2014年3月26日 星期三

牛油粟米

 
 
27-1-2014救命呀!朝早6:30主人房廁所不停有噗噗聲,打開廁板睇啲水不停有氣泡,老公再落客廁睇,地下去水位已滲水,老公即時打比阿祺求救,點知不到半小時客廁坐廁就不停湧屎水出黎,嚇得我同工人姐姐手忙腳亂係咁清潔,剛停手10分鐘又再次湧出黎,清潔完拿拿聲跑出管理處搵管理員代找通渠公司,自己心急關鐵閘竟然夾爆左中指指甲,又腫又流血,痛到我眼淚水狂標出黎。因為年廿七關係,好多公可已收爐了,打了多次電話終於搵到有通渠公司肯幫忙,不過要5:30先到,原以為自己唔沖廁唔洗手就無事,點知原來樓上一沖廁一様會湧屎水出黎,我同工人姐姐又狠狽地清潔,馬上至電樓上吳生懇求他們暫時不要沖廁 。阿祺黎到攪左4粒鐘還是找不到源頭,阿祺和我講:「MABEL,對唔住,幫唔到你!」聽完心裹更加茫然慌張!全日一步都唔敢離開間屋,自己又唔敢飲水、又唔敢痾尿、肚餓都無晒胃口食野,清潔嘅情境是何等厭惡,邊做邊作嘔,而家諗起都反胃。通渠師傅到原以為有救星打救,點知師傅嫌我未打開化糞池蓋,竟然唔肯幫我整,仲不停講粗口話我比麻煩佢,阻住佢搵食。樓上吳生馬上衝落黎代我出頭反問師傅:「點麻煩你呀?而家唔係比生意你做咩?」師傅話:「你蓋都未開!」吳生話:「我而家拎架生同你開!你即刻整呀!」師傅話:「我而家唔得閒同你做!」吳生即時發火話 :「咁你黎仲乜X野?」師傅又發惡話:「我費X時同你講,小姐你開左蓋就再CALL我,呢張我咭片!」吳生即時話:「呢啲係做生意咩?要佢張咭片仲乜?扔X左佢啦!」一場歡喜一場空已經好慘,仲要無緣無故比人鬧到一面屁,再加上見到屋企污煙脹氣,眼淚亦再忍唔住流出。突然好感觸,早上已麻煩了阿祺一個上晝,最唔好意思係今日是阿琴生日,阿祺特登放假陪老婆慶祝生日,我還害了人家一早上頻頻撲撲,自己個心真係好過意唔去!另外感觸係搬來住左11天,完全無諗到左鄰右里會咁好人,吳生比左屋企鎖匙我叫我地上去沖澡和如廁!大囡見我咁擔心,馬上上網搵24小時通渠服務,幾經辛苦終於有師傅肯8:00出勤啦!費用$3000,剛好老公和雞批也趕回來幫忙,個化糞池蓋合二人之力終於開到啦!不過就報銷了一塊磚了!整了2個半鐘用高氣壓槍終於泵了一團污物出黎,最令人意想不到係有一塊大腿咁長嘅發泡膠係化糞池入面,點解啲建築工人咁無公德心架?乜野垃圾都亂咁扔架?衰得我忙足一日之餘,最慘係攪到間屋臭氣薰天。整完已10:30全家都無一個有胃口,見雪櫃有12支粟米係度,就起粒黎整牛油粟米,加上蜜糖就成為我們的晚餐了!

6 則留言:

  1. 聽到都心寒,若當時人係我一定狂喊,可能連清潔都唔敢,你真係一個超人,可以搞得掂,仲有你哋好人,所以朋友都係咁好幫手,咁現在係咪搞掂唔會再發生架?

    回覆刪除
  2. 睇到都覺你哋果日有幾辛苦!

    回覆刪除
  3. mabel:
    ~我一路睇你依篇blog, 我就諗,會唔會你早排新屋裝修, 所以影響啲通渠. 不過, 好彩最後都揾到人幫手.
    ~不過值着依件事, 比你知道, 你啲鄰居,原來好好人.

    回覆刪除
    回覆
    1. 我都係咁諗,原來係另有原因
      係呀!個個都好好人!

      刪除