2013年9月28日 星期六

番石榴雪梨汁@

 
 
 
 
 
 
 
 
 
 
 
 
 
 
 
 
27-8-2013昨晚等了一夜工人姐姐還是未返,急急打比僱傭公司求助,致電去印尼又揾唔到工人姐姐,僱傭公司即叫我睇睇工人姐姐個衣櫃仲有幾多衫係度,一睇先發現淨下4套睡衣、5條牛仔褲、7件長袖衫、1件褸和3對鞋,已心知姐姐是全心不回來的,自己即是嬲到眼淚狂流,點解你還在5月26日和我續約?點解要不辭而別一去無回頭??點解快將要搬屋你先黎玩我???難道這2年裏我真的待你不好嗎?明天就要出發去華欣旅遊,過幾日又要開學,新屋又要準備清潔,突然比工人姐姐跣一鑊,個心真係好噏…好噏!此刻最煩係去了旅遊五日四夜邊個幫我照顧「小虎」呀???害得我急急四圍打電話揾人收留「小虎」,終於揾到有間狗鋪肯接收「小虎」啦!抱住「小虎」去狗鋪途中,眼淚已不停落下,繼而失控大喊,嚇得老公不停問:「仲乜事呀?」我不停講:「唔捨得掉低「小虎」,我驚佢唔慣…六日都要困係個籠度,無得活動自如,我覺得「小虎」好慘…」老公話:「唔送去狗鋪,唔通由得佢係屋企咩?係狗鋪此終有人睇住,有乜事人地會通知我地!」我同老公講:「你由得我喊啦!我尋晚成晚瞓唔著,擔心姐姐會唔會發生左意外,自己擔心到流眼淚,到今日先知原來我好儍好蠢,唔做咪唔做囉?仲乜要講大話呃我呀?明知我對手不能出力做野,而家屋企無人幫忙點算呀?」老公話:「佢咁做係有唔啱,但你亦好難怪人地,可能你地一家團聚後覺得親情勝於金錢呢?又或者人地做到攰想抖抖呢?」我話:「我諗住佢放大假一個月就會返黎,完全無諗過佢一句都無交代就一走了之,總之就係佢唔啱!」自己親手抱「小虎」入狗籠,見住隻傻豬不停抓不停吠,角己眼淚又流下!返到屋企見唔到「小虎」跡影,又爆喊!點解去旅遊前要攪到心情咁差??既然無心情今晚又要食外賣,幾日不在家就清埋雪櫃啲生果啦!切嘅切,食嘅食,還淨下有番石榴和雪梨,咁就攞黎榨汁啦!心情差透時呢杯美味果汁算是苦中作樂啦!


2 則留言:

  1. 2010年住在我隔鄰因太太中風,請咗姐姐係家照顧,我哋街坊都好錫佢,知她辛苦,有時都會請佢食嘢,嚟咗3-4個月,有日年初二隔鄰問有冇見過佢姐姐,我哋話冇,因年初一個個都外出啦,佢又係咁話外出咗,家中又係剩下衣服同家中鎖匙,咁我哋街坊第一時間叫佢報警,探心佢唔知發生乜事,僱傭公司都找她不到,到現在我家都冇問姐姐情況,因屋主太太過幾星期都走了,,但我都覺得佢哋好過份,做得辛苦都唔可以粒聲唔出走咗架嗎,當時屋主家人個個都要返工,搞到人家一腳踢,好在我哋隔鄰輪流看住那太太至她仔女回家先搞得掂,仲記得你仲整咗美味食物給她家人,佢當時都冇異樣仲要同你續約都好勁呀,現在情況好點嗎,放心,船到橋頭自然直,唔好為咗呢種人而嬲,一定有方法解決,想着你有家人支持一定可以捱過,加油............mable

    回覆刪除
  2. 揾到淨係係電話喊同我Sorry,sorry……我都嬲佢唔落,只好叫自己小心!而家日日都好忙好忙,仲要不停問人點搬bIog煩上加煩…好彩兩個囡都好生性知我忙都有幫我分擔下啲家務黎做!新工人姐11月中先到,我還有排捱呀!甜心屋多謝你的支持……

    回覆刪除