2011年10月31日 星期一

蛋花大菜糕2






23-9-2011對手一整開就唔識停,又整多個蛋花大菜糕比曾太品嚐…………


 


 

 

 

2011年10月29日 星期六

藍莓大菜糕




23-9-2011呢款大菜糕都係整比曾太品嚐架!入口酸甜兼爽口,味道真係唔錯!

 

 

 

熱情果慕絲蛋糕







23-9-2011呢個慕絲蛋糕係整黎送比曾太架!第一次整熱情果,原來入口第一啖好酸架!但一路食就漸漸唔覺酸之餘仲越食越好味!希望曾太鐘意啦!大家覺得邊張相靚啲呀,唔該比比意見!!!!

鹽焗腰果

 




22-9-2011想焗腰果好耐架啦!今日終於的起心肝焗!腰果夠脆口,但就唔夠鹽香,下次要落多少少粗鹽先得!焗左1斤咁多,梗係又請啲比曾太食啦!!!

\心心



2011年10月28日 星期五

玉米片橙皮曲奇(附加食譜)







22-9-2011呢款曲奇都係整比曾太架!!!見阿囡早餐食淨左啲玉米片係度,我又攞埋黎整曲奇!第一次用橙皮整曲奇,估唔到味道又幾香喎!大囡超鐘意食,猛話:「入口又甘又甜又香又鬆又脆,肯定曾太會鐘意……」


玉米片橙皮曲奇
材料
:牛油60g、黃糖40g、蛋半隻、橙皮25g(切粒)


   低筋麵粉80g、玉米片30g(壓碎)、奶粉10g



做法:1牛油和黃糖打至鬆發


         2.次下蛋打勻。


         3.篩入粉類拌勻,加入玉米片和橙皮拌匀成麵糰。
         4.用湯匙取麵糰10g一個,用170度焗15分鐘。放涼即成。


晚餐







22-9-2011見街市啲蠔仔都幾靚,買左2斤返黎整泡飯。我加左肉碎、冬菜、蟹柳、蠔仔、冬菇、素翅和清雞湯做湯底,食時再灑上蔥粒、乾蒜頭和胡椒粉拌食!4嘜半米又掃到乾乾淨淨,就已經知又幾正啦!!!仲有細囡今晚無所事事竟然提議將魚蛋逐粒串起食,點知老公超鐘意咁嘅安排,仲話:「咁食先有特式…………」話時話原來串魚蛋一啲都唔易架!差啲串到我頭暈花………………
蒜蓉西蘭花(自己至愛)
蠔仔泡飯(全家至愛)
酬神肉(老公至愛)
咖喱魚蛋(全家至愛)



 

 

冧酒葡萄球(附加食譜)







22-9-2011呢款曲奇都係整黎送比曾太架!用上冧酒浸葡萄乾,入口零舍香濃美味!呢款曲奇好鬆化,兩個囡試食完都話:「正………」一口一個,希望曾太鐘意啦!!!



冧酒葡萄球
材料
:牛油70g、糖霜35g、萄葡乾30g、冧酒15g


   低筋麵粉120g、杏仁粉10g



做法:1.萄葡切碎,加入冧酒浸30分鐘,搾乾水備用。
         2.
牛油和糖霜打至鬆發。


         3.篩入低粉和杏仁粉拌勻成麵糰,


            放入雪櫃雪半小時。


        4.取出量10g一個,搓成圓球,180度焗15分鐘,放涼即成。


2011年10月27日 星期四

藍莓杏仁曲奇(附加食譜)







22-9-2011呢款曲奇係整黎送比曾太架!答謝佢幫我攞林憶蓮演唱會飛!呢款曲奇好鬆脆,加入酸酸甜甜嘅藍莓和香口唧杏仁粒,希望啱曾太口味啦!

藍莓杏仁曲奇


材料:牛油50g、糖霜35g、杏仁粉20g、低筋麵粉l00g


         牛奶15g、藍莓35g、杏仁粒35g


做法1.杏仁粒用150度焗5分鐘,放涼。
        2.將藍莓和杏仁粒切碎。
        3.低筋麵粉過篩,加入杏仁粉、糖霜和
牛油,用手搓揉至鬆散粒狀,
           加入牛奶、藍莓和杏仁粒,繼續用手搓揉成麵糰,放雪櫃雪至硬身。
        4.將保鮮紙放上麵糰上輾平,壓印圖片,
          用170度15分鐘,放涼即成。  


   


  


茶葉蛋2(附加食譜)



 


22-9-2011而家街買茶葉蛋不止貴,最慘係唔知衛唔衛生!自己整不止價廉物美,兼且保証衛生!今日一次過整左20隻,留過夜明天先食!!!!!試食報告報告,茶葉蛋好入味!補習姐姐HeIen激讚:「好好味…好好食!」我抽起左10隻請曾太品嚐………

茶葉蛋


材料:雞蛋20隻 
調味料: 八角6粒、1湯匙、老抽3湯匙、 生抽2湯匙、普洱茶葉6湯匙
  
片糖1少片 


做法:1.把雞蛋放進冷水中烚10 分鐘至全熟,用匙羹輕輕把蛋殼敲裂[不可太大力]
  2.
把雞蛋放入鍋中,注入清水蓋過雞蛋再多少少,下調味料煮滾,蓋上蓋用
 
 細火煮個半鐘後熄火,再浸焗2小時即可! [隔夜返煲更入味]


……

工聯會健康素食美點精選實習班第1堂



 














22-9-2011我同晞媽又報左呢個課程學野!今日第一堂,只遇番兩個舊學員,不過Miss就依然中氣十足!今堂教整鮮人參燕窩桂花糕同芒果素海鮮威化卷!Miss話我哋呢堂物超所值!因為真係用上靚燕窩碎整!呢個桂花糕聞落不止有人參香,咬落仲有絲絲燕窩,加埋清香嘅桂花,食完真係好滋補!另外學整海鮮威化卷,基本上唔難整,炸完出黎賣相都唔差,味道直情同酒家一樣,正!Miss好細心,怕我地熱氣,仲焗左啲桂花水比我地飲……………

 

 

 

2011年10月26日 星期三

師公寶誕飯宴

























21-9-2011今晚去黃大仙新光食師公誕飯宴,會場延開17席有歌舞表演和舞獅表演。飲宴中段開始有競投,近來大家姐較多事煩擾,所以老公投左個$3880笑佛吊咀送比大家姐,希望大家姐遇上煩惱時便拿出來望望個笑佛,令自己可以開心啲!我見過笑佛咁靚,咪諗住影低相和大家分享!我影笫一張好曚,咪再影第二張又係曚,於是再影第三張都係曚,突然坐隔離的師傅叫我唔好影,開左光嘅玉係影唔到架!!!既然係咁咪食野囉!隔左一陣,攞部相機睇睇,我同老公都大嚇一驚,點解唔見左嗰3張相架?隔離師傅話:「嚿玉唔想比你影,你就唔好再影啦…」跟住阿哥投左個龍吐珠吊咀$4880,而老公就投左壓軸寶玉吊咀,經過多輪熱烈競投,最終老公以$13888投得心頭好!我都唔敢再同啲寶玉影相!食過寶誕飯全年開心健康,做生意鴻運當頭,事事順利,打工嘅長做長有,小人遠走……………師公還會保佑各人順風順水!

鮮茄牛肉蝴蝶粉







21-9-2011今晚要去食師公誕飯,出門前煮左個健康有益蝴蝶粉比兩個囡食!我加左4個大蕃茄、半個洋蔥、2碗水和1罐牛尾湯落去熬湯底,再加上牛肉拌上蝴蝶粉就搞掂啦!見住細囡連湯都飲晒就知正啦!!!!

藍莓益力多芝士蛋糕4










21-9-2011我從小就好鐘意睇太陽落山,望住一片雲霞和微微的陽光,心情都會特別舒暢!再一面嘆住呢個cake,真係又開心又滿足!

 

杏仁合桃曲奇(附加食譜)













21-9-2011唉…唔知邊個衰司機無厘醒目,6點就打黎嘈醒老公,仲要係電話撻着老公把光,攪到老公冚線之餘嬲到瞓唔返覺。知老公燥燥地,為免睇老公面口,拿拿林起床避難揾野做,係冰箱摷左條存貨出黎,解凍一陣即切片放入焗爐焗,兩個囡一起床就有香噴噴鬆脆可口曲奇做早餐,再加杯朱古力亞答子,兩個囡不知食得幾開心!

 

 


杏仁合桃曲奇


材料:牛油150g、糖霜70g、雞蛋1隻、低筋麵粉200g
         合桃肉(一開二)80g、杏仁(一開二)50g


做法.1.先將牛油與糖霜打勻。


          2.分3次下蛋液打匀。


        3.篩入粉類拌勻,下杏仁和合桃入內拌匀成麵糰。


        4.搓成長柱體放入雪櫃雪至硬,取出切片。


        5.放入焗爐用160度焗 20分鐘即成。


2011年10月25日 星期二

龍眼大菜糕











20-9-2011呢個老公夾硬強迫我換電話,其實我係一個極之怕換電話之人,點解?因為我適應能力慢囉!另外水晶甲嘅關係用輕觸式極之不方便!不過見老公興致勃勃咁想換電話,無奈地只可應承!天呀!我又唔知要摸幾耐先摸得熟部電話呀!!!另外one2 fre出eiphone送廸士尼門卷2張。見仲有龍眼買兼又爽甜,又攞左啲黎整大菜糕,老公食完話:「又爽又甜,好味!」

 

白汁雞肉丸意粉






20-9-2011今晚要去做婦科檢查,出門前整個宜家雞肉丸,加薯仔和意粉,拌上白汁兩個囡不知食得幾開心!

 

晚餐@


 











19-9-2011「小虎」唔知仲乜大脾位有粒野仲結埋焦,嚇得我即刻帶「小虎」去睇醫生,醫生話:「皮膚病,塗藥膏便可………」仲同「小虎」剃左啲毛,埋單$320!睇獸醫真係好貴!
麻婆豆腐(全家至愛)
大白菜鯪魚肉(老公至愛)
蝦皮蒸水蛋(大囡至愛)

2011年10月24日 星期一

西瓜雪糕(附加食譜)

























18-9-2011今晚又係一家人去百佳入貨,例牌3架車爆滿,雖然逛百佳係一件好普通的事,但一家人有傾有講唔知點解總係特別開心和溫馨!又完貨就去醫肚,兩個囡話想食魚米家,話時話個魚腐真係好正!食飽飽就返屋企食雪糕。呢款西瓜雪糕唔止滑溜,入口仲好香甜兼有西瓜味,老公猛話:「超掂……好好味…好正!」


西瓜雪糕


材料:淡忌廉190g、牛奶100g、砂糖40g、蛋黃2


      西瓜茸150g


做法:1.蛋黃和砂糖打至鬆發。


      2.將牛奶叮至微熱,倒入蛋黃糊內拌匀,隔篩,放涼。


      3.淡忌廉打至七成,倒入牛奶糊內拌勻,放入西瓜茸。


        4.倒入雪糕胆內攪動35分鐘,盛起放入冰格,


    雪一日便可進食。