2012年10月31日 星期三

小吉蛋糕

 



28-9-2012今日又上左神奇女俠屋企學整蛋糕!呢個蛋糕係送比阿嫂架!舊年送左個小雲蛋糕,今年就整埋個小吉,呢次真係『小雲同小吉好重要』!在此祝願阿嫂身體健康、工作順境、減肥成功……………整好蛋糕我同神奇女俠去食刀削麵醫肚!!

澳門腰果曲奇(附加食譜)

 

28-9-2012奶奶好鐘意食果仁類,就整個腰果曲奇比奶奶嘆!呢款曲奇又鬆又脆,yummy………

澳門腰果曲奇

材料: 牛油75g、糖霜75g、雞蛋1隻、蛋黃1隻、雲尼拿香油2

低筋麵粉105g、奶粉20g、吉士粉10g、腰果70g

做法:

1. 牛油和糖霜打至鬆發。

2.分4次下蛋和雲呢拿油打匀。

3篩入粉類,加入腰果拌匀成麵糰。

4.搓成正方形放雪櫃雪至硬身,取出切件,180度焗15分鐘,放涼即成。


夏威夷果仁朱古力曲奇(附加食譜)

 

28-9-2012奶奶聽日黎,我又要開工焗曲奇啦!加左夏威夷果仁和朱古力食落口感超豐富!!

夏威夷果仁朱古力曲奇

材料: 牛油85g、黃糖50g、雞蛋半隻、雲尼拿香油2

低筋麵粉120g、梳打粉3g、夏威夷果仁50g、朱古力粒30g

做法:

1. 牛油和黃糖打至鬆發。

2.下蛋和雲呢拿油打匀。

3篩入粉類,加入夏威夷果仁和朱古力粒拌匀。

4.分成12g一粒搓圓微微壓平,用180度焗15分鐘,放涼即成。



2012年10月30日 星期二

晚餐

 
27-9-2012大囡聽日做義工賣旗,我同老公全晚不停話:「先生,唔該買支旗呀!小姐,唔該買支旗呀!婆婆,唔該買支旗呀!………」攪到大囡哭笑不得!
黃芽白榨菜魚片(全家至愛)
白菜心豆豉鯪魚(全家至愛)
粟米香腸炒蛋(三母女至愛)

晚餐

 

26-9-2012今日買呢餐餸差啲唔見左五仟大元!話說我買完菜拎轉頭就行,行左3步大囡隨後不停叫「媽咪,媽咪……」,我一拎轉身大囡就指住地下叠錢話:「有人跌左錢呀!」我即時九秒九衝前執番話:「我跌架!」跟住菜擋阿表望住我話:「咁呢度有幾多錢呀?」我話:「3張一仟,4張五百………」然後拎比個阿叔睇,阿叔睇完點點頭話:「下次小心啲啦!啲錢無記認架!」點解我會咁清楚叠錢,因為我係銀行襟出黎比阿媽家用!好彩執番,如果唔係肉赤死我!
青瓜牛肉(大囡至愛)
薑汁芥蘭(老公至愛)
酸辣魚柳(全家至愛)
芫茜皮蛋鯇魚尾湯(老公至愛)

愛心手信


26-9-2012神奇女俠剛剛去完北海道旅遊,買左以下手信給我,在此多謝神奇女俠的美意……

2012年10月29日 星期一

喬巴蛋糕

 

26-9-2012今日又上左神奇女俠屋企學整蛋糕!呢個蛋糕係整比侄女AngeIa架!呢期佢至愛呢隻公仔,希望佢鐘意此蛋糕啦!姑姐在此祝願AngeIa繼續聰明伶俐、學業進步,最緊要係孝順父母!!!整完蛋糕我同神奇女俠去左「小巴黎」醫肚!

晚餐

 
 
25-9-2012因老豆聽錯一個字,竟然胡裡胡塗比左二家姐個電話號碼我的初戀情人!就係咁佢而家曰夜不停煩擾住二家姐,早上8點凌晨2點都電話響不停,攪到二姐夫有微言,仲話要開片鬧佢鑊甘!其實佢不停煩住二家姐,目的就係想同我聯絡!我真係…真係好有衝動打比佢講清講楚!但老公又叫我唔好中計,話佢做咁多野無非係想聽到我把聲!呢啲人顚多一輪就無野!個個都叫我靜觀其變,但我自己良心真係過意唔去!自己當年惹的禍,就讓我一人去承擔吧!我真的不想連累其他人受罪!謝朗輝我保你大,20年啦!唔該你咪做痴心漢啦!唔該你正正經經揾個女仔組織家庭啦!我的生活裏唔想有你的存在,唔該你忘記我啦!唔該你唔好再煩我屋企人……
馬拉盞椰菜(全家至愛)
絲瓜雲耳肉片(三父女至愛)
香煎比目魚(全家至愛)

西瓜燉奶


25-9-2012滑滑燉奶配香甜西瓜,真係yummy yummy架!

2012年10月28日 星期日

晚餐@

 

24-9-2012終於完成晒所有月餅啦!食完飯趴起地下同小虎玩,點知玩玩丅竟然瞓着左,細囡就即時拍左呢張相啦!你地睇下連小虎都陪我瞓覺呀!
西蘭花蝦仁(三母女至愛)
節瓜粉絲肉碎(三母女至愛)
清蒸黃花魚(三父女至愛)

廣式芝麻豆茸月餅

 
 

24-9-2012仲有少少皮淨,就整左3個芝麻豆茸餡,味道又可以喎!!!

2012年10月27日 星期六

廣式翡翠蓮蓉蛋黃月餅

 

24-9-2012整開停唔到手,再黎翡翠蓮蓉蛋黃月餅,一樣係包上半隻咸蛋黃,老公食完話:「唔錯,幾好味!」

廣式白蓮蓉蛋黃月餅

 
24-9-2012見有盒白蓮蓉未開,就嘗試自己搓皮整,只加入半隻咸蛋黃,三父女大讚:「唔甜,好好味!」既然你地咁欣賞,出年我一於自己搓皮整!