2016年4月18日 星期一

睌餐




 
 
11-4-2016黃昏收到姑姐電話話:{你老豆好似有輕微中風...}我問姑姐:{嚇,邊個講?}姑姐話:{你老豆今日自己講話佢5/4食食下麵筷子跌左落地,想執時突然全身郁唔到,8/4食食下粥個人硬身,連嘴都歪左,維持左3分鐘有多.....咁係中風跡象,你拿拿林去買安宮牛王丸比你老豆食....}嚇得我收線急急打比老公叫佢快快買比老豆食,老公知我擔心急急去買左1盒6粒安宮牛王丸,盛惠$4440....老公仲即刻收工拎去比老豆食...........老豆打黎話:{買咁多粒仲乜呀?}我話:{你而家快快食一粒,一粒要隨身袋住,一粒放屋企看門口,總之你呢個星期要食二粒,跟住就一個月一粒,然後就三個月一粒,總之就當保健品食啦!你食晒我再叫阿華買比你....總之你一有唔妥記住打比我,有乜耍同我講,唔好乜都收收埋埋.......}收線後自己又流眼淚,突然好擔心老豆有事!
麵豉醬炒四季豆{全家至愛)
冬菇栗子炆鵝{全家至愛)
荷蘭豆炒魚片{ 全家至愛)

忌廉撻

11-4-2016九點睡魔急call,急急上床睡,點知睡得3粒鐘就醒,又唔想開電腦,又唔想睇電視,唯有入廚房搵野做消磨時間,原來我買左pat現成撻皮番黎,就唧cream上,明明切左士多謝梨、奇異果和菠蘿,但唔知點解突然又唔想加上去,求其放上士多啤梨就算......整左9個,整完叫工人姐姐食,姐姐話:{咁多?}我即時話:{唔食就扔晒佢啦!}卒之姐姐無食lunch就食晒呢9個忌廉撻,突然有少少覺得自己好衰強人所難........

王林片、香蜜梨片和哈蜜瓜片






11-4-2016唉,上左床好耐都睡不著,個腦不停湧現二叔的樣貌和笑容。見太陽都出來了,就起身搵野攪,見雪櫃有王林、香蜜梨和哈蜜瓜,又拎黎洗切做風乾。王林片好味,香蜜梨片好味但好甜,哈蜜瓜片好脆身但風完味道不好食.......

部隊窩






 
 
10-4-2016大忙人老公今日終於可以抖一日唔開工,瞓到4點就起身食早餐!食完就陪我去超市入貨,今晚簡簡單單食部隊窩就算.........

晚餐

 


 
9-4-2016唔開心都要堅持每日去探太爺,探完太爺知自己實胡思亂想又會失眠,又去睇中醫。今晚無心情唔多想煮,整個泡菜年餐肉炒年糕和麻辣雞腳就算........
 


2016年4月16日 星期六

士多啤梨蛋糕

9-4-2016明知自己坐你度一定左諗右諗,兼且會又喊。唯有入廚房睇下有乜整。諗住整卷蛋,唔知係咪焗得太耐個面爆晒,諗住食鬼左佢就算,點知切切下見有塊無爆面,靈機一觸搽cream叠起,再唧上cream和放上士多啤梨,又即時變得靚靚.......

士多啤梨卷蛋





9-4-2016老公話想食卷蛋,咁我當然會滿足佢啦!正當我努力打緊蛋白時,電話響起時我懶得去聽,整好放入爐先拎起電話睇下邊個打黎,見係大家姐打黎咪打番比大家姐問乜事?大家姐話:{二叔死左....}我聽到好唔開心好晤開心,完全接受唔到。蛋糕出爐我連放餡卷都唔想,自己坐係梳化一邊諗一邊喊,好心痛原來二叔係屋企走左幾日啦!直到鄰居投訴二叔閒屋好臭,報警先發現二叔已經死左兼全身發黑,點解會咁架?蛋糕出爐本來已無心機放餡料卷,點知老公突然打然黎問:{點呀?我今晚有無卷蛋食?}我停頓左一陣話:{有...而家整緊...}老公話:{老婆幾時都係最抵錫.......}本來我好想同老公講二叔件事,但我知會影響老公工作,所以我無講到就收缐。深呼吸幾下後,即刻入廚房整好呢條士多啤梨卷蛋,心不在焉竟然單手拎起個蛋糕,卒之斷開左1/3,已嬲嬲地,點知卷時又論論盡盡咇晒cream出黎,總之就樣衰啦!

環保酵素187


9-4-2016唉,真係就黎比工人姐姐激死,佢次次放生果入雪櫃,一定唔會執下個生果格,永遠都唔識新買生果放義,舊生果放出食先,終於攪到成日有生果爛,唉,做乜都唔用下個腦....呢桶有檸檬、橙皮、青瓜、木瓜皮、薑、士多啤梨、桃駁梨、啤梨和蘋果.......

鹵水豆腐

 
 
 
 
 
8-4-2016天氣開始熱啦!又要執衫轉季啦!又執左3大袋衫唔要比姑仔、叔仔老婆同阿嫂瓜分,仲比左十幾件衫工人姐姐,如果愛買又唔愛扔的話,真係大大間屋都晤夠擺......次次執衫都執到我頭暈暈,今日炒個雜錦米粉,再加鹵水豆腐和蒜蓉菜心就算........

椰青炒飯


 

 
7-4-2016今晚老公有客請食飯晤返黎食,咁我就整個椰青炒飯,再炒多碟生菜就成為我同細囡們晚餐啦!

愛心手信

6-4-2016樹熊剛去完名古屋旅行,買左以下手信送比我地,多謝晒樹熊的心意!

晚餐




 
 
 

6-4-2016今日去左康復大樓見職業治療師,詳細認識氧氣,因為太爺條氣唔好,遲下出院後可能要用氧氣幫助呼吸,職業治療師講解如何運用和租用月費給我知。跟住我又乖乖去睇中醫,今次的起心肝連續食一個月,睇下皮膚是否會有好轉.......
咸酸菜炆雞{全家至愛)
蒜蓉油麥菜{全家至愛)
麻婆豆腐{全家至愛}

晚餐




 
 
 

5-4-2016工人姐姐吸床竟然會順手扔左個吹塵格,配過一套返黎又盛惠$480.......對住姐姐真的無言...無言............
蒜蓉油麥菜{全家至愛)
豉汁三文魚扒{全家至愛)
照燒一口牛{全家至愛)

2016年4月15日 星期五

晚餐








4-4-2016唉,條頸痕左成個星期,噴鹼性水、敷環酵、搽寶樹堂雖然有好到,但就消晤到紅和痕,老豆今日陪左我去睇皮膚科,醫生話係皮膚炎,盛惠$680,回家食了一日藥,和用藥水洗左一次搽左一次藥膏,係頸已經唔痕兼消晒腫,睇怕精油排毒呢次路我未必行得長.........
榨菜燒豬骨粥{全家至愛)
韓式炒粉絲{全家至愛)
鮑汁炒什菇{全家至愛)
涼拌青瓜{全家至愛)