節,老公呢排好多野煩諗唔到送乜比我,仲承諾有拖無欠…………其實做媽媽係呢啲特別節日,最大願望都係想兒女聽教聽話、身體健康!呢款布甸用左北海道牛乳整,入口又香又滑,我加左啲咖啡油落去,食時再灑上咖啡粉,真係好好味呀!


北海道牛乳咖啡布甸


材料:北海道牛乳350g、淡忌廉150g、砂糖40g、咖啡油8g


    魚膠粉7g、水40g


做法:1.魚膠粉+水隔熱水坐溶。


    2.朱古力隔熱水坐溶。


    3.北海道牛乳、淡忌廉、砂糖和可可粉.用細火煮至糖溶,隨即下


  魚膠粉水拌勻,再下朱古力醬拌匀,熄火。隔篩1,放涼。


    4. 倒入杯內雪3小時即成。


2011年5月20日 星期五

晚餐

     7-5-2011  



忙左一日,老公又要去飲人地壽宴,我又可以偷懶唔煮飯!見仲有魚蛋淨左係度,就炒多個麵焗雞冀算數…………


瑞士汁火腿炒拉麵(兩個囡至愛)


咖喱魚蛋(全家至愛)


蒜香焗雞翼(兩個囡至愛)


2011年5月19日 星期四

咖喱魚蛋

     7-5-2011  



























今日大囡啲同學仔黎屋企做專題研習,我準備左以下食物招呼佢地,有:咖喱魚蛋、紅豆雪糕、士多啤梨芝士蛋糕、伯爵奶茶葵花籽曲奇、咖啡椰奶腰果曲奇、紅莓杏仁燕麥曲奇、麥提莎糯米糍和IMAGE de MARY朱古力。希望佢地一邊做一邊食,專注搜集資料,能夠做一份完善又滿意的專題研習………