2015年1月28日 星期三

晚餐






15-1-2015激氣,好激氣,識我的朋友都知我唔講粗口,但對我個極品工人姐姐,實在忍唔住要連環爆粗!事緣搭輕鐵去買餸,先發覺姐姐未比番張八達通我,我同姐姐講:{張八達通係你到呀!}姐姐即時好惡話:{我好早之前已經比番你!}我話:{無...}姐姐好大聲兼瞪大對眼話:{我已比左你,係你自己忘記左...}我話:[真係無!總之一陣買完餸,返到屋企你再搵搵啦!而家我買飛比你用先...}就係咁姐姐已經黑口黑面,當車門打開時姐姐仲即時走前一卡上車,到站落車後我先發現姐姐原來無落車,我打比姐姐問佢識唔識行去街市,佢超大聲話:{識...我係街市等你...}會合姐姐後,我問姐姐:[仲乜你頭先唔落車?}姐姐唔出聲,我再問多次:{仲乜你頭先唔落車?}姐姐直情擰轉面唔睬我,我當時已經好嬲!不過費時係街同佢嘈,我吞聲忍氣買餸先!回到家放低餸,我先自己搵搵櫃桶,的確搵唔到八達通,我就同姐姐講:{你入房認真搵搵呀!]姐姐突然衝前拍落廳個地櫃大大聲話:{我一早放左係度,係你自己唔知放左係邊...}我話;[我真係無拎過,你入房搵下啦!}點知姐姐話;[唔使搵,我-早比番你,你唔信就算...}我話;[搵到就搵,搵唔到就算,我聽日買過張比你...]姐姐話;[你認為我係小偷我無辦法...]我聽到時超嬲話;[我而家叫你去搵下你都唔肯,你服從性超低,仲有你唔需要瞪到隻眼咁大,兼唔需要咁大聲同我講野....}點知姐姐話;[我無大聲,係你冤枉我,係你懷疑我偷野...}我即時話:{我從來無懷疑過你,我又何來冤枉你,一張八達通值幾多錢?唔見左咪唔見左囉!有乜咁大件事?係人都會唔小心整唔見野!我去旅行全間屋得番你一個,我都唔驚,而家我使驚你偷我張八達通?你係咪痴線架!}姐姐發晒顛話:[我知我做乜你都唔滿意...}跟住大喊話:{總之而家你冤枉我就唔得...}此時大囡落黎問我:{仲乜野?}我話:{小小事放落佢度就變大事,你同佢講咪再講啦!做野啦!}突然姐姐大叫:{我要講,我要講,今日我一定要同你講清清楚楚....}豈由此理叫左收聲唔好再講,你偏要出聲,激到我係廚房扔3包公仔麵落地話:{我唔該你收聲,唔好再講野,stop...}姐姐衝前指住我話:{你唔比我講,我就要講,係咪工人就係工人?係咪你出糧比我就大晒?}我話:{係....}痴缐姐姐即時拎件衫狂拍落地下,大囡埋去叫佢冷靜,冷靜,佢跳地話:{唔得...唔可以...}我行埋姐姐面前問佢而家係咪想打人,姐姐竟然係我面前揮拳兩下,大囡行埋黎拉開我叫我小心啲,姐姐繼續放聲嚎哭大叫話:{我在這裏每天都過得很苦,點解你地一家人唔可以當我係屋企人看待?點解你地成日有好野食?點解你地成日有新衫著?}姐姐已經去到不受控制地步,此時的我已去到忍無可忍地步,要終此姐姐唔好再發花顛,我突然用盡氣力尖叫不停,大囡拖住我手話:{而家連你都唔冷靜,你快啲上房...}經我這一叫姐姐終於收聲!細囡拖姐姐入廁所,叫佢洗個面冷靜下!呢個死人姐姐仲大喊話:{唔得...你媽咪睇我唔起...}對住個咁嘅姐姐我真係無法冷靜下來,我指住姐姐話:{你鐘意講就繼續講飽佢,我對得住燈火講我對你仁至以盡,來第一個月已問大囡借錢,借足3個月,我都算叫你唔好問一個唔識搵錢的學生借錢,你話我家裏有鬼,妖言惑眾我都忍你,你要我幫忙2次,我亦借錢比你,總其$8000,你鐘意放假邊日都得,衣食住行我從未刻簿過你,我咁對你,你都話你過得苦,我今日終於知乜野叫好人當偷扮,我呢個僱主你都話衰,你唔好再係香港打工啦!香港唔適合你...}姐姐板著臉話:{隨便你鐘意點講就點講...}我話:{唔該你唔好再出聲講野....}呢個死仆街姐姐話:[我係有權講野...}我嬲到連環爆粗狂插佢,細囡硬拖我上房話:[佢已經痴左線,你唔好再同佢嘈啦!快快炒左佢...}一躺上床就心絞痛、胃痛和呼吸困難,嚇得兩個囡又斟水又幫我摔心口,捉住我手叫我放鬆心情,深呼吸,足足十多分鐘我條氣先暢順番,真係覺得自己好蠢,比個死人工人攪到自己上氣唔接下氣,真唔抵!正當我抖順條氣去洗面時,姐姐拍門話:{太太,對唔住呀!八達通原來我忘記了放左係另一個手袋暗格,對唔住,sorry我比番比八達通你....}我聽到佢不停講野已覺很煩,我即時話:{我乜都唔想聽,你同我出去...}姐姐繼續話:{你唔信去check下張八達通,睇下我有無用你錢...}我大叫話:{救命呀!點解你咁唔聽話,我叫你收聲出去呀!}跟住我就大大力關上門,我真係唔想再對住呢個衰工人!我就係信佢先叫搵下,但佢就認定我唔信佢,而家搵到講句對唔住就想我原諒佢,呢次無可能會原諒佢!因為姐姐實在太惡太顛太離譜,完全不分尊卑!嬲左個幾鐘,都要入廚房準備煮飯,巴閉姐姐關上房門沒有出來幫手,呢餐飯由我自己一手包辨,本來買到$20三十一隻新鮮瀨尿蝦鬼咁開心,點知比姐姐攪到我而家一肚火,唧都唔識笑......
煎蘿蔔糕{全家至愛)
瑤柱瀨尿蝦粥{全家至愛)
燒賣{全家至愛)
涼拌泡菜青瓜{全家至愛)
 


7 則留言:

  1. 你己好厲害忍到佢咁耐,可以換咗佢嗎??????????你姐姐說得出心底話,可能真係羨慕你們乜都有,佢自己可能家庭上唔開心,我怕佢會做出其他驚嚇行為,我真係擔心你們,由其係囡囡,真係要想辨法呀

    回覆刪除
    回覆
    1. 換!但要等3個月先有姐姐!佢從不知足.....

      刪除
  2. 其實唔使諗, 即刻炒得! 你算數, 佢只會覺得自己啱!

    回覆刪除
    回覆
    1. 炒係必然,無奈不能馬上炒她.....

      刪除
  3. 作者已經移除這則留言。

    回覆刪除